Hero Akshay Kumar: నా కూతురిని నగ్న ఫోటోలు పంపమని అడిగాడు

Hero Akshay Kumar: బాలీవుడ్ ప్రముఖ నటుడు అక్షయ్ కుమార్ కుమార్తె నితారా కుమార్‌ను ఆన్‌లైన్‌లో వేధించిన కేసులో మహారాష్ట్ర సైబర్ పోలీసులు కీలక ముందడుగు వేశారు. చిన్నారులను లక్ష్యంగా చేసుకుని డిజిటల్ వేదికల్లో పెరుగుతున్న ముప్పులపై ఆందోళనలు వ్యక్తమవుతున్న సమయంలో ఈ కేసులో నిందితుడి అరెస్ట్ ప్రాధాన్యత సంతరించుకుంది. మహారాష్ట్ర సైబర్ విభాగం లోతైన దర్యాప్తు అనంతరం నిందితుడిని అదుపులోకి తీసుకున్నట్లు అదనపు డైరెక్టర్ జనరల్ ఆఫ్ పోలీస్ యశస్వి యాదవ్ వెల్లడించారు. ఈ పరిణామం దేశవ్యాప్తంగా ఆన్‌లైన్ భద్రత, ముఖ్యంగా చిన్నారుల డిజిటల్ రక్షణపై మళ్లీ చర్చకు దారితీసింది.

గత ఏడాది అక్టోబర్‌లో ముంబైలో నిర్వహించిన ‘సైబర్ అవేర్‌నెస్ మంత్ 2025’ కార్యక్రమంలో అక్షయ్ కుమార్ ఈ ఘటనను బహిరంగంగా ప్రస్తావించి సంచలనం రేపారు. తన 13 ఏళ్ల కుమార్తె వీడియో గేమ్ ఆడుతున్న సమయంలో గుర్తు తెలియని వ్యక్తి మెసేజ్‌లు పంపుతూ వేధింపులకు పాల్పడినట్లు ఆయన వెల్లడించారు. అసభ్యకరంగా మాట్లాడటంతో పాటు ఫోటోలు పంపాలని డిమాండ్ చేయడం ఆందోళన కలిగించే అంశంగా మారింది. అయితే ఈ పరిస్థితిలో నితారా చూపిన అప్రమత్తత, ధైర్యం ప్రశంసలు అందుకుంటోంది. గేమ్‌ను వెంటనే ఆపివేసి, జరిగిన విషయాన్ని తన తల్లికి చెప్పడంతో పరిస్థితి మరింత ప్రమాదకరంగా మారకుండా నివారించగలిగారు.

ఈ సమాచారం అందుకున్న వెంటనే అక్షయ్ కుమార్ సైబర్ పోలీసులను ఆశ్రయించడంతో కేసు దర్యాప్తు వేగం అందుకుంది. డిజిటల్ ఆధారాలు, ఆన్‌లైన్ ట్రాకింగ్, సాంకేతిక విశ్లేషణ ఆధారంగా నిందితుడిని గుర్తించిన అధికారులు చివరికి అరెస్ట్ చేశారు. చిన్నారి ధైర్యం, తల్లిదండ్రుల అప్రమత్తత, సైబర్ పోలీసుల వేగవంతమైన చర్యల వల్లే ఈ కేసు ఛేదన సాధ్యమైందని అధికారులు పేర్కొన్నారు. ముఖ్యంగా పిల్లలు ఆన్‌లైన్ గేమింగ్ వేదికల్లో ఎదుర్కొనే ముప్పులపై తల్లిదండ్రులు మరింత జాగ్రత్తగా ఉండాల్సిన అవసరాన్ని ఈ ఘటన మళ్లీ గుర్తు చేసింది.

ఈ ఘటనపై స్పందించిన అక్షయ్ కుమార్ కేవలం తన కుటుంబానికే పరిమితం కాకుండా సమాజ స్థాయిలో పరిష్కారాలు అవసరమని అభిప్రాయపడ్డారు. పాఠశాల స్థాయిలోనే సైబర్ భద్రతపై అవగాహన పెంచాలని కోరుతూ 7 నుంచి 10వ తరగతి విద్యార్థులకు వారానికి ఒకసారి ‘సైబర్ అవేర్‌నెస్ పీరియడ్’ తప్పనిసరిగా నిర్వహించాలని మహారాష్ట్ర ప్రభుత్వాన్ని విజ్ఞప్తి చేశారు. చిన్నారులు డిజిటల్ ప్రపంచంలో సురక్షితంగా ఉండాలంటే అవగాహన, పర్యవేక్షణ, సాంకేతిక రక్షణ సమానంగా అవసరమని ఈ ఘటన మరోసారి స్పష్టం చేసింది.

ALSO READ: Okra Water: ఈ నీటితో లెక్కలేనన్ని లాభాలు