Bima Sakhi Yojana: మహిళల కోసం కేంద్రం కొత్త పథకం.. ప్రతీ నెలా రూ.7 వేలు

Bima Sakhi Yojana: మహిళల ఆర్థిక సాధికారతకు ప్రోత్సాహం కల్పించే దిశగా లైఫ్ ఇన్యూరెన్స్ కార్పొరేషన్ ఆఫ్ ఇండియా(LIC) కొత్త అవకాశాన్ని అందుబాటులోకి తీసుకొచ్చింది. మహిళలు స్వయం ఉపాధి ద్వారా ఆదాయం పొందేందుకు, బీమా రంగంలో కెరీర్‌ను నిర్మించుకునేందుకు ప్రత్యేకంగా రూపొందించిన “బీమా సఖి యోజన” పథకం ప్రస్తుతం దేశవ్యాప్తంగా ఆసక్తిని రేకెత్తిస్తోంది. ఈ పథకం ద్వారా మహిళలకు శిక్షణతో పాటు నెలవారీ ఆర్థిక సహాయం అందించనుండటం విశేషం. ఇంటి వద్ద నుంచే పని చేసే అవకాశం ఉండటంతో అనేక మంది మహిళలు ఈ పథకం వైపు మొగ్గు చూపుతున్నారు.

ఈ పథకం ప్రధాన లక్ష్యం మహిళలను బీమా రంగంలోకి తీసుకురావడం. ఎంపికైన మహిళలకు బీమా ఉత్పత్తులు, బీమా సేవలు, ఆర్థిక అవగాహన, వినియోగదారులతో వ్యవహరించే విధానం వంటి అంశాలపై ప్రత్యేక శిక్షణ అందిస్తారు. శిక్షణ పూర్తయిన అనంతరం వారిని బీమా ప్రతినిధులుగా నియమించి బీమా పాలసీల విక్రయానికి అవకాశం కల్పిస్తారు. దీంతో మహిళలు స్వతంత్రంగా ఆదాయం పొందే మార్గం ఏర్పడుతుంది.

బీమా సఖి యోజనలో చేరిన మహిళలకు మొదటి మూడు సంవత్సరాల పాటు నెలవారీ స్టైఫండ్ అందజేస్తారు. మొదటి సంవత్సరంలో నెలకు రూ.7,000, రెండో సంవత్సరంలో నెలకు రూ.6,000, మూడో సంవత్సరంలో నెలకు రూ.5,000 చొప్పున ఆర్థిక సహాయం లభిస్తుంది. ఈ మొత్తానికి అదనంగా వారు విక్రయించే బీమా పాలసీలపై కమిషన్ కూడా పొందవచ్చు. దీంతో నెలవారీ ఆదాయం మరింత పెరిగే అవకాశం ఉంటుంది.

ఈ పథకానికి దరఖాస్తు చేసుకోవాలనుకునే మహిళల వయస్సు 18 నుంచి 70 సంవత్సరాల మధ్య ఉండాలి. కనీసం 10వ తరగతి ఉత్తీర్ణత సాధించి ఉండాలి. ఇప్పటికే బీమా ప్రతినిధిగా పనిచేసిన వారు ఈ పథకానికి అర్హులు కారు. అలాగే సంస్థ ఉద్యోగులు, బీమా ప్రతినిధుల కుటుంబ సభ్యులు, సన్నిహిత బంధువులు కూడా ఈ అవకాశాన్ని పొందలేరు. ఎంపిక ప్రక్రియలో భాగంగా సంబంధిత అర్హత పరీక్షలో ఉత్తీర్ణత సాధించాల్సి ఉంటుంది. ఆ తర్వాత మాత్రమే పూర్తి స్థాయి బీమా ప్రతినిధిగా అవకాశం కల్పిస్తారు.

మూడేళ్ల స్టైఫండ్ కాలం పూర్తైన తర్వాత కూడా అవకాశాలు కొనసాగుతాయి. అయితే ఇందుకోసం సంస్థ నిర్దేశించిన వ్యాపార లక్ష్యాలు, పాలసీ విక్రయ ప్రమాణాలు, పనితీరు ప్రమాణాలను చేరుకోవాల్సి ఉంటుంది. మంచి పనితీరు కనబరిచిన మహిళలు భవిష్యత్తులో మరింత ఆదాయం పొందే అవకాశాన్ని సొంతం చేసుకోవచ్చు.

ఈ పథకానికి దరఖాస్తు చేసుకునే వారు ఆధార్ కార్డు, విద్యార్హత ధ్రువపత్రాలు, చిరునామా రుజువు పత్రం, పాస్‌పోర్ట్ సైజు ఫొటోలు, మొబైల్ నంబర్, బ్యాంకు ఖాతా వివరాలు సిద్ధంగా ఉంచుకోవాలి. దరఖాస్తు సమర్పించిన తర్వాత అధికారులు వివరాలను పరిశీలించి అర్హతను నిర్ధారిస్తారు. అర్హత సాధించిన అభ్యర్థులకు ఫోన్ లేదా ఈ-మెయిల్ ద్వారా సమాచారం అందించి తదుపరి శిక్షణ కార్యక్రమంలో భాగస్వామ్యం కల్పిస్తారు.

ఇంటి బాధ్యతలు నిర్వహిస్తూ అదనపు ఆదాయం పొందాలనుకునే మహిళలకు ఈ పథకం మంచి అవకాశంగా మారుతోంది. శిక్షణ, స్టైఫండ్, కమిషన్ రూపంలో ఆదాయం పొందే వీలుండటంతో పాటు ఆర్థిక స్వావలంబన సాధించాలనుకునే మహిళలకు ఇది ఉపయోగకరమైన వేదికగా నిలుస్తోంది.

ALSO READ: Alimony Rules: భర్త మరణిస్తే భార్య భరణం పొందవచ్చా..?