Inspiration: భార్యాభర్తలకు ఒకేసారి గ్రూప్-2 ఉద్యోగాలు

జీవితంలో ఎన్నో అడ్డంకులు ఎదురైనా వెనకడుగు వేయకుండా పట్టుదలతో ముందుకు సాగితే విజయం తప్పక వరిస్తుందనడానికి ఏపీపీఎస్సీ గ్రూప్-2 తుది ఎంపిక జాబితా నిలువెత్తు నిదర్శనంగా నిలిచింది. రాష్ట్రవ్యాప్తంగా వేలాది మంది యువతకు ఈ ఫలితాలు ఆశను, ఆత్మవిశ్వాసాన్ని నింపాయి. కష్టపడి చదివి ప్రభుత్వ ఉద్యోగాలు సాధించిన అనేక మంది సక్సెస్ స్టోరీలు ఈ జాబితాలో చోటు దక్కించుకున్నాయి.

అనంతపురం జిల్లా గన్నెవారిపల్లికి చెందిన హేమచంద్ర, వినత దంపతుల విజయం ప్రత్యేకంగా నిలుస్తోంది. ఇద్దరూ సాఫ్ట్‌వేర్ రంగంలో ఉద్యోగాలు చేస్తూనే గ్రూప్-2 పరీక్షలకు సిద్ధమయ్యారు. ఉద్యోగ భారం, కుటుంబ బాధ్యతల మధ్య సమయాన్ని సద్వినియోగం చేసుకుని చదువుపై పూర్తిగా దృష్టి పెట్టారు. వారి కృషికి ఫలితంగా వినత సబ్ రిజిస్ట్రార్‌గా, హేమచంద్ర ఎక్సైజ్ ఇన్‌స్పెక్టర్‌గా ఎంపికయ్యారు.

వినత గతంలో కోర్టులో జూనియర్ అసిస్టెంట్ ఉద్యోగం వచ్చినప్పటికీ, మరింత ఉన్నత లక్ష్యంతో ఆ అవకాశాన్ని వదిలేశారు. కొంతకాలం బ్యాంకులో క్లర్క్‌గా పనిచేసినా, గ్రూప్ ఉద్యోగమే లక్ష్యంగా కష్టపడి చదివారు. చివరికి గ్రూప్-2లో విజయం సాధించి తన ఆశయాన్ని నెరవేర్చుకున్నారు. ఈ దంపతుల కథ ఎంతోమంది ఉద్యోగార్థులకు స్ఫూర్తిగా మారుతోంది.

శ్రీసత్యసాయి జిల్లాకు చెందిన అన్నదమ్ముల సక్సెస్ స్టోరీ కూడా యువతను ఉత్సాహపరుస్తోంది. కనగానపల్లికి చెందిన వేణుగోపాల్ గతంలో గ్రూప్-2 ద్వారా సీనియర్ అసిస్టెంట్‌గా ఎంపికై, ప్రస్తుతం విజయవాడ వ్యవసాయ శాఖ కమిషనర్ కార్యాలయంలో పనిచేస్తున్నారు. ఇప్పుడు మరోసారి గ్రూప్-2 రాసి డిప్యూటీ తహసీల్దార్‌గా ఎంపికయ్యారు.

వేణుగోపాల్ సోదరుడు ఓంప్రకాశ్ గతంలోనే గ్రూప్-2లో రెవెన్యూ శాఖ జూనియర్ అసిస్టెంట్‌తో పాటు జిల్లా కోర్టులో ఫీల్డ్ అసిస్టెంట్, ఎగ్జామినర్, జూనియర్ సహాయకుడి ఉద్యోగాలు సాధించారు. ప్రస్తుతం ధర్మవరం తహసీల్దార్ కార్యాలయంలో పనిచేస్తున్న ఆయన, తాజా గ్రూప్-2 ఫలితాల్లో రాష్ట్ర సచివాలయంలో ఏఎస్‌వోగా ఎంపికయ్యారు. అన్నదమ్ములిద్దరి విజయాలు కుటుంబానికే కాదు, గ్రామ యువతకూ ఆదర్శంగా నిలుస్తున్నాయి.

అనంతపురం జిల్లా బెళుగుప్పకు చెందిన కవిరాజు సక్సెస్ స్టోరీ మరింత భావోద్వేగాన్ని కలిగిస్తోంది. పుట్టుకతోనే మరుగుజ్జుగా జన్మించిన ఆయన చిన్నతనంలో నడవలేని పరిస్థితిని ఎదుర్కొన్నారు. ఆర్డీటీ స్వచ్ఛంద సంస్థ సహకారంతో రూ.12 లక్షల వ్యయంతో బెంగళూరులో చికిత్స చేయించుకున్నా, శారీరక పరిమితులు కొనసాగాయి. అయినా వాటిని అడ్డంకులుగా భావించకుండా చదువును ఆయుధంగా మార్చుకున్నారు.

బీఈడీ పూర్తి చేసిన కవిరాజు 2012 డీఎస్సీలో ఎస్జీటీగా ఉద్యోగం సాధించారు. ఉద్యోగం చేస్తూనే గ్రూప్-1కు సిద్ధమై రెండో ప్రయత్నంలో ఎంపీడీవోగా ఎంపికయ్యారు. అయితే ఉపాధ్యాయ వృత్తిపై ఉన్న మక్కువతో అదే వృత్తిలో కొనసాగారు. తాజాగా గ్రూప్-2లో విజయం సాధించి సబ్ రిజిస్ట్రార్‌గా ఎంపిక కావడం మరో ఘనతగా నిలిచింది.

ఇదిలా ఉండగా, ఏపీపీఎస్సీ గ్రూప్-2 తుది ఎంపిక జాబితా విడుదలకు గణనీయమైన జాప్యం జరిగింది. 2023లో 905 పోస్టులకు నోటిఫికేషన్ ఇచ్చినా, కోర్టు కేసులు, రిజర్వేషన్ రోస్టర్ సమస్యలు, స్పోర్ట్స్ కోటా వివాదాల కారణంగా ప్రక్రియ ఆలస్యమైంది. 2023 డిసెంబర్ 7న నోటిఫికేషన్ విడుదల కాగా, 2024 ఫిబ్రవరి 25న ప్రిలిమినరీ పరీక్ష, 2025 ఫిబ్రవరి 23న మెయిన్స్ పరీక్షలు నిర్వహించారు. ఫలితాలు 2025 ఏప్రిల్ 4న వెలువడగా, ఇప్పుడు తుది జాబితా విడుదలైంది. ఈ సుదీర్ఘ నిరీక్షణ తర్వాత వచ్చిన ఫలితాలు వేలాది మంది అభ్యర్థుల జీవితాల్లో కొత్త వెలుగులు నింపుతున్నాయి.

ALSO READ: Andhra Pradesh: ఇల్లు లేనివారికి ప్రభుత్వం గుడ్ న్యూస్