Andhra Pradesh: సీనియర్ సిటిజన్లకు ఉచిత కార్డులు

Andhra Pradesh: ఆంధ్రప్రదేశ్‌లో వృద్ధాప్య జనాభా వేగంగా పెరుగుతున్న నేపథ్యంలో రాష్ట్ర ప్రభుత్వం సమగ్ర చర్యలకు శ్రీకారం చుట్టింది. భవిష్యత్తులో పెరుగుతున్న వృద్ధుల శాతాన్ని సమర్థంగా ఎదుర్కొనే లక్ష్యంతో పాపులేషన్ మేనేజ్‌మెంట్ పాలసీ అమలు దిశగా కీలక నిర్ణయాలు తీసుకుంటోంది. గతంలో అమల్లో ఉన్న జనాభా నియంత్రణ చట్టాలను రద్దు చేసి, జనాభా పెరుగుదలను ప్రోత్సహించే విధానాలపై దృష్టి సారించింది. వృద్ధుల సంక్షేమం, ఆరోగ్యం, భద్రతను కేంద్రంగా చేసుకుని అనేక కొత్త కార్యక్రమాలను ప్రారంభిస్తూ ముందుకు సాగుతోంది. ముఖ్యంగా వృద్ధులకు సౌకర్యాలు మెరుగుపరచడం, వారి జీవన ప్రమాణాలను పెంచడం లక్ష్యంగా ప్రభుత్వం పలు కీలక నిర్ణయాలు తీసుకుంది.

వృద్ధులకు సులభంగా సేవలు అందించేందుకు ఆధునిక సాంకేతికతను వినియోగిస్తూ వాట్సప్ మన మిత్ర సేవను ప్రభుత్వం అందుబాటులోకి తీసుకొచ్చింది. ఈ సేవ ద్వారా అర్హులైన వృద్ధులకు ఉచితంగా సీనియర్ సిటిజన్ కార్డులు జారీ చేస్తున్నట్లు మంత్రి డోలా శ్రీ బాలవీరాంజనేయస్వామి వెల్లడించారు. సచివాలయంలో మంత్రి అధ్యక్షతన నిర్వహించిన సీనియర్ సిటిజన్స్ రాష్ట్ర కౌన్సిల్ 3వ సమావేశంలో వృద్ధుల సంక్షేమానికి సంబంధించిన పలు అంశాలను సమీక్షించారు. ఈ సందర్భంగా ప్రతి అర్హుడికి సీనియర్ సిటిజన్ కార్డు అందేలా విస్తృత స్థాయిలో అవగాహన కార్యక్రమాలు నిర్వహించాలని నిర్ణయించారు. అంతేకాకుండా సైబర్ నేరాల పట్ల వృద్ధులకు అవగాహన పెంచడం అత్యవసరమని భావిస్తూ ప్రత్యేక ప్రచార కార్యక్రమాలు చేపట్టాలని సూచించారు. వృద్ధాశ్రమాల్లో ఆరోగ్యాన్ని కాపాడేందుకు తేలికపాటి వ్యాయామ పరికరాలు ఏర్పాటు చేయాలనే నిర్ణయాన్ని కూడా తీసుకున్నారు.

ప్రయాణ సౌకర్యాల్లో కూడా వృద్ధులకు మరింత ప్రాధాన్యత కల్పిస్తూ ఆర్టీసీ బస్సుల్లో రాయితీలు, ప్రత్యేక సీట్ల కేటాయింపును కచ్చితంగా అమలు చేయాలని ప్రభుత్వం ఆదేశాలు జారీ చేసింది. అలాగే వృద్ధులు, దివ్యాంగులకు ప్రభుత్వ కార్యాలయాల్లో సౌకర్యాలు మెరుగుపరచడం కోసం కలెక్టర్ కార్యాలయాల్లో లిఫ్ట్ సదుపాయం, వీల్ చైర్లను అందుబాటులో ఉంచుతోంది. దేశంలో ఎక్కడా లేని విధంగా వృద్ధులు, దివ్యాంగులకు అధిక మొత్తంలో పింఛన్లు అందిస్తూ ఆర్థిక భరోసాను కల్పిస్తోంది. భవిష్యత్తులో 2036 నాటికి రాష్ట్రంలో ప్రతి 5 మందిలో ఒకరు వృద్ధుడిగా మారే పరిస్థితి ఉందని అంచనాలు వ్యక్తమవుతున్న నేపథ్యంలో, ఈ సవాళ్లను ఎదుర్కొనేందుకు ప్రభుత్వం ముందస్తు చర్యలు చేపడుతోంది. ముఖ్యంగా ప్రోత్సాహకాలతో కూడిన కొత్త విధానంలో అనేక ప్రయోజనాలు ఉండనున్నాయని మంత్రి డోలా బాలవీరాంజనేయస్వామి స్పష్టం చేశారు. ఈ చర్యల ద్వారా వృద్ధుల జీవన ప్రమాణాలు మెరుగుపడటంతో పాటు సమాజంలో వారికి గౌరవప్రదమైన స్థానం కల్పించాలనే లక్ష్యంతో ప్రభుత్వం కృషి చేస్తోంది.

ALSO READ: కొత్త పథకం: కేంద్రం నుంచి ప్రతీ నెలా రూ.3 వేలు