EV India: రూ.1 లక్షలోపే బెస్ట్ ఎలక్ట్రిక్ స్కూటర్లు ఇవే..

EV India: భారతదేశంలో ఎలక్ట్రిక్ వాహనాల వినియోగం రోజురోజుకు వేగంగా పెరుగుతోంది. పెట్రోల్ ధరలు భారీగా పెరగడంతో మధ్యతరగతి ప్రజలు ఇప్పుడు తక్కువ ఖర్చుతో ఎక్కువ ప్రయోజనం ఇచ్చే ఎలక్ట్రిక్ స్కూటర్ల వైపు మొగ్గు చూపుతున్నారు. ఒకప్పుడు ఎలక్ట్రిక్ వాహనాలు అంటే ఖరీదైనవిగా భావించేవారు. కానీ ఇప్పుడు పరిస్థితి పూర్తిగా మారిపోయింది. రూ.1 లక్షలోపే అద్భుతమైన రేంజ్, ఆధునిక సాంకేతిక ఫీచర్లు, ఆకర్షణీయమైన రూపంతో పలు స్కూటర్లు మార్కెట్లో అందుబాటులోకి వచ్చాయి. ముఖ్యంగా రోజూ ఉద్యోగాలకు వెళ్లేవారు, విద్యార్థులు, డెలివరీ ఉద్యోగులు పెట్రోల్ వాహనాలకు బదులుగా ఎలక్ట్రిక్ స్కూటర్లను ఎంచుకుంటున్నారు. తక్కువ నిర్వహణ ఖర్చు, మంచి మైలేజ్, పర్యావరణానికి మేలు వంటి అంశాలు ఈవీలకు డిమాండ్ పెరగడానికి కారణమవుతున్నాయి.

ప్రస్తుతం మార్కెట్లో బజాజ్, టీవీఎస్, ఓలా, హోండా వంటి ప్రముఖ సంస్థలు మధ్యతరగతి ప్రజలను లక్ష్యంగా చేసుకుని బడ్జెట్ ధరల్లో కొత్త మోడళ్లను విడుదల చేస్తున్నాయి. తక్కువ ధరలో ఎక్కువ రేంజ్ ఇచ్చే వాహనాల కోసం చూస్తున్నవారికి ఇప్పుడు అనేక ఎంపికలు అందుబాటులో ఉన్నాయి. ముఖ్యంగా రూ.97 వేల పరిధిలోనే 190 కిలోమీటర్లకు పైగా రేంజ్ ఇచ్చే మోడళ్లు కూడా రావడం విశేషం. మీరు కూడా కొత్త ఎలక్ట్రిక్ స్కూటర్ కొనాలని భావిస్తుంటే ప్రస్తుతం మార్కెట్లో మంచి ఆదరణ పొందుతున్న టాప్ 5 బడ్జెట్ మోడళ్లపై ఒకసారి దృష్టి వేయాల్సిందే.

Bajaj Auto

బజాజ్ కంపెనీకి చెందిన చేతక్ 2903 ప్రస్తుతం బడ్జెట్ విభాగంలో మంచి ఆదరణ పొందుతోంది. ఒకప్పుడు భారత రహదారులపై సంచలనం సృష్టించిన చేతక్ ఇప్పుడు ఎలక్ట్రిక్ రూపంలో తిరిగి ప్రేక్షకుల ముందుకు వచ్చింది. ఈ మోడల్ ఎక్స్-షోరూమ్ ధర రూ.98,498గా ఉంది. ఇందులో 2.9 కిలోవాట్ గంటల సామర్థ్యం గల బ్యాటరీని అమర్చారు. ఒక్కసారి పూర్తి ఛార్జ్ చేస్తే 123 కిలోమీటర్ల వరకు ప్రయాణించే సామర్థ్యం కలదు. కేవలం 4 గంటల్లోనే 80 శాతం వరకు ఛార్జింగ్ పూర్తి కావడం దీని ప్రత్యేకత. గంటకు 63 కిలోమీటర్ల గరిష్ట వేగంతో ప్రయాణించే ఈ స్కూటర్‌లో హిల్ హోల్డ్ అసిస్ట్, స్మార్ట్‌ఫోన్ కనెక్టివిటీ, ఎకో, స్పోర్ట్ మోడ్‌లు వంటి ఆధునిక ఫీచర్లు ఉన్నాయి.

Ola Electric

ఓలా ఎలక్ట్రిక్ మార్కెట్లోకి తీసుకొచ్చిన ఎస్1 ఎక్స్ సిరీస్ ప్రస్తుతం యువతను బాగా ఆకట్టుకుంటోంది. రూ.64,999 ప్రారంభ ధరతో అందుబాటులో ఉన్న ఈ సిరీస్‌లో 2kWh, 3kWh, 4kWh బ్యాటరీ వేరియంట్లు ఉన్నాయి. 2kWh మోడల్ 95 కిలోమీటర్ల రేంజ్ ఇస్తుండగా, 3kWh మోడల్ 151 కిలోమీటర్ల వరకు ప్రయాణిస్తుంది. ఇక రూ.97,499 ధర కలిగిన 4kWh మోడల్ ఏకంగా 193 కిలోమీటర్ల సర్టిఫైడ్ రేంజ్‌తో వస్తోంది. తక్కువ ధరలో ఎక్కువ దూరం ప్రయాణించాలనుకునే వారికి ఇది మంచి ఎంపికగా నిలుస్తోంది.

TVS Motor Company

టీవీఎస్ నుంచి వచ్చిన ఐక్యూబ్ కూడా మార్కెట్లో విశ్వసనీయమైన ఎలక్ట్రిక్ స్కూటర్‌గా గుర్తింపు పొందింది. దీని బేస్ మోడల్ ఎక్స్-షోరూమ్ ధర రూ.89,999. ఇందులో 2.2kWh బ్యాటరీను అందించారు. ఒక్కసారి ఛార్జ్ చేస్తే 75 కిలోమీటర్ల వరకు ప్రయాణించే వీలుంది. కేవలం 2 గంటల 45 నిమిషాల్లోనే 80 శాతం వరకు ఛార్జింగ్ పూర్తవుతుంది. టైటానియం గ్రే, పెర్ల్ వైట్ వంటి ఆకర్షణీయ రంగుల్లో అందుబాటులో ఉన్న ఈ స్కూటర్ పట్టణ ప్రాంతాల్లో రోజువారీ ప్రయాణాలకు ఎంతో అనుకూలంగా ఉంటుంది.

Honda Motorcycle and Scooter India

హోండా నుంచి వచ్చిన క్యూ‌సీ1 కూడా ప్రస్తుతం మార్కెట్లో మంచి పోటీ ఇస్తోంది. ఈ స్కూటర్ ఎక్స్-షోరూమ్ ధర సుమారు రూ.90,000. ఇందులో 1.5kWh బ్యాటరీ, 1.8 కిలోవాట్ మోటార్‌ను అమర్చారు. గంటకు 50 కిలోమీటర్ల వేగంతో ప్రయాణించే ఈ వాహనం ఒక్కసారి ఛార్జ్ చేస్తే 80 కిలోమీటర్ల వరకు రేంజ్ ఇస్తుంది. పూర్తి ఛార్జింగ్‌కు సుమారు 6 గంటల 50 నిమిషాల సమయం పడుతుంది. హోండా బ్రాండ్‌పై నమ్మకం ఉన్నవారికి ఇది మంచి ఎంపికగా మారుతోంది.

ఇక స్పోర్టీ లుక్‌తో యువతను ఆకర్షిస్తున్న మరో వాహనం Ola Electric
తీసుకొచ్చిన రోడ్‌స్టర్ ఎక్స్. ఇది స్కూటర్ కాకపోయినా బడ్జెట్ ఎలక్ట్రిక్ ద్విచక్ర వాహనాల్లో మంచి డిమాండ్ సంపాదిస్తోంది. దీని ప్రారంభ ధర రూ.84,999. 2.5kWh బ్యాటరీ వేరియంట్ 140 కిలోమీటర్ల వరకు రేంజ్ ఇస్తుండగా, రూ.94,999 ధర కలిగిన 3.5 కిలోవాట్ గంటల మోడల్ ఏకంగా 196 కిలోమీటర్ల సర్టిఫైడ్ రేంజ్‌తో అందుబాటులోకి రానుంది. మే 2025 నుంచి డెలివరీలు ప్రారంభం కానున్న ఈ వాహనం యువతలో భారీ ఆసక్తి రేకెత్తిస్తోంది.

ALSO READ: Horror Movie: చూస్తే పోసుకోవాల్సిందే..