High Court: కాళేశ్వరం ప్రాజెక్ట్ కేసులో మాజీ సీఎం కేసీఆర్‌కు ఊరట

High Court: తెలంగాణ రాజకీయాల్లో తీవ్ర చర్చనీయాంశంగా మారిన కాళేశ్వరం ప్రాజెక్టు వ్యవహారంలో కీలక మలుపు చోటుచేసుకుంది. ఈ కేసులో ఆరోపణలు ఎదుర్కొంటున్న బీఆర్ఎస్ అధినేత, మాజీ ముఖ్యమంత్రి కేసీఆర్‌కు హైకోర్టు కీలక ఊరట కల్పించింది. ఘోష్ కమిషన్ నివేదిక ఆధారంగా కేసీఆర్‌పై ఎలాంటి చర్యలు తీసుకోకూడదని స్పష్టం చేస్తూ కోర్టు కీలక వ్యాఖ్యలు చేసింది. ఇదే నిర్ణయం మాజీ మంత్రి హరీష్‌రావు, స్మిత సభర్వాల్, ఎస్‌కే జోషిలకు కూడా వర్తిస్తుందని వెల్లడించింది. దీంతో ఈ కేసులో కీలక మలుపు తిరిగినట్టైంది.

కాళేశ్వరం ప్రాజెక్టు అవతవకలపై నిజానిజాలు వెలికితీయడానికి కమిషన్ ఏర్పాటు చేయడం సరైనదేనని హైకోర్టు అభిప్రాయపడింది. అయితే కమిషన్ చట్టబద్ధమైనదే అయినప్పటికీ, దాని నివేదిక ఆధారంగా నేరుగా చర్యలు తీసుకోవడం సరికాదని స్పష్టం చేసింది. ముఖ్యంగా సెక్షన్ 8 ప్రకారం నోటీసులు ఇవ్వకుండా ఆరోపణలు చేయడం చట్టపరంగా సమంజసం కాదని కోర్టు వ్యాఖ్యానించింది. ఈ నేపథ్యంలో ఘోష్ కమిషన్ నివేదికను ఆధారంగా చేసుకుని కేసీఆర్ సహా ఇతరులపై చర్యలు తీసుకోవద్దని తేల్చి చెప్పింది. ఈ తీర్పు రాజకీయంగా పెద్ద చర్చకు దారితీసింది.

కాళేశ్వరం ప్రాజెక్టు నేపథ్యాన్ని పరిశీలిస్తే, తెలంగాణలో బీఆర్ఎస్ ప్రభుత్వం అధికారంలోకి వచ్చిన తర్వాత అప్పటి ముఖ్యమంత్రి కేసీఆర్ ప్రాణహిత-చేవెళ్ల ప్రాజెక్టును పునర్ రూపకల్పన చేసి భారీ లిఫ్ట్ నీటి పారుదల ప్రాజెక్టుగా కాళేశ్వరం ప్రాజెక్టును నిర్మించారు. ఇందులో భాగంగా మేడిగడ్డ, అన్నారం, సుందిళ్ల వద్ద మూడు ప్రధాన బ్యారేజీలు నిర్మించారు. ఈ ప్రాజెక్టు రాష్ట్రానికి ఎంతో కీలకమని అప్పట్లో ప్రభుత్వం ప్రకటించింది. అయితే భారీ వ్యయంతో నిర్మించిన ఈ ప్రాజెక్టులో కొద్ది కాలంలోనే మేడిగడ్డ బ్యారేజ్ వద్ద పగుళ్లు రావడం వివాదానికి కారణమైంది.

ఈ పరిణామంతో ప్రాజెక్టు నిర్మాణంలో అవకతవకలు జరిగాయనే ఆరోపణలు వెల్లువెత్తాయి. దీంతో నేషనల్ డ్యామ్ సేఫ్టీ అథారిటీ విచారణ చేపట్టి, ప్రాజెక్టు రూపకల్పన మరియు నిర్మాణంలో లోపాలు ఉన్నాయని గుర్తించింది. అనంతరం 2023లో అధికారంలోకి వచ్చిన కాంగ్రెస్ ప్రభుత్వం ఈ అంశంపై సమగ్ర విచారణ జరిపించాలని నిర్ణయించి సుప్రీంకోర్టు మాజీ న్యాయమూర్తి జస్టిస్ పీసీ ఘోష్ నేతృత్వంలో కమిషన్‌ను ఏర్పాటు చేసింది. ఈ కమిషన్ నివేదికలో ప్రాజెక్టు నిర్మాణంలో నిపుణుల సూచనలు సరైన విధంగా తీసుకోలేదని, అంచనా వ్యయం పెరగడం, నాణ్యత నియంత్రణలో లోపాలు ఉన్నాయని ప్రస్తావించింది.

ఇప్పటికే ఈ నివేదిక ఆధారంగా చర్యలు తీసుకోవాలనే డిమాండ్లు వినిపిస్తున్న సమయంలో హైకోర్టు ఇచ్చిన తాజా తీర్పు కేసులో కీలక మలుపు తీసుకొచ్చింది. ఈ తీర్పుతో కేసీఆర్ సహా ఇతరులకు తాత్కాలిక ఊరట లభించినప్పటికీ, భవిష్యత్తులో ఈ కేసు ఎలా ముందుకు సాగుతుందన్నది ఆసక్తికరంగా మారింది. తెలంగాణ రాజకీయాల్లో ఈ పరిణామం మరింత చర్చకు దారితీస్తోంది.

ALSO READ: Suicide: కాబోయే భార్యతో వింత ప్రవర్తన.. ఆమె మనస్తాపంతో..