April Rules: అమల్లోకి కొత్త రూల్స్!

April Rules: ఏప్రిల్ 1 అనగానే చాలామందికి ఫూల్స్ డే గుర్తుకొస్తుంది. కానీ వాస్తవానికి అదే రోజు దేశవ్యాప్తంగా కొత్త ఆర్థిక సంవత్సరానికి శ్రీకారం చుట్టే రోజు కూడా కావడం విశేషం. ఈ ఏడాది కూడా ఏప్రిల్ 1 నుంచి అమల్లోకి రానున్న కొత్త నియమాలు సాధారణ ప్రజల జీవితాల్లో గణనీయమైన మార్పులను తీసుకురానున్నాయి. ఈ మార్పుల్లో కొన్ని నేరుగా ప్రజల ఖర్చులపై ప్రభావం చూపగా, మరికొన్ని పరోక్షంగా ఆర్థిక వ్యవహారాలపై ప్రభావం చూపనున్నాయి. గ్యాస్ ధరలు, పన్ను విధానం, బ్యాంకింగ్ నిబంధనలు, ప్రయాణ సదుపాయాలు, ఉద్యోగుల జీతాలు వంటి అనేక అంశాల్లో కీలక మార్పులు చోటుచేసుకోబోతున్నాయి. మొత్తం మీద ప్రతి కుటుంబం నెలవారీ ఖర్చులపై ఈ కొత్త నిబంధనల ప్రభావం స్పష్టంగా కనిపించనుంది.

ఏప్రిల్ 1 నుంచి కొత్త పన్ను విధానం అమల్లోకి రానుండటం అత్యంత కీలక మార్పుగా చెప్పాలి. ఇప్పటి వరకు అమల్లో ఉన్న 1961 పన్ను చట్టానికి బదులుగా కొత్త విధానం ప్రవేశపెడుతున్నారు. ఈ కొత్త విధానంతో పన్ను లెక్కింపు మరింత సులభతరం కానుంది. అసెస్మెంట్ ఇయర్, ప్రీవియర్ ఇయర్ అనే పదాలకు బదులుగా టాక్స్ ఇయర్ అనే ఒకే వ్యవస్థ అమల్లోకి వస్తుంది. సెక్షన్ 87ఏ కింద పన్ను మినహాయింపు పరిమితిని పెంచడంతో రూ.12 లక్షల వరకు ఆదాయం ఉన్న వారికి పన్ను భారం ఉండదు. స్టాండర్డ్ డిడక్షన్ రూ.75 వేలతో కలిపి మొత్తం రూ.12 లక్షల 75 వేల వరకు ఆదాయంపై పన్ను చెల్లించాల్సిన అవసరం ఉండదు. పాత పన్ను విధానాన్ని ప్రత్యేకంగా ఎంచుకోకపోతే కొత్త విధానం ఆటోమేటిక్‌గా అమల్లోకి వస్తుంది. అయితే కొత్త విధానంలో పన్ను రేట్లు తక్కువగా ఉన్నప్పటికీ సెక్షన్ 80సీ వంటి మినహాయింపులు ఉండవు.

టీడీఎస్ విధానంలో కూడా మార్పులు చోటుచేసుకోనున్నాయి. ఫామ్-16, ఫామ్-16ఏలకు బదులుగా ఫామ్ 130, 131లను ప్రవేశపెడుతున్నారు. దీని వల్ల పన్ను రిటర్నుల దాఖలులో గందరగోళం తగ్గే అవకాశం ఉంది. ఆదాయ పన్ను రిటర్న్‌లలో పొరపాట్లు సరిదిద్దుకునే గడువును 9 నెలల నుంచి 12 నెలలకు పెంచడం జరిగింది. అయితే 9 నెలల గడువు దాటిన తర్వాత సవరణ చేస్తే అదనపు రుసుము చెల్లించాల్సి ఉంటుంది.

సావరిన్ గోల్డ్ బాండ్స్‌పై పన్ను విధానంలో మార్పులు కూడా కీలకంగా మారనున్నాయి. ఇప్పటివరకు మెచ్యూరిటీ సమయంలో లభించే లాభాలపై పన్ను మినహాయింపు ఉండేది. ఇకపై ఈ మినహాయింపు కేవలం రిజర్వ్ బ్యాంక్ ద్వారా నేరుగా కొనుగోలు చేసిన వారికి మాత్రమే వర్తిస్తుంది. స్టాక్ మార్కెట్ ద్వారా కొనుగోలు చేసిన బాండ్లపై లాభాలకు దీర్ఘకాల, స్వల్పకాల మూలధన లాభ పన్ను చెల్లించాల్సి ఉంటుంది.

పాన్ కార్డు నిబంధనల్లో కూడా మార్పులు చోటుచేసుకున్నాయి. ఇప్పటి వరకు ఆధార్‌తోనే పాన్ కార్డు పొందగలిగే అవకాశం ఉండగా, ఇకపై ఇతర ధృవీకరణ పత్రాలు కూడా తప్పనిసరి చేశారు. టెన్త్ మెమో, ఓటర్ గుర్తింపు కార్డు, పాస్ పోర్టు, డ్రైవింగ్ లైసెన్స్ లేదా జనన ధృవీకరణ పత్రం సమర్పించాల్సి ఉంటుంది. అలాగే ప్రాపర్టీ లావాదేవీలలో పాన్ కార్డు అవసరమైన పరిమితిని రూ.10 లక్షల నుంచి రూ.20 లక్షలకు పెంచారు. ఒక ఆర్థిక సంవత్సరంలో బ్యాంక్ ఖాతాలో రూ.10 లక్షల కంటే ఎక్కువ నగదు జమ లేదా ఉపసంహరణ చేసినా పాన్ వివరాలు తప్పనిసరి.

ఉద్యోగుల జీతభత్యాల్లో కూడా మార్పులు రానున్నాయి. కొత్త కార్మిక చట్టాల ప్రకారం బేసిక్ జీతం మొత్తం జీతంలో 50 శాతంగా ఉండాలి. దీంతో పీఎఫ్ నిధిలో ఉద్యోగుల వాటా పెరిగి, చేతికి వచ్చే జీతం కొంత తగ్గే అవకాశం ఉంది. అయితే దీని వల్ల భవిష్యత్ భద్రత పెరుగుతుంది. పే స్లిప్ నిర్మాణంలో కూడా మార్పులు కనిపించనున్నాయి. ఉద్యోగం వదిలిన తర్వాత ఫుల్ అండ్ ఫైనల్ సెటిల్‌మెంట్‌ను 2 పని దినాల్లో పూర్తి చేయాల్సి ఉంటుంది. గతంలో ఇది 30 నుంచి 90 రోజులు పట్టేది. ఈ నిబంధన ఉద్యోగులకు పెద్ద ఉపశమనం కలిగించనుంది. ఉద్యోగం మారినప్పుడు పీఎఫ్ ఆటోమేటిక్‌గా బదిలీ అయ్యే విధానం కూడా అమల్లోకి రానుంది. అడ్వాన్స్ క్లెయిమ్ పరిమితిని రూ.5 లక్షలకు పెంచారు.

విదేశీ ఖర్చులపై టీసీఎస్ రేటు తగ్గించడం మరో ముఖ్య మార్పు. గతంలో రూ.7 లక్షల లోపు ఖర్చుపై 5 శాతం, దాని పైన 20 శాతం టీసీఎస్ ఉండగా, ఇప్పుడు అన్ని ఖర్చులపై 2 శాతం ఫ్లాట్ రేటు వర్తించనుంది. బ్యాంక్ ఏటీఎం లావాదేవీల్లో కూడా మార్పులు చోటుచేసుకోనున్నాయి. యూపీఐ ద్వారా నగదు ఉపసంహరణలను కూడా ఉచిత లావాదేవీల్లో లెక్కించే అవకాశం ఉంది. పరిమితి దాటితే ఒక్కో లావాదేవీపై రూ.23 వరకు ఛార్జీలు విధించబడతాయి. లావాదేవీ విఫలమైతే రూ.25 వరకు జరిమానా పడే అవకాశం ఉంది. క్రెడిట్ కార్డులపై రివార్డు పాయింట్లలో కోతలు విధించడం కూడా వినియోగదారులకు ప్రభావం చూపనుంది.

రైల్వే టికెట్ రద్దు నిబంధనల్లో కూడా మార్పులు వచ్చాయి. రైలు బయల్దేరే 8 గంటల ముందు టికెట్ రద్దు చేస్తే ఎలాంటి రిఫండ్ ఉండదు. 24 గంటల నుంచి 8 గంటల మధ్య రద్దు చేస్తే 50 శాతం మాత్రమే తిరిగి లభిస్తుంది. 24 నుంచి 72 గంటల మధ్య రద్దు చేస్తే 25 శాతం కోత విధిస్తారు. 72 గంటల ముందు రద్దు చేస్తే మాత్రమే ఎక్కువ మొత్తాన్ని తిరిగి పొందవచ్చు.

పర్యావరణ పరిరక్షణలో భాగంగా కొత్త ఉద్గార నియమాలు కూడా అమల్లోకి రానున్నాయి. దీని ప్రభావం వాహనాల ధరలపై పడే అవకాశం ఉంది. కొత్త వాహనాల్లో కాలుష్య నియంత్రణ పద్ధతులు మరింత కఠినంగా అమలు చేయనున్నారు.

ఇక దేశ భద్రతా రంగంలో కూడా కీలక మార్పులు చోటుచేసుకున్నాయి. మావోయిజం నిర్మూలన లక్ష్యంగా చేపట్టిన ఆపరేషన్ కగార్ విజయవంతమైందని కేంద్ర ప్రభుత్వం ప్రకటించింది. దేశంలో మావోయిజం గణనీయంగా తగ్గిందని, చాలా ప్రాంతాల్లో పూర్తిగా నిర్మూలన సాధ్యమైందని పేర్కొన్నారు. గిరిజన ప్రాంతాల అభివృద్ధికి కట్టుబడి ఉన్నామని, లొంగిపోయిన వారికి సంక్షేమ పథకాలు అందిస్తామని తెలిపారు.

ALSO READ: Vijay’s Speech: జగన్, పవన్‌పై పంచులు? (VIDEO)