అదృష్టం అంటే ఇదేనేమో!.. బోరు బావి నుంచి వచ్చిన గ్యాస్‌తో పదేళ్లుగా ఫ్రీ గ్యాస్

కేరళ రాష్ట్రంలోని అలప్పుర ప్రాంతానికి చెందిన రెత్నమ్మ అనే మహిళ గత 10 ఏళ్లుగా ఎటువంటి గ్యాస్ సిలిండర్ కొనకుండా వంట చేసుకుంటూ అందరినీ ఆశ్చర్యానికి గురిచేస్తున్నారు. సాధారణంగా ఇంట్లో వంట చేయాలంటే గ్యాస్ సిలిండర్ లేదా ఇతర ఇంధనాలపై ఆధారపడాల్సి వస్తుంది. అయితే రెత్నమ్మ మాత్రం తన ఇంటి పెరట్లో నుంచే వెలువడుతున్న సహజ వాయువుతో గ్యాస్ పొయ్యి మీద వంట చేసుకుంటూ అరుదైన ఉదాహరణగా నిలిచారు. 2011లో తన ఇంటి అవసరాల కోసం బోరు బావి తవ్వించిన సమయంలో నీరు రాకపోవడంతో ఆమె నిరాశ చెందారు. కానీ అదే బోరు ఆమె జీవితంలో ఊహించని మార్పుకు కారణమైంది.

బోరు పైపును మూసివేసే సమయంలో అనుకోకుండా అగ్గిపుల్ల వెలిగించడంతో ఒక్కసారిగా మంటలు రావడం గమనించారు. దీంతో ఆ పైపు నుంచి బయటకు వస్తున్నది వాయువు అని గుర్తించిన స్థానికులు, అది వంటకు ఉపయోగపడుతుందనే విషయాన్ని అర్థం చేసుకున్నారు. వెంటనే ఒక ప్లాస్టిక్ పైపు సహాయంతో ఆ వాయువును నేరుగా వంటింటికి అనుసంధానం చేశారు. అప్పటి నుంచి ఇప్పటి వరకు రెత్నమ్మ ఎటువంటి గ్యాస్ సిలిండర్ అవసరం లేకుండా అదే వాయువుతో వంట చేసుకుంటున్నారు. ఈ విధానం ద్వారా ఆమె ప్రతి సంవత్సరం సుమారు రూ.10,000 వరకు ఖర్చును ఆదా చేస్తూ, పెరుగుతున్న ఇంధన ధరల ప్రభావం లేకుండా జీవిస్తున్నారు.

ఈ వింత సంఘటనపై పరిశోధన చేపట్టిన జియోలాజికల్ సర్వే ఆఫ్ ఇండియా మరియు ఇతర చమురు సంస్థల నిపుణులు కీలక వివరాలను వెల్లడించారు. ఆ బోరు బావి నుంచి వస్తున్నది సాధారణ ఎల్‌పిజి కాదని, స్వచ్ఛమైన మీథేన్ వాయువు అని వారు నిర్ధారించారు. ఈ వాయువు భూగర్భంలో దశాబ్దాలుగా పేరుకుపోయిన వృక్ష సంపద, సేంద్రీయ పదార్థాలు కుళ్ళిపోవడం వల్ల సహజంగానే ఉత్పత్తి అవుతుందని వివరించారు. ఈ ప్రక్రియ ద్వారా ఏర్పడే వాయువును శాస్త్రీయంగా బయోగ్యాస్ లేదా మార్ష్ గ్యాస్‌గా పిలుస్తారని తెలిపారు.

అలప్పుర వంటి తీర ప్రాంతాల్లో ఇలాంటి సహజ వాయువు నిల్వలు ఉండే అవకాశం ఉందని నిపుణులు పేర్కొన్నారు. అయితే ఈ గ్యాస్ పరిమిత స్థాయిలో మాత్రమే లభ్యమవుతుందని, పెద్ద స్థాయిలో వాణిజ్యపరంగా వినియోగించడానికి ఇది సరిపోదని స్పష్టం చేశారు. కేవలం ఒకటి లేదా రెండు ఇళ్ల అవసరాలను మాత్రమే ఇది తీర్చగలదని అంచనా వేశారు. అయినప్పటికీ రెత్నమ్మకు మాత్రం ఇది ఒక వరంలా మారింది.

ప్రస్తుతం దేశవ్యాప్తంగా ఎల్‌పిజి ధరలు పెరుగుతున్న నేపథ్యంలో చాలా మంది ఇంధన వ్యయంతో ఇబ్బందులు పడుతుంటే, రెత్నమ్మ మాత్రం ఎటువంటి ఖర్చు లేకుండా సహజ వాయువుతో వంట చేసుకుంటూ సంతోషంగా జీవిస్తున్నారు. ఈ సంఘటన ఇప్పుడు సోషల్ మీడియాలో వైరల్ అవుతూ, సహజ వనరులను సరిగ్గా వినియోగించుకుంటే ఎంతటి ప్రయోజనం ఉంటుందో చూపిస్తున్న ఉదాహరణగా నిలుస్తోంది.

ALSO READ: RR Group: వరంగల్‌లో ఎక్స్‌పోర్ట్ ఇంటర్నేషనల్ కొరియర్ సర్వీసులను ప్రారంభించిన డీసీసీ అధ్యక్షులు