Home Loan: 20 ఏళ్ల హోమ్ లోన్ 12 ఏళ్లలోనే ఖతం.. ఎలా అంటే?

Home Loan: మధ్యతరగతి కుటుంబాల జీవితంలో సొంత ఇల్లు అనేది ఒక పెద్ద కల మాత్రమే కాదు.. భావోద్వేగంతో కూడిన లక్ష్యం కూడా. ఆ కలను నెరవేర్చుకోవడానికి చాలా మంది బ్యాంకుల నుంచి లక్షల రూపాయల రుణాలు తీసుకుంటారు. అయితే లోన్ తీసుకునే సమయంలో చాలా మంది కేవలం నెలసరి వాయిదా ఎంత వస్తుందనే విషయంపైనే దృష్టి పెడతారు. కానీ దీర్ఘకాలంలో అదే రుణం మీద చెల్లించాల్సిన వడ్డీ మొత్తం ఎంత పెద్దదిగా మారుతుందో చాలా మంది గుర్తించరు. సాధారణంగా 20 ఏళ్ల గడువుతో తీసుకున్న హోమ్ లోన్‌లో మనం కట్టే మొత్తం డబ్బులో అసలుకంటే వడ్డీయే ఎక్కువగా ఉండే పరిస్థితి ఏర్పడుతుంది. ఈ పరిస్థితిని మార్చుకోవడానికి ఆర్థిక నిపుణులు సూచిస్తున్న కొన్ని సరళమైన మార్గాలు పాటిస్తే, పెద్ద మొత్తంలో వడ్డీ భారం తగ్గించుకోవచ్చు.

ఈ నేపథ్యంలో మొదటి మార్గం సంవత్సరానికి ఒక అదనపు వాయిదా చెల్లించడం. సాధారణంగా మనం సంవత్సరానికి 12 నెలలు 12 వాయిదాలు చెల్లిస్తుంటాం. అయితే ఏడాదికి ఒక అదనపు వాయిదా చెల్లిస్తే, ఆ మొత్తం నేరుగా అసలు రుణంపై తగ్గుతుంది. దీనివల్ల రుణపు గడువు గణనీయంగా తగ్గుతుంది. ఉదాహరణకు 20 ఏళ్ల పాటు కొనసాగాల్సిన రుణం కేవలం 15 ఏళ్లలోనే ముగిసే అవకాశం ఉంటుంది. అంటే సుమారు 5 ఏళ్ల పాటు వాయిదాలు చెల్లించే భారం మీపై ఉండదు. దీని ద్వారా మీరు చెల్లించాల్సిన వడ్డీ కూడా భారీగా తగ్గుతుంది.

రెండవ మార్గంగా ప్రతి సంవత్సరం మీ వాయిదాను కొంత శాతం పెంచుకుంటూ వెళ్లడం చాలా ప్రభావవంతంగా ఉంటుంది. ఉద్యోగంలో ఎదుగుదలతో పాటు జీతం పెరుగుతుండటంతో, అదే రీతిలో వాయిదాను కూడా ప్రతి ఏడాది కొద్దిగా పెంచుకుంటే రుణం త్వరగా ముగుస్తుంది. ఉదాహరణకు రూ.50 లక్షల రుణాన్ని 9 శాతం వడ్డీతో 20 ఏళ్లకు తీసుకున్నట్లయితే, ప్రతి ఏడాది వాయిదాను కేవలం 5 శాతం పెంచుకుంటూ వెళ్తే ఆ రుణం సుమారు 12 ఏళ్లలోనే పూర్తయ్యే అవకాశం ఉంటుంది. ఈ పద్ధతిని అనుసరిస్తే సుమారు రూ.30 లక్షల వరకు వడ్డీని ఆదా చేసుకునే అవకాశం ఉంటుంది. ఈ ఆదా చేసిన మొత్తాన్ని భవిష్యత్తులో మరొక ఆస్తి కొనుగోలు చేయడానికి లేదా పిల్లల విద్య, భద్రత కోసం వినియోగించుకోవచ్చు.

ఇక బ్యాంకుల విధానం కూడా ఈ విషయంలో కీలక పాత్ర పోషిస్తుంది. రుణం ప్రారంభ దశలో మనం చెల్లించే వాయిదాల్లో ఎక్కువ భాగం వడ్డీకే వెళ్తుంది. అసలు మొత్తం చాలా తక్కువగా తగ్గుతుంది. అందుకే రుణాన్ని ఎక్కువ కాలం కొనసాగిస్తే బ్యాంకులకు ఎక్కువ లాభం చేకూరుతుంది. కానీ మనం తెలివిగా ప్రణాళిక వేసుకుని ముందస్తు చెల్లింపులు చేస్తే వడ్డీ భారం గణనీయంగా తగ్గుతుంది. కాబట్టి రుణం తీసుకునే సమయంలోనే దీర్ఘకాల వ్యూహాన్ని రూపొందించుకుని, సాధ్యమైనంత త్వరగా రుణాన్ని ముగించడానికి ప్రయత్నించడం ఉత్తమ మార్గంగా నిపుణులు సూచిస్తున్నారు.

ALSO READ: ఈ జుగాడ్ చూస్తే షాక్ అవుతారు.. ట్యాప్ తిప్పగానే బల్బ్ ఆన్.. (Viral Video)