Scientist Jobs: డీఆర్డీవోలో ఉద్యోగాల జాతర.. రూ.1.23 లక్షల వరకూ జీతం

Scientist Jobs: భారత రక్షణ రంగంలో పనిచేయాలనే లక్ష్యంతో ఉన్న సైన్స్, ఇంజినీరింగ్ నిపుణులకు కేంద్ర ప్రభుత్వం శుభవార్త అందించింది. రక్షణ పరిశోధన, అభివృద్ధి సంస్థ నిర్వహిస్తున్న రిక్రూట్‌మెంట్ అండ్ అసెస్‌మెంట్ సెంటర్ ద్వారా అనుభవజ్ఞులైన అభ్యర్థుల కోసం ప్రత్యేక నియామక ప్రక్రియ ప్రారంభమైంది. అడ్వర్టైజ్‌మెంట్ నెం.157 కింద లాటరల్ ఎంట్రీ విధానంలో మొత్తం 33 శాశ్వత సైంటిస్ట్ పోస్టుల భర్తీకి నోటిఫికేషన్ విడుదలైంది. ఈ నియామకాల ద్వారా సైంటిస్ట్ ‘సి’, సైంటిస్ట్ ‘డి’, సైంటిస్ట్ ‘ఈ’ హోదాల్లో అభ్యర్థులను ఎంపిక చేయనున్నారు. దేశ రక్షణ సాంకేతికత అభివృద్ధిలో భాగస్వాములు కావాలనుకునే అనుభవజ్ఞులైన నిపుణులకు ఇది అరుదైన అవకాశం.

నోటిఫికేషన్ ప్రకారం మొత్తం 33 ఖాళీలలో 20 సైంటిస్ట్ ‘సి’, 11 సైంటిస్ట్ ‘డి’, 2 సైంటిస్ట్ ‘ఈ’ పోస్టులు ఉన్నాయి. 7వ వేతన సంఘం ప్రకారం సైంటిస్ట్ ‘సి’ పోస్టుకు బేసిక్ పే రూ.67,700, సైంటిస్ట్ ‘డి’ పోస్టుకు రూ.78,800, సైంటిస్ట్ ‘ఈ’ పోస్టుకు రూ.1,23,100గా నిర్ణయించారు. వేతనంతో పాటు కేంద్ర ప్రభుత్వ ఉద్యోగులకు లభించే ఇతర భత్యాలు కూడా వర్తిస్తాయి.

ఎలక్ట్రానిక్స్, కంప్యూటర్ సైన్స్, మెకానికల్, ఏరోస్పేస్, కెమికల్ ఇంజినీరింగ్, ఫిజిక్స్, మ్యాథమెటిక్స్ తదితర సంబంధిత విభాగాల్లో కనీసం 60 శాతం మార్కులతో డిగ్రీ లేదా పీజీ పూర్తి చేసిన అభ్యర్థులు దరఖాస్తు చేసుకోవచ్చు. సైంటిస్ట్ ‘సి’ పోస్టుకు కనీసం 3 ఏళ్ల పని అనుభవం, సైంటిస్ట్ ‘డి’ పోస్టుకు 7 ఏళ్ల అనుభవం, సైంటిస్ట్ ‘ఈ’ పోస్టుకు 11 ఏళ్ల అనుభవం తప్పనిసరి. సైంటిస్ట్ ‘సి’ అభ్యర్థుల గరిష్ట వయస్సు 35 ఏళ్లు కాగా, సైంటిస్ట్ ‘డి’ మరియు ‘ఈ’ పోస్టులకు 45 ఏళ్లు మించరాదు.

ఎంపిక ప్రక్రియలో భాగంగా ముందుగా దరఖాస్తులపై పరిపాలనా, సాంకేతిక పరిశీలన నిర్వహిస్తారు. అనంతరం అర్హులైన అభ్యర్థులను షార్ట్‌లిస్ట్ చేసి వ్యక్తిగత ఇంటర్వ్యూలకు పిలుస్తారు. ఇంటర్వ్యూలో ప్రతిభ ఆధారంగా తుది ఎంపిక చేపడతారు. జనరల్, ఓబీసీ, ఈడబ్ల్యూఎస్ పురుష అభ్యర్థులకు దరఖాస్తు రుసుము రూ.100గా నిర్ణయించగా, ఎస్సీ, ఎస్టీ, దివ్యాంగులు, మహిళా అభ్యర్థులకు ఎలాంటి ఫీజు లేదు.

ఆన్‌లైన్ దరఖాస్తు ప్రక్రియ ఇప్పటికే ప్రారంభమైంది. అర్హత, ఆసక్తి ఉన్న అభ్యర్థులు డీఆర్డీవో ఆర్‌ఏసీ అధికారిక వెబ్‌సైట్ https://rac.gov.in/ ద్వారా జూన్ 19 సాయంత్రం 4 గంటలలోపు దరఖాస్తు సమర్పించాలి. రక్షణ పరిశోధన రంగంలో ప్రతిష్టాత్మక కెరీర్‌ను నిర్మించుకోవాలనుకునే వారికి ఈ నియామకాలు మంచి అవకాశంగా నిలుస్తున్నాయి.

ALSO READ: Telangana: పిల్లలు ఎగిరిగంతేసే న్యూస్.. సెలవులు పొడగింపు