Telangana: వినూత్న ఆలోచన.. బంకుల్లో దర్శనమిస్తున్న కూలర్స్

Telangana: ఉమ్మడి ఆదిలాబాద్ జిల్లాలో ఎండలు ఉగ్రరూపం దాల్చడంతో ప్రజలు తీవ్ర ఇబ్బందులు ఎదుర్కొంటున్నారు. భానుడి భగభగలతో రికార్డు స్థాయిలో ఉష్ణోగ్రతలు నమోదవుతుండగా, బయటకు అడుగుపెడితే నిప్పుల కుంపటిలో ఉన్నట్టుగా అనిపించే పరిస్థితి నెలకొంది. ఒకవైపు మండుతున్న ఎండ, మరోవైపు వడగాలుల తీవ్రత ప్రజలను భయాందోళనలకు గురిచేస్తోంది. ముఖ్యంగా ఉమ్మడి ఆదిలాబాద్ పరిధిలోని నాలుగు జిల్లాల్లో రాష్ట్రంలోనే అత్యధిక ఉష్ణోగ్రతలు నమోదవుతుండటం ఆందోళన కలిగిస్తోంది. ఈ తీవ్ర వేడి ప్రభావంతో రోడ్లపై ప్రయాణిస్తున్న ఎలక్ట్రిక్ వాహనాలు పేలిపోతున్న ఘటనలు వెలుగులోకి వస్తుండగా, కొన్నిచోట్ల పెట్రోల్ వాహనాలు కూడా అగ్నిప్రమాదాలకు గురవుతున్నాయి. ఈ పరిణామాలు ప్రజల్లో భయాన్ని మరింత పెంచుతున్నాయి.

ఈ ప్రమాదాలను దృష్టిలో ఉంచుకుని నిర్మల్ జిల్లాలోని పెట్రోల్ బంక్ యజమానులు అప్రమత్తమయ్యారు. ఎండ తీవ్రత వల్ల అగ్నిప్రమాదాలు జరగకుండా ముందస్తు జాగ్రత్తలు తీసుకుంటూ వినూత్న చర్యలకు దిగుతున్నారు. బంక్‌లలో పెట్రోల్, డీజిల్ మిషన్లు వేడెక్కకుండా ఉండేందుకు కూలర్లను ఏర్పాటు చేస్తున్నారు. అంతేకాకుండా, బంక్ వద్దకు వచ్చే వాహనదారులు కాసేపు విశ్రాంతి తీసుకునేలా ప్రత్యేక సదుపాయాలు కల్పిస్తున్నారు. దీంతో ఒకవైపు భద్రతను పెంచుతూ, మరోవైపు ప్రజలకు ఉపశమనం కలిగించే ప్రయత్నం చేస్తున్నారు.

నిర్మల్ జిల్లా సారంగాపూర్ మండలం చించోలి బి గ్రామంలో ఉన్న ఓ ప్రైవేట్ పెట్రోల్ ఫిల్లింగ్ స్టేషన్‌లో ఈ చర్యలు ప్రత్యేకంగా కనిపిస్తున్నాయి. పెట్రోల్ పోసే యంత్రాలు ఎండ ప్రభావంతో వేడెక్కుతున్న నేపథ్యంలో, వాటిని చల్లబరచడానికి ప్రత్యేకంగా కూలర్లను అమర్చారు. యంత్రాల ప్యానెల్‌లను తెరిచి వాటి సమీపంలో కూలర్లను ఏర్పాటు చేయడం ద్వారా వేడి తగ్గించే ప్రయత్నం చేస్తున్నారు. ఇలా చేయడం వల్ల యంత్రాలు దెబ్బతినకుండా ఉండటమే కాకుండా, ఎలాంటి ప్రమాదాలు జరగకుండా నివారించవచ్చని నిర్వాహకులు భావిస్తున్నారు.

ఈ విధానం ఒక్క చించోలి బి గ్రామానికే పరిమితం కాకుండా నిర్మల్ రూరల్ మండలం, లక్ణ్మణచందా, దిల్వార్ పూర్ ప్రాంతాల్లోని పెట్రోల్ బంక్‌లలో కూడా అమలవుతోంది. పెట్రోల్, డీజిల్ యంత్రాల వద్ద కూలర్లు ఏర్పాటు చేసి వాటిని చల్లగా ఉంచే ప్రయత్నం చేస్తున్నారు. ఇలా జాగ్రత్తలు తీసుకోకపోతే పెద్ద ప్రమాదాలు సంభవించే అవకాశం ఉందని బంక్ యజమానులు చెబుతున్నారు. ఇదిలా ఉంటే, పెట్రోల్ కోసం వచ్చే వాహనదారులు కూడా ఈ చల్లదనాన్ని ఆస్వాదిస్తూ కాసేపు బంక్ వద్ద విశ్రాంతి తీసుకుంటున్నారు. ఈ వినూత్న చర్యలను చూసి నిర్వాహకులను అభినందిస్తున్నారు.

మొత్తంగా చూస్తే, పెరుగుతున్న ఎండల ప్రభావం కేవలం ప్రజలపై మాత్రమే కాకుండా వాహనాలు, యంత్రాలపై కూడా తీవ్ర ప్రభావం చూపుతున్నది. ఈ నేపథ్యంలో నిర్మల్ జిల్లాలో పెట్రోల్ బంక్ యజమానులు తీసుకున్న ఈ ముందస్తు చర్యలు ప్రమాదాలను తగ్గించడంలో కీలకంగా మారాయి.

ALSO READ: Indian Railways: ఈ ట్రైన్‌ ప్రత్యేకతలు తెలుసా?.. 3 గంటల ప్రయాణం కేవలం 55 నిమిషాల్లోనే..