Emotional Story: మూగజీవి ఆఖరి నివాళి.. తిండి పెట్టిన వ‌ృద్దురాలి మృతదేహన్ని హత్తుకున్న కోతి

Emotional Story: మనుషుల మధ్య మానవత్వం తగ్గిపోతుందనే విమర్శలు వినిపిస్తున్న ఈ కాలంలో, ఒక మూగజీవి చూపిన ప్రేమ అందరినీ కదిలించేలా చేసింది. ప్రేమకు భాష అవసరం లేదని, మనసు ఉన్న చోట ఆప్యాయత సహజంగా వ్యక్తమవుతుందని చెప్పేలా ఈ ఘటన నిలిచింది. కర్ణాటకలోని రాయర దొడ్డి గ్రామంలో చోటుచేసుకున్న ఈ సంఘటన ప్రస్తుతం సోషల్ మీడియాలో విస్తృతంగా వైరల్ అవుతూ అనేకమందిని భావోద్వేగానికి గురిచేస్తోంది. ఆ గ్రామానికి చెందిన 85 సంవత్సరాల వయస్సున్న పార్వతమ్మ అనే వృద్ధురాలు గత సోమవారం వృద్ధాప్య సమస్యలతో కన్నుమూశారు. ఆమె జీవించి ఉన్న సమయంలో కొన్నేళ్లుగా తన ఇంటి పరిసరాల్లో తిరిగే కోతులకు ప్రతిరోజూ ఆహారం పెట్టడం అలవాటుగా చేసుకున్నారు. ఈ విషయంలో గ్రామంలోని కొందరు అభ్యంతరం వ్యక్తం చేసినప్పటికీ, పార్వతమ్మ మాత్రం ఆ మూగజీవులపై తన ప్రేమను తగ్గించలేదు. ప్రేమగా వాటిని పిలిచి ఆహారం పెట్టడం ఆమె దైనందిన జీవితంలో భాగమైంది.

పార్వతమ్మ మరణం తర్వాత ఆమె భౌతిక కాయాన్ని ఇంటి వద్ద ఉంచగా, అక్కడికి ఒక కోతి చేరుకుంది. ఆ కోతి అక్కడి పరిస్థితిని గమనిస్తూ నిశ్శబ్దంగా ఆమె దగ్గర కూర్చుంది. అనంతరం ఆమె ముఖాన్ని నిమురుతూ, హత్తుకుంటూ ఎంతో ఆప్యాయత చూపించింది. ఈ దృశ్యం అక్కడ ఉన్న వారందరినీ కంటతడి పెట్టించింది. తనకు ఆహారం పెట్టిన అమ్మకు ఇదే చివరి నివాళి అన్నట్లుగా ఆ కోతి ప్రవర్తించడం అందరినీ ఆశ్చర్యానికి గురిచేసింది. ఈ ఘటనను అక్కడ ఉన్న కొందరు వీడియోగా చిత్రీకరించి సోషల్ మీడియాలో పంచుకోవడంతో అది వేగంగా వ్యాప్తి చెందింది. ప్రేమ, కృతజ్ఞత వంటి భావాలు కేవలం మనుషులకే పరిమితం కావని, మూగజీవులు కూడా వాటిని అంతే లోతుగా అనుభవిస్తాయని ఈ సంఘటన మరోసారి నిరూపించింది. మనుషులు కూడా ఇలాంటి ప్రేమ, కరుణను పెంపొందించుకోవాలని పలువురు నెటిజన్లు స్పందిస్తున్నారు.