Coriander: 10 రోజులైనా ఫ్రెస్‌గా ఘుమఘుమలాడుతూ ఉండాలంటే..

Coriander: వంటల్లో రుచిని, సువాసనను పెంచే కొత్తిమీర ప్రతి ఇంటి వంటగదిలో తప్పనిసరిగా ఉండే పదార్థం. అయితే మార్కెట్ నుంచి ఎంతో తాజాగా తీసుకొచ్చిన కొత్తిమీర కేవలం 2 రోజులకే వాడిపోవడం చాలామంది గృహిణులకు ఇబ్బందిగా మారుతోంది. ముఖ్యంగా ఫ్రిజ్‌లో పెట్టినా ఆకులు పసుపురంగులోకి మారడం, కాడలు కుళ్లిపోవడం, వాసన మారిపోవడం తరచూ కనిపించే సమస్యలు. కానీ కొన్ని సులభమైన జాగ్రత్తలు తీసుకుంటే కొత్తిమీరను 10 రోజుల వరకు కూడా తాజాగా, పచ్చగా నిల్వ ఉంచుకోవచ్చని వంట నిపుణులు చెబుతున్నారు. సరైన విధంగా భద్రపరిస్తే కొత్తిమీర రుచి, సువాసన అలాగే ఉండటంతో పాటు పదే పదే మార్కెట్‌కు వెళ్లాల్సిన అవసరం కూడా ఉండదు.

మార్కెట్ నుంచి కొత్తిమీర తీసుకొచ్చిన వెంటనే ముందుగా దానిని జాగ్రత్తగా పరిశీలించాలి. అందులో పసుపు రంగులోకి మారిన ఆకులు, కుళ్లిపోయిన కాడలు ఉంటే వెంటనే తొలగించాలి. ఎందుకంటే ఒకటి రెండు పాడైన ఆకులు మొత్తం కొత్తిమీర కట్టనే త్వరగా పాడయ్యేలా చేస్తాయి. అందుకే మొదట శుభ్రం చేయడం చాలా ముఖ్యం. ఆ తర్వాత కొత్తిమీరను నీటితో శుభ్రంగా కడగాలి. అయితే కడిగిన వెంటనే ఫ్రిజ్‌లో పెట్టకూడదు. అందులో ఏమాత్రం తడి ఉన్నా అది బ్యాక్టీరియా పెరిగేందుకు కారణమై త్వరగా కుళ్లిపోతుంది. కాబట్టి ఒక కాటన్ వస్త్రంపై కొత్తిమీరను పరచి ఫ్యాన్ కింద పూర్తిగా ఆరబెట్టాలి. ఆకులు, కాడల్లో తేమ లేకుండా చూసుకోవడం చాలా అవసరం.

కొత్తిమీర ఎక్కువ రోజులు తాజాగా ఉండాలంటే టిష్యూ పేపర్ వినియోగించడం మంచి పద్ధతిగా భావిస్తున్నారు. పూర్తిగా ఆరిన కొత్తిమీరను టిష్యూ పేపర్‌లో మెల్లగా చుట్టి ఎయిర్ టైట్ డబ్బాలో ఉంచాలి. డబ్బా అడుగున కూడా ఒక టిష్యూ పేపర్ వేయడం వల్ల అదనపు తేమను అది పీల్చుకుంటుంది. దీంతో కొత్తిమీర పొడిగా ఉండి ఎక్కువ రోజులు తాజాగా ఉంటుంది. ప్లాస్టిక్ లేదా గాజు డబ్బాలను ఉపయోగిస్తే మరింత మంచిదని నిపుణులు సూచిస్తున్నారు. ఒకవేళ ఇంట్లో ఎయిర్ టైట్ డబ్బాలు లేకపోతే జిప్‌లాక్ బ్యాగులను కూడా ఉపయోగించవచ్చు. బ్యాగ్‌లో కొత్తిమీర పెట్టే ముందు లోపల ఒక టిష్యూ పేపర్ ఉంచితే తేమ చేరకుండా ఉంటుంది.

అలాగే కొత్తిమీర వేర్లను కత్తిరించి భద్రపరచడం కూడా ఉపయోగకరంగా ఉంటుంది. వేర్లు తీసేయడం వల్ల నిల్వ చేయడం సులభమవుతుంది. అయితే కేవలం ఆకులు మాత్రమే కాకుండా కాడలతో పాటు ఉంచితే కొత్తిమీర సువాసన ఎక్కువకాలం నిలిచి ఉంటుంది. మరో మంచి చిట్కా ఏమిటంటే వేర్లతో ఉన్న కొత్తిమీరను ఒక గ్లాసులో కొద్దిగా నీళ్లు పోసి అందులో నిలువుగా ఉంచడం. వేర్లు నీటిలో మునిగేలా ఉంచి ఆ గ్లాసును ఫ్రిజ్‌లో పెడితే కొత్తిమీర తాజాగా ఉంటుంది. అయితే 2 రోజులకోసారి నీటిని మార్చడం తప్పనిసరి. ఇలా చేయడం వల్ల కొత్తిమీర తాజాగా ఉండటంతో పాటు ఆకులు ఎండిపోకుండా ఉంటాయి.

ఇంకొంతమంది కొత్తిమీరను అల్యూమినియం ఫాయిల్‌లో చుట్టి ఫ్రిజ్‌లో ఉంచే పద్ధతిని కూడా పాటిస్తున్నారు. ఇది గాలి తగలకుండా కాపాడటంతో కొత్తిమీర త్వరగా వాడిపోకుండా సహాయపడుతుంది. ఈ చిన్న చిన్న చిట్కాలను పాటిస్తే కొత్తిమీర పదే పదే కొనాల్సిన అవసరం లేకుండా ఇంట్లోనే ఎక్కువ రోజులు తాజాగా నిల్వ ఉంచుకోవచ్చు. సరైన పద్ధతిలో భద్రపరిస్తే వంటల్లో ప్రతి రోజు తాజా కొత్తిమీర సువాసనను ఆస్వాదించవచ్చు.

ALSO READ: Dream Science: కలలో ట్రాన్స్‌జెండర్లు కనిపిస్తే అర్థం ఏమిటి?