Indian Space Academy Internship: విద్యార్థులకు సమ్మర్ ట్రైనింగ్.. అంతరిక్ష శిక్షణకు ఇండియన్ స్పేస్ అకాడమీ అవకాశం

Indian Space Academy Internship: అంతరిక్ష రంగంపై ఆసక్తి ఉన్న విద్యార్థులకు ఇండియన్ స్పేస్ అకాడమీ నుంచి ఒక మంచి అవకాశం అందుబాటులోకి వచ్చింది. సమ్మర్ ట్రైనింగ్ కార్యక్రమం పేరుతో ఈ సంస్థ దరఖాస్తులను ఆహ్వానిస్తోంది. ఈ శిక్షణ కార్యక్రమం కేవలం సిద్ధాంతానికి మాత్రమే పరిమితం కాకుండా ప్రాజెక్టు ఆధారిత ఇంటర్న్‌షిప్‌లను కూడా అందించడం ప్రత్యేకతగా నిలుస్తోంది. దీని ద్వారా విద్యార్థులు నిజమైన అంతరిక్ష డేటాపై పనిచేసే అనుభవాన్ని పొందే అవకాశం కలుగుతుంది. ప్రస్తుతం అంతరిక్ష రంగం వేగంగా విస్తరిస్తున్న నేపథ్యంలో ఈ శిక్షణ పూర్తి చేసిన వారికి అంతరిక్ష శాస్త్రం, పర్యావరణ నిర్వహణ, విపత్తు నిర్వహణ వంటి విభాగాల్లో ఉపాధి అవకాశాలు మెరుగుపడే అవకాశం ఉందని నిపుణులు చెబుతున్నారు.

ఈ కార్యక్రమం దేశవ్యాప్తంగా 1500కు పైగా విద్యాసంస్థలతో అనుసంధానమై నైపుణ్య ఆధారిత శిక్షణను అందిస్తోంది. అంతరిక్ష విద్యను అందరికీ చేరువ చేయడం ప్రధాన లక్ష్యంగా ఈ అకాడమీ పనిచేస్తోంది. ఉపగ్రహాలు, ప్రయోగ వాహనాలు, ఖగోళ శాస్త్రం వంటి కీలక అంశాలపై ప్రత్యేక కోర్సులు అందుబాటులో ఉన్నాయి. ఇందులో ఆస్ట్రానమీ మరియు ఆస్ట్రో ఫిజిక్స్, ఆదిత్య ఎల్1 డేటాతో హెలియో ఫిజిక్స్, పైతాన్ ఆధారిత రిమోట్ సెన్సింగ్ మరియు భౌగోళిక సమాచార వ్యవస్థలపై శిక్షణ ఇవ్వనున్నారు. ఈ కోర్సులో చేరేందుకు అభ్యర్థుల నుంచి రూ.1750 శిక్షణ రుసుము వసూలు చేస్తారు. ఆసక్తి గల వారు isa.internship.indiaspaceweek.org వెబ్‌సైట్ ద్వారా దరఖాస్తు చేసుకోవాల్సి ఉంటుంది.

మొత్తం 45 రోజులపాటు జరిగే ఈ శిక్షణ మే 19న ప్రారంభమై జులై 2 వరకు కొనసాగుతుంది. ఈ కార్యక్రమం పూర్తిగా ఆన్లైన్ విధానంలో నిర్వహించబడుతుంది. అండర్ గ్రాడ్యుయేట్, పోస్ట్ గ్రాడ్యుయేట్, పిహెచ్డి విద్యార్థులు, పరిశోధకులు, అధ్యాపకులు మరియు వృత్తి నిపుణులు ఈ కోర్సులో చేరేందుకు అర్హులు. ఈ శిక్షణలో పాల్గొనదలచిన వారు తప్పనిసరిగా ల్యాప్‌టాప్ లేదా కంప్యూటర్ కలిగి ఉండాలి. శిక్షణ పూర్తి చేసిన వారికి ధ్రువీకరణ పత్రం అందజేయబడుతుంది. ఈ కోర్సుకు దరఖాస్తు చేసుకునే గడువు మే 15గా నిర్ణయించారు.

వరంగల్ కాకతీయ విశ్వవిద్యాలయం ఉపకులపతి ప్రతాపరెడ్డి ఈ కార్యక్రమంపై మాట్లాడుతూ.. అంతరిక్షంపై ఆసక్తి ఉన్న విద్యార్థులకు ఇది గొప్ప అవకాశమని పేర్కొన్నారు. ఇండియన్ స్పేస్ వీక్ ఆధ్వర్యంలో ప్రారంభమైన ఈ ఇండియన్ స్పేస్ అకాడమీ విద్యార్థులు మరియు ఉపాధ్యాయులకు నాణ్యమైన అంతరిక్ష విద్యను అందించే ప్రత్యేక వేదికగా నిలుస్తోందని తెలిపారు. ఆన్లైన్ మరియు ఆఫ్లైన్ విధానాల్లో శిక్షణ, పరీక్షలు, ధ్రువీకరణ పత్రాలు అందిస్తూ అంతరిక్ష విద్యను విస్తరించడంలో ఈ సంస్థ కీలక పాత్ర పోషిస్తోందని పేర్కొన్నారు.

ALSO READ: OTT Thriller: చుక్కలు కనిపిస్తాయి జాగ్రత్త!.. గుండె ధైర్యం ఉంటేనే ఈ సిరీస్ చూడండి..