అనుభవం ఉంది.. ఆశీర్వదించండి: తుమ్మల యాకయ్య

1వ వార్డులో బీఆర్ఎస్ అభ్యర్థి తుమ్మల యాకయ్య విస్తృత పర్యటన

స్టార్ త్రినేత్రం, వర్ధన్నపేట: వర్ధన్నపేట పట్టణ కేంద్రంలో మున్సిపల్‌ ఎన్నికల ప్రచారం రోజురోజుకు ఊపందుకుంటోంది. పోలింగ్‌ తేదీ సమీపిస్తుండటంతో అభ్యర్థులు ప్రజల్లో మరింతగా కనిపిస్తూ తమ వాదనలు బలంగా వినిపిస్తున్నారు. ఈ క్రమంలో 1వ వార్డు నుంచి బీఆర్ఎస్ అభ్యర్థిగా బరిలో ఉన్న తుమ్మల యాకయ్య శుక్రవారం మాజీ ఎమ్మెల్యే అరూరి రమేష్, తన మద్దతుదారులు, పార్టీ కార్యకర్తలతో కలిసి విస్తృత ప్రచార కార్యక్రమాన్ని నిర్వహించారు. కాలనీలు, గల్లీలు తిరుగుతూ ఇంటింటా ఓటర్లను కలుసుకుని తమ అభ్యర్థిత్వాన్ని వివరించారు. ప్రచారంలో ప్రజల స్పందనను గమనిస్తూ, వార్డులో ఉన్న సమస్యలను నేరుగా తెలుసుకునే ప్రయత్నం చేశారు.

ప్రచారం అనంతరం బీఆర్ఎస్ పార్టీ కార్యాలయంలో తుమ్మల యాకయ్య మీడియాతో మాట్లాడారు. తనను ప్రజలు గెలిపిస్తే వార్డులోని ప్రతి సమస్యను ప్రత్యక్షంగా తెలుసుకుని, ప్రజలకు అవసరమైన పనులను ప్రాధాన్య క్రమంలో పరిష్కరించేందుకు కృషి చేస్తానని హామీ ఇచ్చారు. రాజకీయ రంగంలో తనకు మంచి అనుభవం ఉందని, ఆ అనుభవాన్ని ప్రజల సేవకు వినియోగించాలన్నదే తన లక్ష్యమని తెలిపారు. ప్రజల ఆశీర్వాదంతో గెలిచి వార్డు అభివృద్ధికి నిరంతరం పనిచేస్తానని స్పష్టం చేశారు.

ఎన్నికల ప్రచారంలో భాగంగా ఓటర్లను కలుస్తూ వారి వ్యక్తిగత సమస్యలను కూడా శ్రద్ధగా వింటున్నట్లు తుమ్మల యాకయ్య చెప్పారు. రోజువారీ జీవనంలో ఎదురయ్యే ఇబ్బందులు, మౌలిక వసతుల కొరత వంటి అంశాలను ప్రజలు తన దృష్టికి తీసుకువస్తున్నారని తెలిపారు. తనకు అవకాశం ఇస్తే ప్రజల సమస్యల పరిష్కారమే లక్ష్యంగా పనిచేస్తానని హామీ ఇస్తున్నారు. వార్డులోని కాలనీల్లో ప్రజలకు అత్యవసరమైన వీధిలైట్లు, మంచినీటి సరఫరా, రోడ్ల మరమ్మతులు వంటి మౌలిక సదుపాయాలపై ప్రత్యేక దృష్టి సారిస్తానని చెప్పారు.

అలాగే కేంద్ర, రాష్ట్ర ప్రభుత్వాల ద్వారా అమలవుతున్న సంక్షేమ పథకాలు అర్హులైన వారికి అందేలా చర్యలు తీసుకుంటానని తుమ్మల యాకయ్య తెలిపారు. ముఖ్యంగా నిరుద్యోగ యువతీ యువకులు, మహిళలు ప్రభుత్వ పథకాల లబ్ధి పొందేలా వార్డు స్థాయిలో సహకారం అందిస్తానని అన్నారు. ప్రజలకు అందాల్సిన ప్రయోజనాలు మధ్యలో ఆగిపోకుండా పూర్తి స్థాయిలో అందించడమే తన బాధ్యతగా భావిస్తున్నానని స్పష్టం చేశారు. ఈనెల 11వ తేదీన జరగనున్న పోలింగ్‌లో కారు గుర్తుకు ఓటు వేసి తనను గెలిపించాలని ఆయన ప్రజలను విజ్ఞప్తి చేశారు. ప్రజల మద్దతుతో గెలిచి వర్ధన్నపేట 1వ వార్డును అభివృద్ధి దిశగా ముందుకు తీసుకెళ్లడమే తన సంకల్పమని తెలిపారు.

ALSO READ: Telangana: కొత్త అక్రిడిటేషన్ దరఖాస్తులకు ఆహ్వానం