PAN Update: పాన్ కార్డులో ఫోటో మార్చకోవడం ఎలా..?

PAN Update: ఆధార్ కార్డు తర్వాత దేశంలో అత్యంత కీలకమైన గుర్తింపు పత్రాల్లో పాన్ కార్డు ఒకటి. ప్రస్తుతం బ్యాంకు ఖాతాలు తెరవడం నుంచి ఆదాయపు పన్ను రిటర్నులు దాఖలు చేయడం వరకు అనేక ఆర్థిక కార్యకలాపాలకు పాన్ కార్డు తప్పనిసరిగా మారింది. పెట్టుబడులు పెట్టడం, స్థిరాస్తుల కొనుగోలు, అమ్మకాలు, భారీ మొత్తాల ఆర్థిక లావాదేవీలు నిర్వహించడం వంటి సందర్భాల్లో కూడా పాన్ కార్డు కీలక పాత్ర పోషిస్తుంది. అందుకే ఇందులోని వివరాలు ఎప్పటికప్పుడు సరిగ్గా ఉండేలా చూసుకోవడం చాలా అవసరం.

పాన్ కార్డులో పేరు, పుట్టిన తేదీ, తండ్రి పేరు వంటి వివరాలతో పాటు ఫొటో కూడా ఉంటుంది. అయితే చాలా మంది పాన్ కార్డును చిన్న వయసులో తీసుకుంటారు. కాలక్రమేణా వారి రూపంలో మార్పులు రావడం సహజం. దీంతో పాన్ కార్డుపై ఉన్న పాత ఫొటో ప్రస్తుత రూపానికి సరిపోకపోవచ్చు. కొన్ని సందర్భాల్లో గుర్తింపు ధృవీకరణ సమయంలో ఇబ్బందులు ఎదురయ్యే అవకాశం ఉంటుంది. అందువల్ల అవసరమైతే పాన్ కార్డులోని ఫొటోను కూడా సులభంగా అప్‌డేట్ చేసుకోవచ్చు.

ఆదాయపు పన్ను శాఖ అందిస్తున్న ఆన్‌లైన్ సేవల ద్వారా పాన్ కార్డులోని ఫొటోను మార్చుకునే అవకాశం ఉంది. ఇందుకోసం ముందుగా పాన్ సేవలకు సంబంధించిన అధికారిక వెబ్‌సైట్‌లోకి వెళ్లాలి. అక్కడ పాన్ వివరాల సవరణకు సంబంధించిన దరఖాస్తును ఎంపిక చేసుకోవాలి. అనంతరం పేరు, చిరునామా, మొబైల్ నంబర్, ఆధార్ నంబర్ వంటి అవసరమైన వివరాలను నమోదు చేయాలి. ఆ తర్వాత క్యాప్చా కోడ్‌ను నమోదు చేసి దరఖాస్తును సమర్పించాలి.

దరఖాస్తు ప్రక్రియలో భాగంగా కేవైసీ ధృవీకరణను పూర్తి చేయాల్సి ఉంటుంది. అనంతరం ఫొటో మార్పు ఎంపికను ఎంచుకుని తాజా ఫొటోతో పాటు అవసరమైన గుర్తింపు పత్రాలను అప్‌లోడ్ చేయాలి. తర్వాత డిక్లరేషన్‌ను ఆమోదించి దరఖాస్తును పూర్తి చేయాలి. ఈ సేవ కోసం రూ.101 రుసుము చెల్లించాల్సి ఉంటుంది. నెట్ బ్యాంకింగ్, డెబిట్ కార్డు లేదా క్రెడిట్ కార్డు ద్వారా చెల్లింపు చేయవచ్చు.

చెల్లింపు పూర్తయిన తర్వాత 15 అంకెల రిజిస్ట్రేషన్ నంబర్ జారీ అవుతుంది. ఈ నంబర్ ద్వారా దరఖాస్తు స్థితిని తెలుసుకోవచ్చు. సంబంధిత ప్రక్రియ పూర్తైన తర్వాత పాన్ కార్డులోని ఫొటో అప్‌డేట్ అవుతుంది. దీంతో భవిష్యత్తులో గుర్తింపు ధృవీకరణ సమయంలో ఎలాంటి ఇబ్బందులు ఎదురుకావు.

పాన్ కార్డులో ఫొటో మాత్రమే కాకుండా పేరు, పుట్టిన తేదీ, చిరునామా వంటి వివరాల్లో పొరపాట్లు ఉన్నా వెంటనే సరిచేసుకోవడం మంచిది. ఎందుకంటే పాన్ కార్డు ప్రస్తుతం దేశంలోని ప్రధాన ఆర్థిక పత్రాల్లో ఒకటిగా మారింది. ఇందులోని సమాచారం సరిగ్గా లేకపోతే బ్యాంకింగ్ సేవలు, పెట్టుబడులు, ఆదాయపు పన్ను వ్యవహారాలు, ఇతర ఆర్థిక లావాదేవీలలో సమస్యలు తలెత్తే అవకాశం ఉంటుంది. అందుకే పాన్ కార్డులోని వివరాలను తరచూ పరిశీలిస్తూ అవసరమైన మార్పులు చేసుకోవాలని నిపుణులు సూచిస్తున్నారు.

ALSO READ: Education: విద్యార్థులకు కీలక అప్‌డేట్.. సీబీఎస్ఈ 10వ తరగతి సెకండ్‌ బోర్డు ఫలితాలు వచ్చేస్తున్నాయ్..