Valentine's Day: భారీగా హోటల్ రూమ్ బుకింగ్స్

Valentine's Day: వాలెంటైన్స్ డే అంటే ఇకపై పువ్వులు, చాక్లెట్లు, విందులకే పరిమితం కాదన్న సంకేతాలు స్పష్టంగా కనిపిస్తున్నాయి. ఈ సంవత్సరం ప్రేమికులు ఈ ప్రత్యేక సందర్భాన్ని మరింత గుర్తుండిపోయేలా మార్చుకోవడానికి ప్రయాణాలు, విహారయాత్రల వైపు మొగ్గు చూపుతున్నారు. హోటల్, ట్రావెల్ రంగాలకు సంబంధించిన డేటా ప్రకారం వాలెంటైన్స్ డే వీకెండ్‌లో బుకింగ్‌లు ఊహించని స్థాయిలో పెరిగాయి. భారతీయ జంటలు లగ్జరీ, అనుభవాలపై ఖర్చు చేయడానికి వెనకాడటం లేదని ఈ గణాంకాలు చెబుతున్నాయి.

క్లియర్‌ట్రిప్ విడుదల చేసిన సమాచారం ప్రకారం.. ఈ సంవత్సరం వాలెంటైన్స్ డే సందర్భంగా హోటల్ బుకింగ్‌లు గత ఏడాదితో పోలిస్తే ఏకంగా 175 శాతం పెరిగాయి. క్లియర్‌ట్రిప్ చీఫ్ గ్రోత్ ఆఫీసర్ మంజరి సింఘాల్ మాట్లాడుతూ.. జంటలు ఇప్పుడు ఎక్కువ రోజులు కాకుండా తక్కువ సమయం ఉన్న, కానీ ప్రత్యేక అనుభవాన్ని ఇచ్చే ప్రయాణాలను ఎక్కువగా ఇష్టపడుతున్నారని తెలిపారు. ఈ మారుతున్న అభిరుచులకు నిదర్శనంగా గౌహతికి 60 శాతం కంటే ఎక్కువగా, కొలంబోకు 65 శాతం కంటే ఎక్కువగా బుకింగ్‌లు పెరగడం కనిపిస్తోందని పేర్కొన్నారు. ఇది చిన్న అంతర్జాతీయ విహారయాత్రలకూ ఆదరణ పెరుగుతున్నట్లు సూచిస్తోంది.

రిసార్ట్ రంగంలోనూ ఇదే ధోరణి కనిపిస్తోంది. అరయ్య హోటల్స్ అండ్‌ రిసార్ట్స్ సీఈవో అమృత నాయర్ మాట్లాడుతూ.. తమ రిసార్ట్ పోర్ట్‌ఫోలియోలో వాలెంటైన్స్ డే బుకింగ్‌లు 58 శాతం నుంచి 110 శాతం వరకు పెరిగాయని తెలిపారు. మరోవైపు డేటా అనలిటిక్స్ సంస్థ రేట్‌గెయిన్ నివేదిక ప్రకారం.. వాలెంటైన్స్ వీకెండ్‌లో హోటల్ బుకింగ్‌లు గత ఏడాదితో పోలిస్తే 58 శాతం పెరిగాయి. జిమ్ కార్బెట్, గోవా, ముక్తేశ్వర్ వంటి పర్యాటక ప్రాంతాల్లో క్లారిస్సా గ్రూప్‌కు 70 నుంచి 80 శాతం వరకు అధిక డిమాండ్ కనిపిస్తోందని సమాచారం.

ఐటీసీ హోటల్స్ కూడా ఆగ్రా, జైపూర్, గురుగ్రామ్, గోవా వంటి నగరాల్లో బుకింగ్‌లలో భారీ పెరుగుదలను నమోదు చేస్తున్నాయి. జంటలు కేవలం ఎక్కువ కాలం బస చేయడమే కాకుండా, ప్రత్యేక భోజనాలు, ప్రైవేట్ సెటప్‌లు, ప్రత్యేక అనుభవాల కోసం కూడా ఎక్కువగా ఖర్చు చేస్తున్నారని హోటల్ పరిశ్రమ వర్గాలు చెబుతున్నాయి. ప్రేమ పండుగను మరింత లగ్జరీగా, గుర్తుండిపోయేలా మార్చుకోవడమే ఈ ట్రెండ్‌కు కారణమని అంటున్నారు.

విదేశీ ప్రయాణాల విషయంలోనూ ఖర్చులు పెరుగుతున్నాయి. పికీయూర్‌ట్రెయిల్ ప్రకారం.. అంతర్జాతీయ ప్రయాణ బడ్జెట్లు ఏడాదికి సగటున 20 నుంచి 33 శాతం వరకు పెరిగాయి. అదే సమయంలో కాక్స్ అండ్‌ కింగ్స్‌లో వాలెంటైన్స్ డేకు సంబంధించిన సెలవుల బుకింగ్‌లు 50 శాతం పెరిగినట్లు సంస్థ వెల్లడించింది. హోటల్ రూమ్ రేట్లు గత ఏడాదితో పోలిస్తే దాదాపు 10 శాతం పెరిగినా.. డిమాండ్ మాత్రం ఏమాత్రం తగ్గడం లేదని ట్రావెల్ రంగం చెబుతోంది. మొత్తం మీద ఈ వాలెంటైన్స్ డే టూరిజం, హోటల్ పరిశ్రమలకు భారీ ఊపునిచ్చిన సందర్భంగా మారిందని విశ్లేషకులు అంటున్నారు.

ALSO READ: చికెన్‌ను స్కిన్‌తో పాటు తింటున్నారా? అది లాభమా? నష్టమా?