High Court: కన్నెపొర చిరిగినంత మాత్రాన తప్పు అంటే ఎలా..?

High Court: అత్యాచార కేసుల విచారణలో బాధితురాలి వాంగ్మూలానికి ఉన్న ప్రాధాన్యాన్ని మరోసారి స్పష్టం చేస్తూ అలహాబాద్ హైకోర్టు కీలక తీర్పు వెలువరించింది. బాధితురాలు ఇచ్చిన సాక్ష్యం పూర్తిగా విశ్వసనీయంగా ఉన్నప్పుడు, కేవలం వైద్య పరీక్షల్లో హైమెన్ (హైమెన్) ముందే చిరిగిపోయి ఉందనే కారణాన్ని చూపిస్తూ నిందితుడికి అనుమాన ప్రయోజనం కల్పించడం సాధ్యం కాదని న్యాయస్థానం స్పష్టం చేసింది. అత్యాచారం అనేది చట్టపరంగా నిర్వచించబడిన నేరమని, అది కేవలం వైద్యపరమైన అభిప్రాయాలతో మాత్రమే నిర్ణయించబడే అంశం కాదని ధర్మాసనం పేర్కొంది. ఈ వ్యాఖ్యలతో పాటు దాదాపు 44 ఏళ్ల క్రితం నమోదైన ఒక అత్యాచార కేసులో ట్రయల్ కోర్టు విధించిన మూడేళ్ల జైలు శిక్షను హైకోర్టు యథాతథంగా కొనసాగించింది.

ఈ కేసు వివరాల ప్రకారం.. ఉత్తరప్రదేశ్‌లోని అలహాబాద్ పరిధిలో ఉన్న ఒక గ్రామంలో 1982లో 15 ఏళ్ల నిరక్షరాస్య బాలిక ఉదయం పొలానికి వెళ్లిన సమయంలో రాకేష్ అనే వ్యక్తి మరో వ్యక్తితో కలిసి ఆమెను అడ్డగించి అత్యాచారానికి పాల్పడ్డారు. బాలిక తీవ్రంగా ప్రతిఘటించడంతో ఆమెపై దాడి కూడా చేసినట్లు కేసు నమోదైంది. అనంతరం విచారణ జరిపిన అడిషనల్ సెషన్స్ జడ్జి 1983 మే నెలలో ఇద్దరు నిందితులను దోషులుగా తేల్చి వారికి మూడేళ్ల జైలు శిక్ష విధించారు. అయితే ఈ తీర్పును సవాల్ చేస్తూ నిందితుడు రాకేష్ అలహాబాద్ హైకోర్టును ఆశ్రయించి అప్పీల్ దాఖలు చేశాడు.

అప్పీల్ విచారణ సందర్భంగా నిందితుడి తరఫు న్యాయవాది బాధితురాలి వైద్య పరీక్షల నివేదికను ఆధారంగా చూపిస్తూ వాదనలు వినిపించారు. వైద్య పరీక్షల్లో హైమెన్ ముందే చిరిగిపోయి ఉందని నమోదు కావడంతో, బాధితురాలికి గతంలోనే ఇతరులతో శారీరక సంబంధాలు ఉండి ఉండవచ్చని పేర్కొన్నారు. ఈ పరిస్థితిని పరిగణనలోకి తీసుకుని తన క్లయింట్‌పై నమోదైన అత్యాచార ఆరోపణలను అనుమానంతో చూడాలని, అతనికి అనుమాన ప్రయోజనం కల్పించాలని కోర్టును కోరారు.

అయితే ఈ వాదనలను విచారించిన జస్టిస్ సంతోష్ రాయ్ ధర్మాసనం వాటిని పూర్తిగా తిరస్కరించింది. బాధితురాలి వ్యక్తిత్వాన్ని దెబ్బతీసే విధంగా చేసే ఇటువంటి వాదనలు చట్టపరంగా సమర్థనీయం కావని స్పష్టం చేసింది. హైమెన్ చిరిగిపోవడానికి శారీరక సంబంధాలే ఒక్కటే కారణం కాదని, క్రీడల్లో పాల్గొనడం, సైక్లింగ్ చేయడం, జిమ్నాస్టిక్స్, గుర్రపు స్వారీ, కఠినమైన శారీరక శ్రమ లేదా ప్రమాదవశాత్తూ కలిగే గాయాలు వంటి అనేక కారణాలతో కూడా హైమెన్ చిరిగిపోయే అవకాశం ఉంటుందని కోర్టు వివరించింది. అంతేకాకుండా కొంతమంది మహిళలు పుట్టుకతోనే హైమెన్ లేకుండా జన్మిస్తారని, మరికొందరిలో అది చాలా సాగే స్వభావాన్ని కలిగి ఉంటుందని కూడా ధర్మాసనం గుర్తుచేసింది.

ఈ నేపథ్యంలో వైద్య నివేదికలోని ఒక్క అంశాన్ని ఆధారంగా చేసుకుని బాధితురాలి వాంగ్మూలాన్ని పక్కన పెట్టడం చట్టపరంగా సమంజసం కాదని హైకోర్టు తేల్చిచెప్పింది. అత్యాచారం వంటి నేరాలు సాధారణంగా రహస్య పరిస్థితుల్లోనే జరుగుతాయని, అందువల్ల ప్రతి కేసులో ప్రత్యక్ష సాక్షులు ఉండాలని ఆశించడం ఆచరణలో సాధ్యం కాదని పేర్కొంది. బాధితురాలి సాక్ష్యం సహజంగా, విశ్వసనీయంగా, ఇతర ఆధారాలతో అనుసంధానంగా ఉన్నప్పుడు అదే ప్రధాన ఆధారంగా పరిగణించాల్సి ఉంటుందని స్పష్టం చేసింది. అత్యాచారం అనేది చట్టపరమైన నిర్వచనం కలిగిన నేరమని, అది కేవలం వైద్య నివేదికతోనే నిర్ధారించబడదని, వైద్యుల అభిప్రాయాన్ని ఆధారంగా చేసుకుని నిందితుడు నిర్దోషి అని ప్రకటించడం సరికాదని ధర్మాసనం వ్యాఖ్యానించింది.

ఈ తీర్పుతో పాటు ఇంతకాలం బెయిల్‌పై ఉన్న నిందితుడు రాకేష్‌కు ఇచ్చిన బెయిల్ బాండ్లను హైకోర్టు వెంటనే రద్దు చేసింది. ట్రయల్ కోర్టు విధించిన మిగిలిన శిక్షను అనుభవించేందుకు అతను రాబోయే 10 రోజుల్లోగా సంబంధిత ట్రయల్ కోర్టు ఎదుట లొంగిపోవాలని ఆదేశాలు జారీ చేసింది. దీంతో నిందితుడు దాఖలు చేసిన అప్పీల్‌ను పూర్తిగా కొట్టివేస్తూ ట్రయల్ కోర్టు తీర్పును హైకోర్టు సమర్థించింది.

ALSO READ: Telangana: మేకులు దింపిన బొమ్మ.. పక్కనే బలి ఇచ్చిన మేక.. బాబోయ్..