America- Iran: హర్మూజ్ జలసంధిలో అమెరికా బలగాల విధ్వంసం!

America- Iran: అమెరికా- ఇరాన్ మధ్య అధికారికంగా కాల్పుల విరమణ అమల్లో ఉన్నప్పటికీ, రెండు దేశాల మధ్య నెలకొన్న ఉద్రిక్త పరిస్థితులు ఇంకా పూర్తిగా తగ్గుముఖం పట్టలేదు. ఒకవైపు శాంతి చర్చలు కొనసాగుతున్నాయని చెబుతుండగా, మరోవైపు వ్యూహాత్మకంగా కీలక ప్రాంతాల్లో సైనిక కదలికలు, పరస్పర ఆరోపణలు కొనసాగుతుండటం ప్రపంచవ్యాప్తంగా ఆందోళనలకు కారణమవుతోంది. తాజాగా సోమవారం మే 25న చోటుచేసుకున్న పరిణామాలు ఈ ఉద్రిక్తతలకు మరింత బలం చేకూర్చాయి. దక్షిణ ఇరాన్ పరిధిలోని హోర్ముజ్ జలసంధి పరిసర ప్రాంతాల్లో అమెరికా సైన్యం లక్ష్యిత దాడులు నిర్వహించినట్లు సమాచారం వెలుగులోకి వచ్చింది. ఈ దాడుల్లో ఇరాన్‌కు చెందిన క్షిపణి ప్రయోగ కేంద్రాలు, సముద్ర కార్యకలాపాలకు సంబంధించిన సైనిక వనరులు ప్రధాన లక్ష్యాలుగా నిలిచినట్లు తెలుస్తోంది.

ఈ పరిణామాలపై అమెరికా సెంట్రల్ కమాండ్ ప్రతినిధి తిమోతి హాకిన్స్ స్పందిస్తూ కీలక వ్యాఖ్యలు చేశారు. ఈ చర్య దాడి కాదని, పూర్తిగా ఆత్మరక్షణ చర్యగా చేపట్టిన ఆపరేషన్ అని ఆయన స్పష్టం చేశారు. దక్షిణ ఇరాన్ ప్రాంతాల్లో ఉన్న ఇరాన్ సైనిక కదలికల వల్ల అమెరికా దళాలకు ముప్పు పెరిగిందని, అందుకే ముందస్తు చర్యలు తీసుకోవాల్సి వచ్చిందని వివరించారు. అమెరికా నౌకాదళాన్ని లక్ష్యంగా చేసుకుని క్షిపణి వ్యవస్థలను సిద్ధం చేసిన ప్రాంతాలను గుర్తించి వాటిపై దాడులు చేసినట్లు తెలిపారు. అలాగే సముద్ర మార్గాల్లో మందుపాతరలు అమర్చేందుకు ప్రయత్నిస్తున్న ఇరాన్ నౌకలపై కూడా చర్యలు తీసుకున్నట్లు వెల్లడించారు. కాల్పుల విరమణ అమల్లో ఉన్నా, తమ సైనికుల భద్రత విషయంలో ఎలాంటి రాజీ ఉండదనే సందేశాన్ని అమెరికా స్పష్టంగా పంపించింది.

అమెరికా- ఇరాన్ మధ్య ఉద్రిక్తతలు కొత్తవి కావు. కాల్పుల విరమణ ఒప్పందం అమల్లోకి వచ్చిన తరువాత కూడా పలు సందర్భాల్లో పరస్పర ఆరోపణలు, ఉద్రిక్త ఘటనలు నమోదయ్యాయి. ముఖ్యంగా మే నెల ప్రారంభంలో హోర్ముజ్ జలసంధి గుండా ప్రయాణిస్తున్న అమెరికా యుద్ధనౌకలపై ఇరాన్ బలగాలు ఎలాంటి హెచ్చరిక లేకుండానే క్షిపణులు, డ్రోన్లు, చిన్న పడవలతో దాడులు చేశాయని అమెరికా ఆరోపించింది. ఈ ఘటనల అనంతరం అమెరికా అధ్యక్షుడు డొనాల్డ్ ట్రంప్ ప్రతిస్పందిస్తూ, అవసరమైతే ఇరాన్ సైనిక స్థావరాలపై ప్రత్యక్ష చర్యలు తీసుకునేందుకు సైన్యానికి పూర్తి స్వేచ్ఛ ఇచ్చినట్లు ప్రకటించారు.

ఇక ఈ సైనిక ఉద్రిక్తతలతో పాటు అణు కార్యక్రమం అంశం కూడా మరోసారి ప్రధాన చర్చగా మారింది. ఇరాన్ తన వద్ద ఉన్న అత్యంత సుసంపన్నమైన యురేనియం నిల్వలను వెంటనే వదులుకోవాలని అమెరికా అధ్యక్షుడు డొనాల్డ్ ట్రంప్ హెచ్చరించారు. దాదాపు 1,000 పౌండ్లు అంటే సుమారు 453 కిలోగ్రాముల సుసంపన్నమైన యురేనియంను అమెరికాకు అప్పగించాలన్నా లేదా పూర్తిగా నిర్వీర్యం చేయాలన్నా నిర్ణయం తీసుకోవాలని సూచించారు. ఈ ప్రక్రియ అంతర్జాతీయ అణుశక్తి కమిషన్ లేదా మరో నిష్పాక్షిక అంతర్జాతీయ సంస్థ పర్యవేక్షణలో జరగాలని ఆయన తన ట్రూత్ సోషల్ ఖాతా ద్వారా వెల్లడించారు. ఇదే సమయంలో అమెరికా అధికారులు ఇరాన్ విషయంలో కఠిన ఆర్థిక విధానాన్ని కొనసాగిస్తున్నారు. ఇరాన్ వద్ద ఉన్న సుసంపన్నమైన యురేనియం పూర్తిగా తొలగించబడే వరకు ఆ దేశానికి ఎలాంటి ఆర్థిక సడలింపులు, ఒప్పంద ప్రయోజనాలు లేదా ఉపశమన చర్యలు ఉండవని స్పష్టం చేశారు.

ఒకవైపు దౌత్యపరమైన చర్చలు కొనసాగుతున్నా.. మరోవైపు సైనిక చర్యలు, అణు అంశాలపై కఠిన షరతులు కొనసాగుతుండటంతో అమెరికా- ఇరాన్ సంబంధాలు త్వరలో సాధారణ స్థితికి చేరుకుంటాయనే అంచనాలు ప్రస్తుతం కనిపించడం లేదు. ప్రాంతీయ భద్రత, అంతర్జాతీయ వాణిజ్య మార్గాలు, ఇంధన సరఫరాలపై ఈ పరిణామాల ప్రభావం ఎలా ఉంటుందన్న అంశం ఇప్పుడు ప్రపంచ దేశాల దృష్టిని ఆకర్షిస్తోంది.

ALSO READ: Snakes Mystery: నిజంగానే మనుషులుగా మారే పాములు ఉన్నాయా..?