Sports: సెపక్ టక్రా చాంపియన్‌షిప్‌లో భారత జట్లకు ఐదు బంగారు పతకాలు

Sports: కొలంబో వేదికగా జరిగిన సౌత్ ఏషియా సెపక్ టక్రా చాంపియన్‌షిప్‌లో భారత క్రీడా చరిత్రలో మరో స్వర్ణాధ్యాయం చేరింది. ఈ టోర్నీలో భారత మహిళల జట్టు, పురుషుల జట్టు అసాధారణ ప్రదర్శనతో ఐదు బంగారు పతకాలను కైవసం చేసుకుని దేశానికి గర్వకారణంగా నిలిచాయి. ఆసియా స్థాయిలో అత్యంత వేగంగా ప్రాచుర్యం పొందుతున్న సెపక్ టక్రా క్రీడలో భారత ఆటగాళ్లు చూపిన సత్తా అంతర్జాతీయ వేదికలపై దేశ ప్రతిష్ఠను మరింత పెంచింది.

ఈ ఘన విజయాలపై సెపక్ టక్రా ఫెడరేషన్ ఆఫ్ ఇండియా జాయింట్ సెక్రటరీ పెరిక సురేష్ స్పందిస్తూ.. ఇది కేవలం పతకాల విజయం మాత్రమే కాకుండా, భారత క్రీడా భవిష్యత్తుకు సంకేతమని పేర్కొన్నారు. సెపక్ టక్రా మేనేజ్‌మెంట్ కమిటీ సమన్వయంతో ఈ క్రీడ దేశవ్యాప్తంగా వేగంగా విస్తరిస్తోందని, యువతను ఆకర్షించే స్థాయికి చేరుతోందని వివరించారు. ప్రధాని నరేంద్ర మోడీ ప్రోత్సహిస్తున్న ‘ఖేలో ఇండియా ఖేలో’ ఉద్యమ ఆత్మను నిజంగా సాకారం చేస్తూ భారత ఆటగాళ్లు ఈ చారిత్రక విజయాన్ని అందుకున్నారని ఆయన కొనియాడారు.

ఈ విజయంతో భారత్‌లో సెపక్ టక్రా క్రీడకు మరింత గుర్తింపు లభిస్తుందని, రానున్న రోజుల్లో ఈ స్పోర్ట్ దేశవ్యాప్తంగా యువతను క్రీడల వైపు మళ్లించే శక్తిగా మారుతుందని క్రీడా వర్గాలు ఆశాభావం వ్యక్తం చేస్తున్నాయి. కేవలం పతకాలు గెలవడమే కాకుండా, క్రీడాస్ఫూర్తి, క్రమశిక్షణ, జట్టు భావన వంటి విలువలను యువతలో నాటడంలో సెపక్ టక్రా కీలక పాత్ర పోషిస్తుందని నిపుణులు చెబుతున్నారు.

ఇదే క్రమంలో ఇటీవల టోక్యోలో నిర్వహించిన 2026 ఏషియన్ గేమ్స్ టెస్ట్ ఈవెంట్‌లో కూడా భారత పురుషుల సెపక్ టక్రా జట్టు గోల్డ్ మెడల్ సాధించి మరోసారి ప్రపంచ దృష్టిని ఆకర్షించింది. ఈ అనూహ్య విజయంపై సౌత్ ఏషియా సెపక్ టక్రా ఆర్గనైజేషన్ అధ్యక్షుడు ఎస్.ఆర్. ప్రేమ్ రాజ్, సెపక్ టక్రా ఫెడరేషన్ ఆఫ్ ఇండియా అధ్యక్షులు శ్రీనివాసులు, జాయింట్ సెక్రటరీ పెరిక సురేష్, జనరల్ సెక్రటరీ నరేష్ కుమార్‌లు సంయుక్తంగా హర్షం వ్యక్తం చేశారు. ఆటగాళ్లు, కోచ్‌లు, మేనేజ్‌మెంట్ బృందం, ఫెడరేషన్ సభ్యుల సమిష్టి కృషితోనే ఈ స్థాయి విజయం సాధ్యమైందని వారు పేర్కొన్నారు. ఈ చారిత్రక ఘనత భవిష్యత్తులో అనేక మంది యువ ఆటగాళ్లకు ప్రేరణగా నిలిచి, సెపక్ టక్రా క్రీడను దేశంలో ప్రధాన ప్రవాహంలోకి తీసుకువస్తుందని విశ్వాసం వ్యక్తం చేశారు.

ALSO READ: ‘ఆపరేషన్ జాక్’ విజయవంతం.. భారీ మగ పులిని పట్టుకున్న రెస్క్యూ టీమ్ (VIDEO)