సమ్మక్క సారలమ్మ జాతరకు కేంద్రమంత్రి జుయల్ ఓరం

స్టార్ త్రినేత్రం, వరంగల్: ఆసియాలోనే అతిపెద్ద గిరిజన జాతరగా ప్రపంచవ్యాప్తంగా గుర్తింపు పొందిన సమ్మక్క సారలమ్మ మహాజాతరకు మరో ప్రత్యేక ఆకర్షణ జతకానుంది. గురువారం కేంద్ర గిరిజన వ్యవహారాల శాఖ మంత్రి జుయల్ ఓరం మేడారం జాతరలో పాల్గొని అమ్మవార్లకు ప్రత్యేక పూజలు నిర్వహించనున్నారు. ఈ విషయాన్ని రాష్ట్ర గిరిజన సంక్షేమ శాఖ మంత్రి అడ్లూరి లక్ష్మణ్ కుమార్ కార్యాలయం అధికారికంగా వెల్లడించింది. కేంద్ర మంత్రి హాజరు కావడం జాతరకు మరింత ప్రాధాన్యతను తీసుకొచ్చిందని అధికారులు పేర్కొంటున్నారు.

ఇటీవల హైదరాబాద్‌లోని కన్హా శాంతివనంలో నిర్వహించిన గిరిజన గ్రామీణ వైద్య సహకారుల సదస్సు సందర్భంగా ఈ ఆహ్వానం చోటుచేసుకుంది. ఆ సదస్సులో పాల్గొన్న కేంద్ర మంత్రి జుయల్ ఓరంను రాష్ట్ర గిరిజన సంక్షేమ శాఖ మంత్రి అడ్లూరి లక్ష్మణ్ కుమార్ ప్రత్యేకంగా కలిశారు. ఈ సందర్భంగా సమ్మక్క సారలమ్మ జాతర ఆహ్వాన పత్రికను రాష్ట్ర ప్రభుత్వం తరపున కేంద్ర మంత్రికి అందజేశారు.

సమ్మక్క సారలమ్మ జాతర విశిష్టత, గిరిజన సంప్రదాయాలు, శతాబ్దాల చరిత్ర కలిగిన ఆధ్యాత్మిక ప్రాశస్త్యతను మంత్రి అడ్లూరి లక్ష్మణ్ కుమార్ కేంద్ర మంత్రికి వివరించారు. గిరిజన సంస్కృతి, ఆచారాలకు ఈ జాతర ప్రతీకగా నిలుస్తోందని, కోట్లాది మంది భక్తుల విశ్వాసాలతో ముడిపడి ఉందని వివరించారు. ఈ వివరాలు విన్న జుయల్ ఓరం తప్పకుండా జాతరలో పాల్గొంటానని హామీ ఇచ్చారు.

కేంద్ర మంత్రి ఇచ్చిన హామీ మేరకు గురువారం మేడారం జాతరకు హాజరవుతున్నారు. ఉదయం హెలిప్యాడ్ ద్వారా కేంద్ర మంత్రి మేడారానికి చేరుకోనున్నారు. అక్కడే రాష్ట్ర గిరిజన సంక్షేమ శాఖ మంత్రి అడ్లూరి లక్ష్మణ్ కుమార్ ఆయనకు అధికారికంగా స్వాగతం పలకనున్నారు. అనంతరం కేంద్ర మంత్రిని వెంటబెట్టుకొని జాతర ప్రాంగణానికి తీసుకెళ్లనున్నారు.

సమ్మక్క సారలమ్మ దేవస్థానాన్ని సందర్శించే సందర్భంగా కేంద్ర మంత్రి ప్రత్యేక పూజలు నిర్వహించనున్నారు. అమ్మవార్ల గద్దెల వద్ద సంప్రదాయబద్ధంగా పూజలు చేసి భక్తితో మొక్కులు చెల్లించనున్నారు. ఈ పూజా కార్యక్రమాలకు గిరిజన పూజారులు శాస్త్రోక్తంగా ఏర్పాట్లు చేస్తున్నారు. కేంద్ర మంత్రి పూజలు చేయడం గిరిజన సమాజానికి గర్వకారణంగా భావిస్తున్నారు.

కేంద్ర మంత్రి పర్యటన నేపథ్యంలో జిల్లా యంత్రాంగం ప్రత్యేక ఏర్పాట్లు చేపట్టింది. భద్రత, రాకపోకలు, పూజా కార్యక్రమాలు ఎలాంటి ఇబ్బందులు లేకుండా నిర్వహించేందుకు అధికారులు సమన్వయంతో పనిచేస్తున్నారు. ఇప్పటికే లక్షలాది మంది భక్తులు మేడారం చేరుకుంటుండటంతో భద్రతను మరింత కట్టుదిట్టం చేశారు.

ALSO READ: Medaram: పేలిపోతున్న మటన్, చికెన్ ధరలు