Meta, Whatsappకి సుప్రీంకోర్టు స్ట్రాంగ్ వార్నింగ్‌

వాణిజ్య ప్రయోజనాల కోసం వినియోగదారుల వ్యక్తిగత సమాచారాన్ని పంచుకునే అంశంపై వాట్సాప్, మెటా సంస్థలకు సుప్రీంకోర్టు తీవ్ర స్థాయిలో హెచ్చరికలు జారీ చేసింది. గోప్యతా హక్కులు రాజ్యాంగ పరిరక్షణలో ఉన్న మౌలిక హక్కులని స్పష్టం చేస్తూ, సాధారణ పౌరుల డేటాతో ఎవరూ ఆటలాడేందుకు వీల్లేదని కోర్టు తేల్చిచెప్పింది. టెక్ దిగ్గజాలు రూపొందించే గోప్యతా విధానాలు చాలా తెలివిగా, క్లిష్టంగా ఉండటం వల్ల సాధారణ వినియోగదారులు వాటి అసలు ప్రభావాలను అర్థం చేసుకోలేకపోతున్నారని ధర్మాసనం ఆందోళన వ్యక్తం చేసింది.

సీజేఐ జస్టిస్ సూర్యకాంత్ నేతృత్వంలోని ధర్మాసనం మంగళవారం ఈ కేసును విచారిస్తూ కీలక వ్యాఖ్యలు చేసింది. వినియోగదారుల డేటాను వాణిజ్య ప్రయోజనాల కోసం ఉపయోగించరాదని స్పష్టమైన ఆదేశాలు జారీ చేసింది. “మీరు మా దేశ గోప్యతతో ఆటలాడలేరు. భారతీయుల డేటాలో ఒక్క అంకెను కూడా అనుమతి లేకుండా పంచుకోవడానికి మిమ్మల్ని అనుమతించబోం” అంటూ కోర్టు తీవ్ర స్వరంతో వ్యాఖ్యానించింది. టెక్నాలజీ పేరుతో ప్రజల ప్రైవసీని ప్రమాదంలోకి నెట్టే చర్యలను సహించేది లేదని స్పష్టం చేసింది.

వాట్సాప్ తన 2021 గోప్యతా విధానానికి సంబంధించి కాంపిటీషన్ కమిషన్ ఆఫ్ ఇండియా విధించిన రూ.213.14 కోట్ల జరిమానాను సమర్థిస్తూ నేషనల్ కంపెనీ లా అప్పీలేట్ ట్రిబ్యునల్ ఇచ్చిన తీర్పును సవాలు చేస్తూ మెటా, వాట్సాప్ సుప్రీంకోర్టును ఆశ్రయించాయి. ఈ అప్పీళ్లపై విచారణ జరుపుతున్న సమయంలోనే సర్వోన్నత న్యాయస్థానం ఈ కఠిన వ్యాఖ్యలు చేసింది. డేటా షేరింగ్ అంశం కేవలం వాణిజ్య సమస్య మాత్రమే కాదని, ఇది కోట్లాది మంది పౌరుల గోప్యతకు సంబంధించిన తీవ్రమైన అంశమని ధర్మాసనం పేర్కొంది.

వాట్సాప్ తన మాతృ సంస్థ మెటాతో వినియోగదారుల సమాచారాన్ని పంచుకోవడాన్ని కోర్టు తీవ్రంగా తప్పుబట్టింది. ఈ చర్యను “వ్యక్తిగత సమాచారాన్ని దొంగిలించే ఒక నాగరిక మార్గం”గా అభివర్ణించింది. భారతీయ పౌరుల ప్రైవసీ హక్కులతో రాజీ పడే ప్రశ్నే లేదని స్పష్టం చేసింది. భారత రాజ్యాంగాన్ని, దేశ చట్టాలను గౌరవించలేని సంస్థలు ఇక్కడ వ్యాపారం చేయాల్సిన అవసరం లేదని, అలా గౌరవించలేకపోతే దేశం విడిచి వెళ్లిపోవచ్చని సుప్రీంకోర్టు తీవ్ర స్థాయిలో హెచ్చరించింది.

ఈ నేపథ్యంలో వాణిజ్య ప్రకటనలు లేదా ఇతర లాభాల కోసం యూజర్ల డేటాను మెటాతో పంచుకోబోమని స్పష్టమైన హామీ ఇస్తూ అఫిడవిట్ దాఖలు చేయాలని మెటా యాజమాన్యాన్ని సుప్రీంకోర్టు ఆదేశించింది. తదుపరి విచారణ పూర్తయ్యే వరకు ఎలాంటి పరిస్థితుల్లోనూ మెటాతో యూజర్ల సమాచారాన్ని షేర్ చేయవద్దని వాట్సాప్‌కు తేల్చిచెప్పింది. ఈ కేసులో ఫిబ్రవరి 9 లేదా 10 తేదీల్లో వివరణాత్మక ఉత్తర్వులు వెలువడే అవకాశం ఉందని న్యాయ వర్గాలు పేర్కొంటున్నాయి.

ALSO READ: Cooking Tips: ఇలా చేస్తే దోశ పిండి పర్ఫెక్ట్‌గా రావాల్సిందే.. దోశల టేస్ట్ అదిరిపోతుంది..