ముఖ్యమంత్రి రేవంత్ రెడ్డి సొంత నియోజకవర్గమైన కొడంగల్‌లో వలస కూలీలు ఆందోళనకు దిగారు. తాము పనిచేసిన కూలి డబ్బులను KLSR కన్‌స్ట్రక్షన్స్ సంస్థ చెల్లించడం లేదంటూ నిరసన వ్యక్తం చేశారు. దీపావళి పండుగ సమీపిస్తున్నప్పటికీ తమకు రావాల్సిన వేతనాలు అందకపోవడంతో తీవ్ర ఇబ్బందులు పడుతున్నామని ఆవేదన వ్యక్తం చేశారు.
వికారాబాద్ జిల్లా దుద్యాల మండలం పోలేపల్లిలో నిర్మిస్తున్న ఎడ్యుకేషనల్ హబ్ పనుల్లో పలువురు వలస కూలీలు పనిచేస్తున్నారు. ఈ నిర్మాణ పనులను చేపడుతున్న KLSR కన్‌స్ట్రక్షన్స్ సంస్థ తమకు కూలి డబ్బులు చెల్లించడం లేదని వారు ఆరోపిస్తున్నారు. కొంతకాలంగా పనులు చేస్తున్నప్పటికీ వేతనాలు అందకపోవడంతో కుటుంబ పోషణ భారంగా మారిందని వాపోయారు.
ముఖ్యంగా దీపావళి పండుగ నేపథ్యంలో తమ స్వగ్రామాల్లో ఉన్న కుటుంబ సభ్యులకు డబ్బులు పంపాల్సి ఉందని కూలీలు చెబుతున్నారు. పండుగ సమయంలో పిల్లలకు కొత్త బట్టలు కొనడంతో పాటు ఇంటి అవసరాల కోసం డబ్బులు పంపించాల్సి ఉంటుందని, అలాంటి సమయంలో కూలి డబ్బులు ఇవ్వకపోవడం తమను ఆర్థిక ఇబ్బందుల్లోకి నెట్టిందని ఆవేదన వ్యక్తం చేస్తున్నారు. రోజంతా కష్టపడి పనిచేసినా తమ శ్రమకు తగిన ప్రతిఫలం అందడం లేదని ఆగ్రహం వ్యక్తం చేస్తున్నారు.
మరోవైపు ముఖ్యమంత్రి రేవంత్ రెడ్డి కొడంగల్ నియోజకవర్గంలో పర్యటించనున్న నేపథ్యంలో తమ సమస్యను ఆయన దృష్టికి తీసుకెళ్లాలని వలస కూలీలు నిర్ణయించుకున్నారు. KLSR కన్‌స్ట్రక్షన్స్ సంస్థ తమకు చెల్లించాల్సిన బకాయి కూలి డబ్బులను వెంటనే ఇప్పించాలని ముఖ్యమంత్రిని కోరనున్నట్లు తెలిపారు.
పనులు చేయించుకున్న తర్వాత వేతనాలు చెల్లించకపోవడం ఏమిటని ప్రశ్నిస్తున్న కూలీలు.. ప్రభుత్వం తమ సమస్యపై స్పందించి న్యాయం చేయాలని విజ్ఞప్తి చేస్తున్నారు. ముఖ్యమంత్రి సొంత నియోజకవర్గంలోనే వలస కార్మికులు కూలి డబ్బుల కోసం ఆందోళనకు దిగడం స్థానికంగా చర్చనీయాంశంగా మారింది. అయితే ఈ ఆరోపణలపై KLSR కన్‌స్ట్రక్షన్స్ సంస్థ స్పందన తెలియాల్సి ఉండగా సీఎం రేవంత్ రెడ్డి తన నియోజకవర్గంలో వలస కూలీల సమస్యలపై స్పందిస్తారా లేదా వేచిచూడాలి.
