ఇమ్యునోథెరపీ ప్రతి క్యాన్సర్ రోగికి కాదా?

క్యాన్సర్ అనే వ్యాధి పేరు వినగానే ఇప్పటికీ చాలా మందిలో భయం నెలకొంటుంది. చికిత్స ఎలా ఉంటుంది, పూర్తిగా కోలుకోవచ్చా అనే అనుమానాలు ప్రజలను ఆందోళనకు గురి చేస్తూనే ఉన్నాయి. అయితే వైద్య రంగంలో జరుగుతున్న అభివృద్ధులతో కొత్త చికిత్సా విధానాలు అందుబాటులోకి వస్తున్నాయి. అందులో భాగంగా ఇమ్యునోథెరపీ ప్రస్తుతం క్యాన్సర్ చికిత్సలో ఒక ముఖ్యమైన మార్గంగా ఎదుగుతోంది. ఈ విధానం ద్వారా శరీరంలోని రోగనిరోధక వ్యవస్థను బలోపేతం చేసి, క్యాన్సర్ కణాలను గుర్తించి వాటిని నాశనం చేసేలా తయారు చేస్తారు. ఈ విధానానికి సంబంధించిన ఫలితాలు ఆశాజనకంగా ఉన్నాయని వైద్యులు చెబుతున్నప్పటికీ, ఇది ప్రతి ఒక్కరికీ ఒకే విధంగా పనిచేస్తుందా అనే ప్రశ్న ఇంకా కొనసాగుతోంది.

ఇమ్యునోథెరపీ అనేది శరీరం సహజ రక్షణ వ్యవస్థను ఉపయోగించి క్యాన్సర్‌తో పోరాడే చికిత్సా విధానం. సాధారణంగా రోగనిరోధక వ్యవస్థ మన శరీరాన్ని వైరస్‌లు, బ్యాక్టీరియా వంటి హానికర అంశాల నుండి కాపాడుతుంది. కానీ క్యాన్సర్ కణాలు చాలా సార్లు ఈ వ్యవస్థను మోసం చేసి, దాని నుండి తప్పించుకుని పెరుగుతాయి. ఇక్కడే ఇమ్యునోథెరపీ కీలక పాత్ర పోషిస్తుంది. ఈ చికిత్స ద్వారా రోగనిరోధక కణాలకు ప్రత్యేకంగా శిక్షణ ఇచ్చి, అవి క్యాన్సర్ కణాలను గుర్తించి సమర్థంగా ఎదుర్కొనేలా చేస్తారు.

న్యూఢిల్లీలోని ఎయిమ్స్ ఆసుపత్రిలో మెడికల్ ఆంకాలజీ విభాగానికి చెందిన ఎండి డాక్టర్ అరవింద్ కుమార్ వివరాల ప్రకారం.. ఇమ్యునోథెరపీ క్యాన్సర్ కణాలను గుర్తించడమే కాకుండా, వాటిని పూర్తిగా నాశనం చేయడానికి శరీరానికి సహకరిస్తుంది. గతంలో క్యాన్సర్ చికిత్సలో కీమోథెరపీ, రేడియేషన్ ప్రధాన పద్ధతులుగా ఉపయోగించబడేవి. అవి ఇప్పటికీ ప్రాముఖ్యత కలిగినవే అయినప్పటికీ, వాటి వల్ల రోగులకు అనేక దుష్ప్రభావాలు ఎదురవుతాయి. జుట్టు రాలడం, అలసట, నీరసం వంటి సమస్యలు రోగులను శారీరకంగా, మానసికంగా బలహీనపరుస్తాయి.

దీనికి భిన్నంగా ఇమ్యునోథెరపీ ప్రధానంగా క్యాన్సర్ కణాలపైనే దాడి చేస్తుంది. ఆరోగ్యకరమైన కణాలపై ప్రభావం తక్కువగా ఉండడం వల్ల దుష్ప్రభావాలు కూడా తక్కువగా ఉంటాయని వైద్య నిపుణులు చెబుతున్నారు. ముఖ్యంగా ఊపిరితిత్తుల క్యాన్సర్, మూత్రపిండాల క్యాన్సర్, మెలనోమా వంటి క్లిష్టమైన కేసుల్లో ఈ విధానం మంచి ఫలితాలు ఇస్తోందని పరిశోధనలు సూచిస్తున్నాయి. దీంతో భవిష్యత్తులో ఈ చికిత్స మరింత విస్తృతంగా ఉపయోగంలోకి వచ్చే అవకాశాలు ఉన్నాయని భావిస్తున్నారు.

అయితే ఈ చికిత్స ప్రతి క్యాన్సర్ రోగికి ఒకే విధంగా ఉపయోగపడదని వైద్యులు స్పష్టంగా చెబుతున్నారు. రోగి శరీర పరిస్థితి, క్యాన్సర్ రకం, దాని దశ వంటి అంశాలపై ఆధారపడి ఫలితాలు మారవచ్చు. కొందరికి ఇది అత్యంత ప్రయోజనకరంగా మారితే, మరికొందరికి పరిమిత స్థాయిలోనే ప్రభావం చూపవచ్చు. అందుకే వైద్యులు ప్రతి రోగి పరిస్థితిని పరిశీలించి, సరైన చికిత్సను ఎంపిక చేస్తారు. ఇమ్యునోథెరపీ ఒక కొత్త ఆశను కలిగిస్తున్నప్పటికీ, ఇది ప్రతి ఒక్కరికీ పూర్తిస్థాయి పరిష్కారం కాదని, ఇంకా పరిశోధనలు కొనసాగుతున్నాయని డాక్టర్ అరవింద్ కుమార్ వెల్లడించారు. భవిష్యత్తులో మరిన్ని కొత్త మందులు, సాంకేతికతలు అభివృద్ధి చెందడంతో క్యాన్సర్ చికిత్స మరింత ప్రభావవంతంగా మారే అవకాశం ఉందని వైద్య నిపుణులు అభిప్రాయపడుతున్నారు.

ALSO READ: Maharashtra: ట్రాన్స్ మహిళతో మంత్రి రాసలీలలు!