మంత్రితో డ్యాన్స్ చేసింది నేనే: శాంతి స్వరూప్

Ap Politics: ఏపీ మాజీ ముఖ్యమంత్రి వైఎస్ జగన్ మోహన్ రెడ్డి ఇటీవల చేసిన వ్యాఖ్యలు రాజకీయ వర్గాల్లోనే కాదు.. వినోద రంగంలోనూ చర్చనీయాంశంగా మారాయి. మంత్రి వాసంశెట్టి సుభాష్‌పై విమర్శలు గుప్పించిన జగన్, ఓ బహిరంగ వేదికపై మాట్లాడుతూ.. స్టేజ్‌పై అశ్లీల నృత్యాలు జరిగాయంటూ తీవ్ర వ్యాఖ్యలు చేశారు. రాష్ట్రంలో మహిళలపై జరుగుతున్న ఘటనలను ప్రస్తావిస్తూ పలువురు నాయకుల ప్రవర్తనను కూడా ఆయన తప్పుబట్టారు. ఈ వ్యాఖ్యలు వెలువడిన వెంటనే రాజకీయంగా కాకుండా, నేరుగా ఆ కార్యక్రమంలో పాల్గొన్న కళాకారుడి నుంచే స్పందన రావడం ఆసక్తికరంగా మారింది.

జగన్ వ్యాఖ్యలపై ప్రముఖ జబర్దస్త్ ఆర్టిస్ట్ శాంతి స్వరూప్ తీవ్రంగా స్పందించారు. మంత్రి వాసంశెట్టి సుభాష్‌తో కలిసి స్టేజ్‌పై డ్యాన్స్ చేసింది మహిళ కాదు, తానేనని స్పష్టంగా చెప్పారు. ఈ విషయాన్ని తెలియకుండా వ్యాఖ్యలు చేయడం సరైంది కాదని ఆయన అసంతృప్తి వ్యక్తం చేశారు. తాను చేసినది ఓ కళాకారుడిగా ప్రేక్షకులను అలరించడానికేనని, అందులో ఎలాంటి అసభ్యత లేదని స్పష్టం చేశారు.

శాంతి స్వరూప్, తాను కేవలం ఒక కార్యక్రమంలోనే కాకుండా, వైసీపీకి సంబంధించిన అనేక షోల్లో కూడా పాల్గొన్నానని తెలిపారు. జగన్‌కు తెలియకపోయినా, ఆయన పార్టీకి చెందిన ఎమ్మెల్యేలు, మంత్రులకు తాను బాగా తెలిసే ఉంటానని వ్యాఖ్యానించారు. కనీసం వారినైనా అడిగి వాస్తవాలు తెలుసుకున్న తర్వాత మాట్లాడాల్సిందని సూచించారు. రాజకీయ విమర్శల్లో కళాకారులను లాగడం సరికాదని అన్నారు.

సంక్రాంతి సంబరాల సందర్భంగా మంత్రి వాసంశెట్టి సుభాష్ హైపర్ ఆది టీమ్‌ను ఆహ్వానించగా, ప్రేక్షకులను ఎంటర్‌టైన్ చేయాలనే ఉద్దేశంతో తాము ఆ కార్యక్రమానికి వెళ్లామని శాంతి స్వరూప్ వివరించారు. ప్రజల ఆనందం కోసమే ప్రదర్శన ఇచ్చామని, దానికి వేరే ఉద్దేశం ఏమీ లేదని స్పష్టం చేశారు. ఈ కార్యక్రమం పూర్తిగా పండుగ వాతావరణంలో జరిగిందని తెలిపారు.

మంత్రి వేదికపైకి వచ్చి తమతో కలిసి డ్యాన్స్ చేయలేదని, తామే ఆయన్ని సరదాగా వేదికపైకి పిలిచామని చెప్పారు. దాన్ని తప్పుగా అర్థం చేసుకుని ప్రచారం చేయడం వల్ల కళాకారులకు భవిష్యత్తులో అవకాశాలు తగ్గే ప్రమాదం ఉందని ఆవేదన వ్యక్తం చేశారు. కళను, కళాకారులను రాజకీయ విమర్శలకు బలిచేయొద్దని ఆయన కోరారు.

సంక్రాంతి సంబరాల కార్యక్రమం ఎంతో విజయవంతంగా జరిగిందని, ప్రజల నుంచి మంచి స్పందన వచ్చిందని శాంతి స్వరూప్ తెలిపారు. ఆ విజయాన్ని ఓర్వలేక కొందరు కావాలనే దుష్ప్రచారం చేస్తున్నారని ఆరోపించారు. మాట్లాడే ముందు నాయకులు ఒక్కసారి ఆలోచించి, వాస్తవాలు తెలుసుకుని మాట్లాడాలని హితవు పలికారు.

తాము చేసిన డ్యాన్స్‌లు ఎలాంటి రికార్డింగ్ డ్యాన్సులు కాదని, పూర్తిగా పద్ధతిగా, కుటుంబ ప్రేక్షకులను దృష్టిలో పెట్టుకుని చేసిన ప్రదర్శనలేనని ఆయన స్పష్టం చేశారు. అసభ్యత అన్న ఆరోపణలు పూర్తిగా నిరాధారమని అన్నారు. అంతకంటే తీవ్రమైన వీడియోలు రాజకీయ పార్టీలకు చెందినవే యూట్యూబ్‌లో ఉన్నాయని పేర్కొంటూ, వాటిపై ఎందుకు ఎవరూ మాట్లాడటం లేదని ప్రశ్నించారు.

ALSO READ: Kaushik Reddy: ఇంతటితో ముగించాలి.. క్షమాపణ చెప్పిన బీఆర్ఎస్ ఎమ్మెల్యే