Telangana: టీ20 లీగ్ వేలంలో స్టార్ ఆటగాళ్ల హవా.. రూ.33 లక్షల రికార్డు ధరకు తిలక్ వర్మ

Telangana: తెలంగాణ క్రికెట్ అసోసియేషన్ ప్రతిష్టాత్మకంగా నిర్వహిస్తున్న తొలి ‘తెలంగాణ టీ20 లీగ్’ ఆటగాళ్ల వేలం రామోజీ ఫిల్మ్ సిటీలో ఘనంగా జరిగింది. ప్రముఖ అంతర్జాతీయ క్రికెట్ వ్యాఖ్యాత చారు శర్మ ఆధ్వర్యంలో నిర్వహించిన ఈ వేలం ప్రక్రియలో తెలంగాణకు చెందిన స్టార్ క్రికెటర్లు తిలక్ వర్మ, మహ్మద్ సిరాజ్ ప్రధాన ఆకర్షణగా నిలిచారు. తెలంగాణ క్రికెట్ ప్రతిభకు వేదికగా నిలవనున్న ఈ లీగ్‌లో 8 ఫ్రాంచైజీలు తమ జట్లను నిర్మించుకునేందుకు పోటీపడ్డాయి. ఈ వేలానికి ముందు నుంచే తిలక్ వర్మ, మహ్మద్ సిరాజ్‌లపై భారీ ఆసక్తి నెలకొంది.

వేలంలో అత్యధిక ధర పలికిన ఆటగాడిగా తిలక్ వర్మ నిలిచాడు. రూ.5 లక్షల కనీస ధరతో వేలంలోకి వచ్చిన ఈ స్టార్ బ్యాటర్ కోసం పలు జట్లు తీవ్రంగా పోటీ పడ్డాయి. చివరకు మెదక్ ఫాల్కన్స్ జట్టు రూ.33 లక్షల భారీ మొత్తానికి ఆయనను తమ జట్టులోకి తీసుకుంది. వేలం మొత్తం సందర్భంగా ఇదే అత్యధిక బిడ్‌గా నిలవడం విశేషం. మరోవైపు భారత జట్టు ప్రధాన పేసర్ మహ్మద్ సిరాజ్ కోసం కూడా జట్ల మధ్య పోటీ నెలకొనగా, వరంగల్ వారియర్స్ జట్టు రూ.14 లక్షలకు ఆయనను దక్కించుకుంది.

‘ఏ ప్లస్’ విభాగంలో కూడా పలువురు స్థానిక స్టార్ ఆటగాళ్లకు భారీ ధరలు లభించాయి. సీవీ మిలింద్‌ను అన్విత ఖమ్మం ఏసెస్ జట్టు రూ.17 లక్షలకు సొంతం చేసుకోగా, రవికిరణ్‌ను పాలమూరు స్ట్రైకర్స్ రూ.13 లక్షలకు కొనుగోలు చేసింది. రవితేజను మెదక్ ఫాల్కన్స్ రూ.12 లక్షలకు తీసుకోగా, తనయ్ త్యాగరాజన్‌ను రంగారెడ్డి రైజర్స్ రూ.11 లక్షలకు దక్కించుకుంది. తన్మయ్ అగర్వాల్‌ను కరీంనగర్ డైమండ్స్ రూ.8 లక్షలకు, రాహుల్ బుద్ధిని అనురాగ్ నల్గొండ నైట్స్ రూ.8 లక్షలకు, రోహిత్ రాయుడును పాలమూరు స్ట్రైకర్స్ రూ.6.5 లక్షలకు కొనుగోలు చేశాయి.

తెలంగాణ క్రికెట్‌కు కొత్త ఊపునివ్వాలనే లక్ష్యంతో ప్రారంభమైన ఈ లీగ్‌లో మొత్తం 8 జట్లు బరిలోకి దిగుతున్నాయి. హైదరాబాద్ ఈ ఛాంపియన్స్, ప్రణవ రంగారెడ్డి రైజర్స్, వరంగల్ వారియర్స్, మెదక్ ఫాల్కన్స్, అనురాగ్ నల్గొండ నైట్స్, కరీంనగర్ డైమండ్స్, పాలమూరు స్ట్రైకర్స్, అన్విత ఖమ్మం ఏసెస్ జట్లు ఈ సీజన్‌లో పోటీ పడనున్నాయి. తెలంగాణలోని యువ క్రికెటర్లకు పెద్ద వేదికగా ఈ లీగ్ నిలుస్తుందని నిర్వాహకులు భావిస్తున్నారు. 1,300 మందికి పైగా నమోదైన క్రికెటర్లు వేలంలో పాల్గొనడం ఈ టోర్నీపై ఉన్న ఆసక్తికి నిదర్శనంగా నిలిచింది.

తొలి సీజన్ నుంచే భారీ స్పందన లభిస్తున్న ఈ లీగ్, భవిష్యత్తులో తెలంగాణ క్రికెట్ అభివృద్ధికి కీలక వేదికగా మారే అవకాశాలు కనిపిస్తున్నాయి. అంతర్జాతీయ స్థాయికి ఎదగాలనుకునే యువ ఆటగాళ్లకు ఈ టోర్నీ మంచి అవకాశాలను కల్పించనుండగా, అభిమానులు కూడా రాష్ట్ర స్థాయి ఫ్రాంచైజీ క్రికెట్‌ను ఆస్వాదించేందుకు సిద్ధమవుతున్నారు.

ALSO READ: Scientist Jobs: డీఆర్డీవోలో ఉద్యోగాల జాతర.. రూ.1.23 లక్షల వరకూ జీతం