CM Revanth Reddy: ప్రైవేట్ స్కూల్స్ ఖాళీ అవ్వాల్సిందే!

CM Revanth Reddy: తెలంగాణ రాష్ట్రంలో విద్యా వ్యవస్థను ఆధునికీకరించాలనే లక్ష్యంతో ప్రభుత్వం తీసుకుంటున్న చర్యలు స్పష్టంగా కనిపిస్తున్నాయని ముఖ్యమంత్రి రేవంత్ రెడ్డి తెలిపారు. రాష్ట్ర అభివృద్ధి దిశగా విద్యకు అత్యంత ప్రాధాన్యం ఇస్తూ, యంగ్ ఇండియా ఇంటిగ్రేటెడ్ పాఠశాలల నిర్మాణాన్ని దశలవారీగా చేపడుతున్నామని వెల్లడించారు. రాష్ట్రవ్యాప్తంగా 100 నియోజకవర్గాల్లో రూ.20,000 కోట్ల వ్యయంతో మొదటి దశ పనులు ప్రారంభించగా ప్రస్తుతం 59 పాఠశాలల నిర్మాణం జరుగుతోందని చెప్పారు. ప్రతి పాఠశాలను 25 ఎకరాల విస్తీర్ణంలో, 500000 చదరపు అడుగుల విస్తీర్ణంతో నిర్మిస్తున్నట్లు వివరించారు. ఈ క్రమంలో రంగారెడ్డి జిల్లాలోని ఇబ్రహీంపట్నం మండలం చర్లపటేల్ గూడెం రోడ్డులో ఉన్న ఏవీఎన్ లేక్ ఫీల్డ్ గ్లోబల్ పాఠశాలను శుక్రవారం ప్రారంభించినట్లు తెలిపారు.

స్వాతంత్ర్యం అనంతరం దేశంలో విద్య విస్తరణకు జరిగిన ప్రయత్నాలను గుర్తుచేసుకుంటూ, ఆ కాలంలో నిరక్షరాస్యత, పేదరికం తీవ్రంగా ఉన్నాయని ఆయన చెప్పారు. దేశ తొలి ప్రధానమంత్రి జవహర్ లాల్ నెహ్రు విద్యా వ్యవస్థను గ్రామీణ ప్రాంతాలకు విస్తరించడంలో కీలక పాత్ర పోషించారని వివరించారు. విద్య అందుబాటులోకి రావడంతో పేదవారికీ నేర్చుకునే అవకాశాలు పెరిగాయని, పెద్దలకూ విద్య అందించేందుకు వయోజన విద్యా కార్యక్రమాలు చేపట్టినట్లు గుర్తు చేశారు. ఈ మార్పులు దేశాన్ని అభివృద్ధి దిశగా నడిపించాయని ఆయన అభిప్రాయపడ్డారు.

దేశంలో సాగునీటి ప్రాజెక్టుల అభివృద్ధి కూడా వ్యవసాయ రంగాన్ని బలపరిచిందని పేర్కొన్నారు. నాగార్జున సాగర్, శ్రీశైలం ప్రాజెక్ట్, శ్రీరాంసాగర్ ప్రాజెక్ట్ వంటి ప్రాజెక్టులు లక్షల ఎకరాలకు నీరు అందించి దేశాన్ని ఆహార ఉత్పత్తిలో స్వయం సమృద్ధిగా మార్చాయని తెలిపారు. ఈ అభివృద్ధి వల్ల భారత్ ఇతర దేశాలకు కూడా ధాన్యాన్ని ఎగుమతి చేసే స్థాయికి ఎదిగిందని పేర్కొన్నారు. ప్రస్తుతం దేశంలో విద్య అందుబాటులో లేని ప్రాంతం లేదని, ప్రపంచ స్థాయిలో పోటీ పడే స్థాయికి చేరుకుందని అన్నారు.

ఇంజినీరింగ్ విద్యలో నాణ్యత సమస్యలను ప్రస్తావిస్తూ, ప్రతి ఏడాది రాష్ట్రంలో సుమారు 110000 మంది ఇంజినీరింగ్ పూర్తిచేస్తున్నప్పటికీ అందరికీ తగిన నైపుణ్యాలు ఉండడం లేదని తెలిపారు. సరైన నైపుణ్యాల లేమి వల్ల ఉపాధి అవకాశాలు కోల్పోతున్నారని అన్నారు. ప్రభుత్వ పాఠశాలల్లో 6వ తరగతి విద్యార్థుల్లో చాలామంది 3వ తరగతి స్థాయి పాఠాలు చదవలేని పరిస్థితి ఉందని ఆందోళన వ్యక్తం చేశారు. నిర్వహించిన సర్వేలో కేవలం 6.78 శాతం విద్యార్థులే తగిన స్థాయిలో ఉన్నట్లు వెల్లడైంది. రాష్ట్ర బడ్జెట్‌లో విద్య కోసం రూ.27 కోట్లను అంటే 8.3 శాతం ఖర్చు చేస్తున్నామని తెలిపారు.

ప్రభుత్వ పాఠశాలల్లో ప్రతి విద్యార్థిపై ఏడాదికి రూ.108000 వరకు ఖర్చు చేస్తున్నప్పటికీ, ప్రయివేట్ పాఠశాలల్లో చిన్న తరగతుల నుంచే ఎక్కువ మంది విద్యార్థులు చేరడం వల్ల వారి సంఖ్య ఎక్కువగా ఉందని వివరించారు. రాష్ట్రంలో 26000 ప్రభుత్వ పాఠశాలల్లో 1800000 మంది విద్యార్థులు ఉండగా, 11000 ప్రయివేట్ పాఠశాలల్లో 3300000 మంది విద్యార్థులు చదువుతున్నారని తెలిపారు. ఈ అసమతౌల్యాన్ని సరిచేయడానికి ప్రభుత్వం చర్యలు తీసుకుంటుందని అన్నారు.

తరగతి గదుల్లో విద్యార్థుల సంఖ్య పెరగడం వల్ల ఉపాధ్యాయులు బోధనపై మరింత ఆసక్తి చూపుతారని ఆయన పేర్కొన్నారు. ఇదే నియోజకవర్గంలోని ఆరుట్ల గ్రామంలో తెలంగాణ పబ్లిక్ పాఠశాల విజయవంతంగా నడుస్తోందని, మొదటి సంవత్సరంలో 1500 అడ్మిషన్లు ఉండగా 3500 దరఖాస్తులు వచ్చినట్లు తెలిపారు. ఇది ప్రభుత్వ విద్యపై ప్రజల నమ్మకం పెరుగుతోందని సూచిస్తుందని అన్నారు.

విద్యతోపాటు క్రీడలకు కూడా సమాన ప్రాధాన్యం ఇవ్వాలని ప్రభుత్వం నిర్ణయించిందని తెలిపారు. సమగ్ర విద్యా విధానాన్ని రూపొందించేందుకు ప్రభుత్వం కృషి చేస్తోందని చెప్పారు. ఈ కార్యక్రమంలో కేంద్ర మంత్రి కిషన్ రెడ్డి, శాసనమండలి చైర్మన్ గుత్తా సుఖేందర్ రెడ్డి, ఎంపీలు రఘునందన్ రావు, డీకే అరుణ, ఎమ్మెల్సీ ఏవీఎన్ రెడ్డి, ఎమ్మెల్యే మాల్ రెడ్డి రంగారెడ్డి, రాంరెడ్డి, నవీన్ రెడ్డి తదితరులు పాల్గొన్నారు.

ALSO READ: War Effect: సామాన్యుడిపై ధరల పిడుగు