Finance: గృహ రుణాలపై వడ్డీ రేట్లు స్థిరం.. ఏ బ్యాంకులో లోన్ చౌకగా లభిస్తుందంటే?

Finance: సొంత ఇల్లు ప్రతి కుటుంబం కల. అయితే రోజురోజుకూ పెరుగుతున్న రియల్ ఎస్టేట్ ధరల కారణంగా ఒకేసారి భారీ మొత్తాన్ని చెల్లించి ఇల్లు కొనుగోలు చేయడం చాలా మందికి సాధ్యం కావడం లేదు. ఈ నేపథ్యంలో గృహ రుణాలు మధ్యతరగతి కుటుంబాలకు ప్రధాన ఆధారంగా మారాయి. తాజాగా ఇల్లు కొనుగోలు చేయాలని భావిస్తున్న వారికి ఊరటనిచ్చే పరిణామం చోటుచేసుకుంది.

దేశ కేంద్ర బ్యాంకు అయిన రిజర్వ్ బ్యాంక్ ఆఫ్ ఇండియా తన తాజా ద్రవ్య విధాన సమీక్షలో రెపో రేటును 5.25 శాతం వద్ద యథాతథంగా కొనసాగించాలని నిర్ణయించింది. ఈ నిర్ణయంతో గృహ రుణాలపై వడ్డీ రేట్లు ప్రస్తుతం స్థిరంగా కొనసాగే అవకాశం ఏర్పడింది. రెపో రేటు పెరిగితే బ్యాంకులకు నిధుల వ్యయం పెరిగి, ఆ భారం వినియోగదారులపై పడే అవకాశం ఉంటుంది. కానీ ప్రస్తుతం రేట్లు మారకుండా ఉండటంతో కొత్తగా రుణాలు తీసుకునే వారికి కొంత ఉపశమనం లభించింది.

ప్రస్తుతం గృహ రుణాల విషయంలో ప్రభుత్వ రంగ బ్యాంకులు ప్రైవేట్ బ్యాంకులకు గట్టి పోటీ ఇస్తున్నాయి. ముఖ్యంగా తక్కువ వడ్డీ రేట్లతో వినియోగదారులను ఆకర్షిస్తున్నాయి. సెంట్రల్ బ్యాంక్ ఆఫ్ ఇండియా, బ్యాంక్ ఆఫ్ ఇండియా రెండూ 7.10 శాతం ప్రారంభ వడ్డీ రేటుతో గృహ రుణాలు అందిస్తున్నట్లు సమాచారం. అలాగే ఇండియన్ ఓవర్సీస్ బ్యాంక్ కూడా ఉద్యోగస్తులకు ఇదే స్థాయి వడ్డీ రేటుతో రుణాలు అందిస్తోంది.

ఇక యూనియన్ బ్యాంక్ ఆఫ్ ఇండియా వద్ద వడ్డీ రేట్లు 7.15 శాతం నుంచి ప్రారంభమవుతుండగా, బ్యాంక్ ఆఫ్ బరోడా 7.20 శాతం నుంచి గృహ రుణాలు అందిస్తోంది. దేశంలోనే అతిపెద్ద ప్రభుత్వ రంగ బ్యాంకు అయిన స్టేట్ బ్యాంక్ ఆఫ్ ఇండియా మరియు కెనరా బ్యాంక్‌ 7.25 శాతం ప్రారంభ వడ్డీ రేట్లతో హోమ్ లోన్లు ఇస్తున్నాయి.

ప్రైవేట్ బ్యాంకుల విషయానికి వస్తే, వడ్డీ రేట్లు కొద్దిగా ఎక్కువగా ఉన్నప్పటికీ, వేగవంతమైన సేవలు మరియు డిజిటల్ సౌకర్యాల కారణంగా చాలా మంది వీటిని ఎంచుకుంటున్నారు. ఐసిఐసిఐ బ్యాంక్ 7.50 శాతం ప్రారంభ వడ్డీ రేటును అందిస్తుండగా, కోటక్ మహీంద్రా బ్యాంక్ 7.60 శాతం నుంచి రుణాలు ఇస్తోంది. హెచ్‌డిఎఫ్‌సి బ్యాంక్ వద్ద గృహ రుణాల వడ్డీ రేట్లు 7.75 శాతం నుంచి ప్రారంభమవుతున్నాయి. యాక్సిస్ బ్యాంక్వడ్డీ రేట్లు 8 శాతం నుంచి మొదలై కస్టమర్ అర్హతలను బట్టి మరింత పెరిగే అవకాశం ఉంది.

అయితే బ్యాంకును ఎంపిక చేసుకునేటప్పుడు కేవలం వడ్డీ రేటును మాత్రమే చూడకూడదని ఆర్థిక నిపుణులు సూచిస్తున్నారు. ప్రాసెసింగ్ ఫీజు, ముందస్తు చెల్లింపు ఛార్జీలు, రుణ కాలపరిమితి, ఇతర సేవా రుసుములు వంటి అంశాలు కూడా మొత్తం రుణ వ్యయాన్ని ప్రభావితం చేస్తాయి. కొన్నిసార్లు స్వల్పంగా ఎక్కువ వడ్డీ రేటు ఉన్న బ్యాంకు కూడా తక్కువ అదనపు ఛార్జీలతో వినియోగదారుడికి ఎక్కువ ప్రయోజనం కలిగించవచ్చు.

అలాగే తక్కువ వడ్డీ రేటుతో రుణం పొందాలంటే మంచి క్రెడిట్ హిస్టరీ తప్పనిసరి. సాధారణంగా 750 లేదా అంతకంటే ఎక్కువ సిబిల్ స్కోర్ ఉన్న వారికి బ్యాంకులు అత్యంత తక్కువ వడ్డీ రేట్లను అందించే అవకాశం ఉంటుంది. కాబట్టి గృహ రుణం కోసం దరఖాస్తు చేసుకునే ముందు మీ క్రెడిట్ స్కోర్‌ను పరిశీలించడం మంచిది.

ALSO READ:Adilabad: తెలంగాణ ఏవియేషన్ హబ్‌గా ఎదుగుతుందా?.. ఆదిలాబాద్‌కు వాయుసేన శిక్షణ కేంద్రం?