Thiruvarur: లలితా సహస్రనామం పుట్టిన మహిమ గల క్షేత్రం

Thiruvarur: దక్షిణ భారతదేశ ఆధ్యాత్మిక వైభవాన్ని ప్రతిబింబించే పవిత్ర క్షేత్రాల్లో తమిళనాడులోని తిరువారూర్ జిల్లాలో వెలసిన మేఘనాథస్వామి- లలితాంబిక ఆలయం అత్యంత విశిష్ట స్థానం సంపాదించుకుంది. పరమేశ్వరుడు మేఘనాథస్వామిగా, అమ్మవారు లలితాంబికగా భక్తుల పూజలు అందుకుంటున్న ఈ దివ్యక్షేత్రం శక్తి, శివ తత్వాల సమన్వయానికి ప్రతీకగా నిలుస్తోంది. మహాదేవుడు అమ్మవారిని శాంతపరిచిన పవిత్ర స్థలంగా ఈ ఆలయానికి ప్రత్యేక గుర్తింపు ఉంది. లలితా పారాయణం, లలితా సహస్రనామ పఠనం, స్తోత్రాలు ఇక్కడ చేయడం ద్వారా భక్తుల కోరికలు నెరవేరుతాయని విశ్వాసం బలంగా ఉంది. అందుకే ఈ ఆలయాన్ని దివ్యశక్తి క్షేత్రంగా భావిస్తూ దేశం నలుమూలల నుంచి భక్తులు దర్శనానికి తరలివస్తుంటారు.

తిరువారూర్ జిల్లా కేంద్రానికి సుమారు 25 కి.మీ దూరంలో ఉన్న ఈ క్షేత్రం చోళుల యుగానికి చెందిన దాదాపు 1000 సంవత్సరాల ప్రాచీనతను కలిగి ఉందని చరిత్ర చెబుతోంది. చైత్ర మాసానికి సమానమైన తమిళ నెల ‘చితిరై’లో సూర్యకిరణాలు ఆలయంలోకి ప్రవేశించి స్వామి పాదాలను తాకే అద్భుత ఘట్టం భక్తులను విశేషంగా ఆకట్టుకుంటుంది. ముఖ్యంగా ఏప్రిల్ నెలలో ఈ దృశ్యాన్ని తిలకించేందుకు వేలాదిమంది భక్తులు ఆలయానికి చేరుకుంటారు. సూర్యుడు ఇక్కడ తపస్సు చేసి తన తేజస్సును తిరిగి పొందాడనే స్థలపురాణం ఈ క్షేత్ర మహిమను మరింత విశిష్టంగా నిలబెడుతోంది.

శైవ క్షేత్రంగా ప్రసిద్ధి చెందినప్పటికీ, ఇక్కడ లలితాంబికా దేవికి అసాధారణమైన ప్రాధాన్యం ఉంది. అమ్మవారిని సౌందర్య నాయకిగా ఆరాధిస్తారు. అలాగే ఎనిమిది చేతులతో వెలసిన దుర్గాదేవిని “శుక బ్రహ్మ దుర్గ”గా పూజించడం ఈ ఆలయ ప్రత్యేకత. ఆమె చేతిలోని చిలుక శాంతి, జ్ఞానం, దివ్య సందేశానికి ప్రతీకగా భావిస్తారు. నాయనార్లలో ప్రముఖుడైన తిరుజ్ఞాన సంబంధర్ తన పద్యాల్లో ఈ క్షేత్ర మహిమను కొనియాడినట్లు పురాణాల్లో ప్రస్తావన ఉంది. ఇక్కడ 60వ, 80వ శతాబ్దికోత్సవాలు జరుపుకుంటే ఆయురారోగ్యాలు, శుభఫలితాలు లభిస్తాయని భక్తుల విశ్వాసం.

లలితా సహస్రనామంతో ఈ క్షేత్రానికి ఉన్న సంబంధం మరింత ఆధ్యాత్మిక ప్రాధాన్యాన్ని ఇస్తుంది. భండాసురుని సంహరించేందుకు యజ్ఞగుండం నుంచి శ్రీచక్రంపై లలితాంబికా దేవి అవతరించిందని, అనంతరం పరమశివుడి ఆజ్ఞతో ఈ క్షేత్రంలో తపస్సు చేసి శాంతస్వరూపంగా వెలసిందని పురాణాలు చెబుతున్నాయి. వశిన్యాది వాగ్దేవతలు తొలిసారిగా “లలితా సహస్రనామం”ను ఇక్కడే పఠించారనే విశ్వాసం భక్తుల్లో మరింత భక్తి పెంచుతోంది. విష్ణువు అవతారమైన హయగ్రీవుడు అగస్త్య మహర్షికి ఇక్కడే లలితా సహస్రనామ రహస్యాలను ఉపదేశించాడని, అగస్త్యుడు తన భార్య లోపాముద్రతో కలిసి జపం చేయగా అమ్మవారు ప్రత్యక్షమై అనుగ్రహించిందనే కథనం ఈ క్షేత్ర పవిత్రతను చాటుతోంది.

ఈ ఆలయంలో సమర్పించే అన్నప్రసాదానికి ప్రత్యేకమైన మహిమ ఉందని భక్తులు విశ్వసిస్తారు. స్వామి పాదాల ముందు ఉంచిన తర్వాత ఇచ్చే ఈ ప్రసాదం ఆరోగ్యానికి మేలు చేస్తుందని చెబుతారు. గర్భగుడి బయట ఎడమవైపున ఉన్న శ్రీచక్ర స్తంభం ఈ క్షేత్రంలో మరో ప్రధాన ఆకర్షణ. అక్కడ కూర్చుని లలితా సహస్రనామం ఒక్కసారి జపిస్తే కోటి సార్లు జపించిన ఫలితం లభిస్తుందని విశ్వాసం ఉంది. సమీప రైల్వే స్టేషన్ పేరళం కాగా చెన్నై–కరైకాల్ మార్గంలోని రైళ్ల ద్వారా సులభంగా చేరుకోవచ్చు. అక్కడి నుంచి రోడ్డు మార్గంలో ఆలయానికి చేరుకునే సౌకర్యం ఉంది. లలితా సహస్రనామ పారాయణం చేసే ప్రతి భక్తుడు జీవితంలో కనీసం ఒక్కసారైనా దర్శించాల్సిన దివ్యక్షేత్రంగా తిరుమీయచూర్ ఖ్యాతి పొందింది.

NOTE: పైన తెలిపిన సమాచారం కేవలం అవగాహన కోసం మాత్రమే తెలియజేశాము. నమ్మడం, నమ్మకపోవడం మీ వ్యక్తిగత విషయం. స్టార్ త్రినేత్రం దీనిని అధికారికంగా ధృవీకరించట్లేదు.

ALSO READ: Allahabad: డబ్బు కోసం వివాహ బంధం నవ్వులపాలు