Interesting Fact: నిందితుల ముఖానికి పోలీసులు ముసుగు ఎందుకు వేస్తారు..?

Interesting Fact: పోలీసులు నిందితులను అరెస్ట్ చేసిన తర్వాత వారి ముఖాలను గుడ్డ లేదా ముసుగుతో కప్పి మీడియా ముందుకు తీసుకురావడం తరచూ కనిపించే దృశ్యమే. అయితే దీనికి వెనుక చట్టపరమైన, మానవ హక్కులకు సంబంధించిన ముఖ్యమైన కారణం ఉంది. ఎవరైనా వ్యక్తిని పోలీసులు అరెస్ట్ చేశారంటే అతడు నేరం చేసినట్లు తుది నిర్ణయం అయిపోయిందని అర్థం కాదు. విచారణ పూర్తై, కోర్టులో నేరం రుజువై శిక్ష పడే వరకు చట్టం దృష్టిలో ప్రతి ఒక్కరూ నిర్దోషులుగానే పరిగణించబడతారు. ఈ నేపథ్యంలో నిందితుడి ముఖాన్ని బహిరంగంగా చూపించడం వల్ల అతని వ్యక్తిగత గౌరవానికి భంగం కలిగే అవకాశం ఉంటుంది. ఒకవేళ విచారణ అనంతరం అతడు నిర్దోషిగా తేలితే సమాజంలో అతని ప్రతిష్ట దెబ్బతినడంతో పాటు జీవితాంతం ఆ ముద్ర నుంచి బయటపడటం కష్టమవుతుంది. అందుకే కోర్టు తుది తీర్పు వచ్చే వరకు వారి గుర్తింపు బయటపడకుండా పోలీసులు ముఖాన్ని వస్త్రం లేదా ముసుగుతో కప్పి ఉంచుతారు.

అయితే కేసు విచారణలో భాగంగా ప్రజలకు సమాచారం అందించడం కూడా పోలీసుల బాధ్యత కావడంతో నిందితులను మీడియా ఎదుట ప్రవేశపెడతారు. కానీ వారి ముఖం స్పష్టంగా కనిపించకుండా జాగ్రత్తలు తీసుకుంటారు. ఇది కేవలం నిందితుల గౌరవాన్ని కాపాడటానికే కాకుండా న్యాయ ప్రక్రియపై ఎలాంటి ప్రభావం పడకుండా చూడడానికీ ఉపయోగపడుతుంది. న్యాయస్థానం నేరాన్ని రుజువు చేసి శిక్ష విధించే వరకు ఎవరినీ నేరస్థుడిగా పరిగణించకూడదనే చట్టసూత్రాన్ని అమలు చేసే ప్రక్రియలో భాగంగానే ఈ విధానం కొనసాగుతోంది. అందుకే పోలీసులు అరెస్ట్ చేసిన వ్యక్తుల ముఖాలను ముసుగుతో కప్పి మీడియా ముందుకు తీసుకురావడం వెనుక ఇదే ప్రధాన కారణం.