NEET-UG: పేపర్ లీక్‌ల తర్వాత కీలక నిర్ణయం

NEET-UG: దేశవ్యాప్తంగా వైద్య విద్యలో ప్రవేశాల కోసం నిర్వహించే అండర్ గ్రాడ్యుయేట్ ప్రవేశ పరీక్షను మరింత పారదర్శకంగా, సురక్షితంగా నిర్వహించేందుకు కేంద్ర ప్రభుత్వం కీలక మార్పులకు శ్రీకారం చుట్టింది. వచ్చే విద్యా సంవత్సరం నుంచి ఎంబీబీఎస్, బీడీఎస్‌తో పాటు ఇతర వైద్య కోర్సుల్లో ప్రవేశాలకు నిర్వహించే నీట్ యూజీ పరీక్షను పూర్తిగా కంప్యూటర్ ఆధారిత విధానంలో నిర్వహించేందుకు సన్నాహాలు జరుగుతున్నాయి. ఇందుకోసం దేశంలోని సుమారు 500 నగరాల్లో దాదాపు 1,000 పరీక్షా కేంద్రాలను ఏర్పాటు చేసి, పరీక్షను ఒకే రోజు కాకుండా 5 నుంచి 6 రోజుల పాటు విడతలవారీగా నిర్వహించే ప్రణాళిక సిద్ధమవుతున్నట్లు సమాచారం. ఈ విధానం అమల్లోకి వస్తే ఒకే రోజు పరీక్ష నిర్వహణలో ఎదురయ్యే ఇబ్బందులు తగ్గడంతో పాటు భద్రతా వ్యవస్థ మరింత బలోపేతం అవుతుందని అధికారులు భావిస్తున్నారు.

ప్రతి రోజు సుమారు 5 లక్షల మంది అభ్యర్థులు పరీక్ష రాసేలా ప్రణాళిక రూపొందిస్తున్నట్లు తెలుస్తోంది. ఎక్కువశాతం పరీక్షా కేంద్రాలను కేంద్రీయ విద్యాలయాలు, నవోదయ విద్యాలయాలు వంటి ప్రభుత్వ విద్యాసంస్థల్లో ఏర్పాటు చేయాలని నిర్ణయించినట్లు సమాచారం. అవసరాన్ని బట్టి మౌలిక సదుపాయాలు కలిగిన కొన్ని ప్రతిష్ఠాత్మక ప్రైవేట్ విద్యాసంస్థలను కూడా పరీక్షా కేంద్రాలుగా ఎంపిక చేసే అవకాశముంది. ఒక్కో పరీక్షా కేంద్రంలో రోజుకు సుమారు 500 మంది అభ్యర్థులు పరీక్ష రాసేలా సాంకేతిక, భద్రతా ఏర్పాట్లు చేపట్టనున్నారు. కంప్యూటర్ ఆధారిత విధానం ద్వారా ప్రశ్నపత్రాల భద్రత, పరీక్షల నిర్వహణలో పారదర్శకత మరింత పెరుగుతుందని ప్రభుత్వం భావిస్తోంది.

ప్రవేశ పరీక్షలను నిర్వహించే జాతీయ పరీక్షల సంస్థలో కూడా సమూల మార్పులు చేపట్టాలని కేంద్ర ప్రభుత్వం నిర్ణయించింది. సంస్థాగత నిర్మాణం, సాంకేతిక మౌలిక వసతులు, పరీక్షల నిర్వహణ విధానం, భద్రతా ప్రమాణాలు, పరిపాలనా వ్యవస్థలను పూర్తిగా పునర్వ్యవస్థీకరించే ప్రక్రియ కొనసాగుతోంది. ఈ మార్పులు అక్టోబర్ నాటికి పూర్తయ్యే అవకాశముందని అధికార వర్గాలు వెల్లడించాయి. ప్రస్తుతం ఈ సంస్థలో సుమారు 150 పోస్టులు మంజూరై ఉండగా, భవిష్యత్ అవసరాలకు అనుగుణంగా వ్యవస్థను మరింత బలోపేతం చేయాలని ప్రభుత్వం లక్ష్యంగా పెట్టుకుంది.

ఈ నిర్ణయానికి గతంలో జరిగిన ప్రశ్నపత్రం లీక్ ఘటనలు ప్రధాన కారణంగా నిలిచాయి. ఈ ఏడాది మే 3న నిర్వహించిన నీట్ యూజీ పరీక్షకు సుమారు 22 లక్షల మంది అభ్యర్థులు హాజరయ్యారు. అనంతరం ప్రశ్నపత్రం లీక్ ఆరోపణలు వెలుగులోకి రావడంతో పరీక్షను రద్దు చేసి జూన్ 21న పునఃపరీక్ష నిర్వహించారు. ఈ ఘటన దేశవ్యాప్తంగా తీవ్ర చర్చకు దారితీయగా, కేంద్ర దర్యాప్తు సంస్థ విచారణ కూడా ప్రారంభమైంది. ప్రవేశ పరీక్షలపై విద్యార్థులు, తల్లిదండ్రుల్లో విశ్వాసాన్ని పెంపొందించడంతో పాటు ఇలాంటి ఘటనలు పునరావృతం కాకుండా నివారించేందుకు కేంద్ర విద్యాశాఖ పలు కీలక నిర్ణయాలు తీసుకుంటోంది.

2024లో వెలుగులోకి వచ్చిన ప్రశ్నపత్రం లీక్ ఘటన అనంతరం ఇస్రో మాజీ ఛైర్మన్ డాక్టర్ కె.రాధాకృష్ణన్ నేతృత్వంలోని 7 మంది సభ్యులతో ఉన్నత స్థాయి కమిటీని కేంద్ర ప్రభుత్వం ఏర్పాటు చేసింది. ఆ కమిటీ సమర్పించిన నివేదికలో నీట్ యూజీ పరీక్షను పూర్తిగా కంప్యూటర్ ఆధారిత విధానంలో నిర్వహించాలని సిఫార్సు చేసింది. ఈ సిఫార్సులను అమలు చేయాలనే దిశగా కేంద్ర ప్రభుత్వం ఇప్పటికే చర్యలు ప్రారంభించింది. విద్యాశాఖ మంత్రి ధర్మేంద్ర ప్రధాన్ కూడా వచ్చే విద్యా సంవత్సరం నుంచి కంప్యూటర్ ఆధారిత విధానంలోనే పరీక్ష నిర్వహించనున్నట్లు ప్రకటించిన నేపథ్యంలో ఏర్పాట్లు వేగవంతం అయ్యాయి.

జాతీయ పరీక్షల సంస్థ పునర్వ్యవస్థీకరణ పూర్తైన అనంతరం పరీక్షల షిఫ్ట్‌లు, పరీక్షా నగరాల జాబితా, తేదీలు, ఇతర మార్గదర్శకాలను అధికారికంగా ప్రకటించనున్నట్లు సమాచారం. ఇదిలా ఉండగా ప్రశ్నపత్రం లీక్ కేసులో ఇప్పటివరకు ప్రధాన సూత్రధారుల కంటే దిగువస్థాయి వ్యక్తులనే అరెస్టు చేశారన్న విమర్శలపై అధికారులు స్పందించారు. దర్యాప్తు ఇంకా కొనసాగుతోందని, ఈ నేరానికి పాల్పడిన వారెవరైనా వారిపై కఠిన చర్యలు తప్పవని స్పష్టం చేశారు. ప్రవేశ పరీక్షల భద్రతను మరింత పటిష్ఠం చేసేందుకు చేపడుతున్న చర్యలపై విద్యాశాఖ, జాతీయ పరీక్షల సంస్థ ఉన్నతాధికారులు పార్లమెంటు స్థాయీ సంఘానికి కూడా వివరాలు అందించారు. గత 2 దశాబ్దాల్లో కనీసం లక్ష మంది అభ్యర్థులు రాసిన 45 ప్రధాన ప్రవేశ పరీక్షల్లో ప్రశ్నపత్రం లీక్ ఘటనలు నమోదైనట్లు వెలుగులోకి వచ్చినప్పటికీ, వాటిలో కేవలం 2 కేసుల్లో మాత్రమే శిక్షలు నమోదయ్యాయని వెల్లడికావడం కూడా ఆందోళన కలిగిస్తోంది.

ALSO READ: Shiva Purana: కలియుగం ముగియడానికి ఇంకా ఎంత కాలం ఉంది..?