Farmer Scheme: పీఎం కిసాన్ 23వ విడత డబ్బులు ఎప్పుడంటే..?

Farmer Scheme: ప్రధానమంత్రి కిసాన్ సమ్మాన్ నిధి పథకం కింద కేంద్ర ప్రభుత్వం దేశంలోని చిన్న, సన్నకారు రైతులకు ఆర్థిక భరోసా కల్పిస్తోంది. 2019లో ప్రారంభమైన ఈ పథకం ద్వారా అర్హులైన రైతుల బ్యాంకు ఖాతాల్లో నేరుగా ఆర్థిక సాయం జమ అవుతోంది. ప్రతి సంవత్సరం రూ.6,000 చొప్పున మూడు విడతలుగా రైతులకు అందజేస్తుండగా, ఒక్కో విడతలో రూ.2,000 నేరుగా డీబీటీ విధానంలో ఖాతాల్లో జమ చేస్తారు. ఇప్పటివరకు 22 విడతల నిధులను కేంద్ర ప్రభుత్వం విడుదల చేయగా, ఇప్పుడు దేశవ్యాప్తంగా లక్షలాది మంది రైతులు 23వ విడత నిధుల కోసం ఆసక్తిగా ఎదురుచూస్తున్నారు. తమ ఖాతాలో రూ.2,000 జమ అయ్యాయా లేదా, ఏదైనా సాంకేతిక సమస్య కారణంగా నిలిచిపోయాయా అనే వివరాలను రైతులు సులభంగా తెలుసుకునే అవకాశం ఉంది.

రైతులు తమ పీఎం కిసాన్ చెల్లింపు స్థితిని అధికారిక పోర్టల్ https://pmkisan.gov.in/ ద్వారా పరిశీలించవచ్చు. అలాగే కిసాన్ యాప్‌ను డౌన్‌లోడ్ చేసుకుని కూడా వివరాలు తెలుసుకోవచ్చు. పోర్టల్‌లో రిజిస్ట్రేషన్ నంబర్ లేదా మొబైల్ నంబర్ నమోదు చేసి, ఆధార్‌కు అనుసంధానమైన మొబైల్‌కు వచ్చే ఓటీపీని నమోదు చేసిన తర్వాత పూర్తి వివరాలు అందుబాటులోకి వస్తాయి. అక్కడ రైతు పేరు, ఈ-కేవైసీ స్థితి, గత విడతల చెల్లింపు వివరాలు, బ్యాంకు ఖాతా సమాచారం, ఏవైనా పెండింగ్ అంశాలు ఉన్నాయా లేదా అనే సమాచారం స్పష్టంగా కనిపిస్తుంది. దీంతో రైతులు తమ దరఖాస్తు స్థితిని సులభంగా పరిశీలించుకోవచ్చు.

అయితే కొంతమంది రైతులకు గత విడతల చెల్లింపులు ఆలస్యమైన సందర్భాలు కూడా ఉన్నాయి. ఒకవేళ 22వ విడత నిధులు ఇంకా జమ కాకపోయినా ఆందోళన చెందాల్సిన అవసరం లేదని అధికారులు సూచిస్తున్నారు. అర్హతలు సక్రమంగా ఉంటే పెండింగ్‌లో ఉన్న మొత్తం తదుపరి విడతతో కలిపి రైతుల ఖాతాల్లో జమ అయ్యే అవకాశం ఉంటుంది. అయితే ఇందుకోసం ఈ-కేవైసీ తప్పనిసరిగా పూర్తి చేసి ఉండాలి. ఈ-కేవైసీ పూర్తి చేయని రైతుల ఖాతాలకు నిధులు జమ కావు. అందుకే 23వ విడత కోసం ఎదురుచూస్తున్న రైతులు ముందుగానే తమ ఈ-కేవైసీ వివరాలు సరిచూసుకోవాలని సూచిస్తున్నారు.

ప్రస్తుతం కేంద్ర ప్రభుత్వం 23వ విడత నిధుల విడుదలకు సంబంధించిన ప్రక్రియలను కొనసాగిస్తున్నట్లు సమాచారం. రైతుల డేటాను పరిశీలిస్తూ, అర్హుల జాబితాను సిద్ధం చేసే పనులు జరుగుతున్నాయి. వ్యవసాయ శాఖ మంత్రి శివరాజ్‌ సింగ్ చౌహాన్ కూడా పలు సందర్భాల్లో పీఎం కిసాన్ పథకం అమలు, రైతులకు అందుతున్న ప్రయోజనాల గురించి ప్రస్తావించారు. అయితే 23వ విడత నిధుల విడుదలకు సంబంధించి ఇప్పటివరకు ఎలాంటి అధికారిక ప్రకటన వెలువడలేదు. అయినప్పటికీ గత సంవత్సరాల చెల్లింపు విధానాన్ని పరిశీలిస్తే, ఆర్థిక సంవత్సరంలో రెండో విడత సాధారణంగా జూన్ లేదా జూలై నెలల్లో విడుదలవుతోంది.

గతంలో 2023లో 20వ విడత నిధులు ఆగస్టు 2న విడుదల కాగా, 2024లో 17వ విడత నిధులు జూన్ 18న రైతుల ఖాతాల్లో జమయ్యాయి. ఈ నేపథ్యంలో 23వ విడత నిధులు కూడా జూన్ లేదా జూలై నెలల్లో విడుదలయ్యే అవకాశాలు ఉన్నాయని భావిస్తున్నారు. ఒకవేళ ప్రక్రియలో ఆలస్యం జరిగితే ఆగస్టు మొదటి లేదా రెండో వారంలో నిధులు విడుదల కావచ్చని అంచనాలు వ్యక్తమవుతున్నాయి. రైతులు అధికారిక పోర్టల్‌లో తమ వివరాలను ఎప్పటికప్పుడు పరిశీలిస్తూ, ఈ-కేవైసీ పూర్తిగా ఉన్నదో లేదో నిర్ధారించుకోవడం ద్వారా ఎలాంటి ఇబ్బందులు లేకుండా పథకం ప్రయోజనాలు పొందవచ్చు.

ALSO READ: CM Assets: దేశంలో ధనిక ముఖ్యమంత్రులు ఎవరు..? రెండో స్థానంలో తెలుగు సీఎం