KCR: ఆసియా ఖండంలోనే అతిపెద్ద గిరిజన జాతర ‘మేడారం’

రాష్ట్ర ప్రజలకు కేసీఆర్ శుభాకాంక్షలు

బీఆర్ఎస్ హయాంలో గిరిజన సంస్కృతికి పెద్దపీట

KCR: ఆసియా ఖండంలోనే అతిపెద్ద గిరిజన జాతరగా ప్రసిద్ధి పొందిన మేడారం సమ్మక్క-సారలమ్మ ఉత్సవాలు పురస్కరించుకుని మాజీ సీఎం కేసీఆర్ రాష్ట్ర ప్రజలకు శుభాకాంక్షలు తెలిపారు. తెలంగాణ గడ్డ త్యాగానికి, ఆత్మగౌరవానికి, అన్యాయంపై ఎదిరించే ధిక్కారానికి ఆదివాసీ దేవతలు నిలువెత్తు నిదర్శనం అని ఆయన కొనియాడారు. భక్తులు కోరిన కోరికలు తీర్చే కొంగు బంగారంగా భావించే ఈ ఇలవేల్పులకు మొక్కులు చెల్లించుకోవడానికి దేశ నలుమూలల నుంచి కోట్లాదిగా తరలివచ్చి, మేడారం ప్రాంతాన్ని ఆధ్యాత్మిక కేంద్రంగా మలచుతారు. ఈ జనసందోహం కుంభమేళా వాతావరణాన్ని కలిగిస్తుందని ఆయన పేర్కొన్నారు.

గోదావరి పరీవాహక ప్రాంతంలోని ఆధ్యాత్మిక అభివృద్ధిని స్మరించుకుంటూ, సబ్బండ వర్గాల సంస్కృతికి తన పదేళ్ల పాలనలో సముచిత గౌరవం దక్కిందని కూడా కేసీఆర్ గుర్తు చేశారు. గత బీఆర్ఎస్ ప్రభుత్వ హయాంలో ఆదివాసీ, గిరిజన సమాజాల ఆచార, సంస్కృతికి పెద్దపీట వేయబడిన అంశాలను ప్రస్తావించారు. గోదావరి లోయ ప్రాంత ప్రగతితో సమాంతరంగా ఆధ్యాత్మిక రంగ అభివృద్ధిని కూడా పునఃస్థాపన పథంలో నడిపించామని తెలిపారు. రాష్ట్రంలోని అన్ని రంగాలు అభివృద్ధి పథంలో నడవాలని, ప్రజలు సుఖసంతోషాలతో, సుభిక్షంగా జీవించాలనీ ఆ దేవతలను ఆయన ప్రార్థిస్తున్నట్లు తెలిపారు. భక్తుల కష్టాలను తీర్చే శక్తి ఆ వనదేవతలకు ఉందని ఆయన విశ్వాసం వ్యక్తం చేశారు.

ములుగు జిల్లా తాడ్వాయి మండలంలోని మేడారం అటవీ ప్రాంతంలో ప్రతి రెండు సంవత్సరాలకొకసారి జరిగే ఈ మహాజాతర చారిత్రక ప్రాధాన్యం కలిగింది. కాకతీయ పాలకుల నిరంకుశత్వాన్ని ఎదుర్కొని, పన్నుల భారాన్ని తట్టుకుని పోరాడిన తల్లీకూతుళ్లు సమ్మక్క-సారలమ్మల పరాక్రమానికి ఇది ప్రతీక. జాతరలో భక్తులు జంపన్న వాగులో పుణ్యస్నానాలు ఆచరిస్తారు. అమ్మవార్లకు తమ బరువుకు సరిపడా ఎత్తుబెల్లం (బంగారం) సమర్పించడం ఈ ఉత్సవానికి ప్రత్యేకత. కేవలం తెలంగాణ మాత్రమే కాదు.. మహారాష్ట్ర, చత్తీస్‌గఢ్, ఆంధ్రప్రదేశ్ తదితర రాష్ట్రాల నుంచి భక్తులు తరలివచ్చి అమ్మవార్లను దర్శించుకుంటారు.

ALSO READ: Dharmapuri Arvind: నేను, రఘునందన్ రావు కలిస్తే బీఆర్ఎస్ గల్లంతే!