ఓపెన్ ఇయర్ డిజైన్‌తో రూపొందించిన ఇయర్‌బడ్స్‌కు ఆదరణ పెరుగుతున్న నేపథ్యంలో OnePlus Buds Clip ప్రత్యేకంగా నిలుస్తోంది. చెవులను పూర్తిగా మూసివేయకుండా సంగీతాన్ని వినేలా రూపొందించిన ఈ ఇయర్‌బడ్స్‌లో ఆడియో నాణ్యత, కాల్స్‌ స్పష్టత, బ్యాటరీ సామర్థ్యానికి ప్రాధాన్యం ఇచ్చినట్లు వివరాలు సూచిస్తున్నాయి. ఒక్కసారి ఛార్జ్‌తో ఇయర్బడ్స్ 8 గంటల వరకు, ఛార్జింగ్ కేసుతో కలిపి మొత్తం 36 గంటల వరకు బ్యాటరీ బ్యాకప్ అందిస్తాయని పేర్కొన్నారు. అయితే, భారత మార్కెట్‌లో విడుదల తేదీ, ధర, లభ్యతకు సంబంధించిన అధికారిక వివరాలు వెల్లడైన తర్వాతే పూర్తి స్పష్టత రానుంది.
డ్యూయల్ డ్రైవర్లతో ఆడియో అనుభవం
OnePlus Buds Clipలో సంప్రదాయ ఇయర్‌బడ్స్‌కు భిన్నంగా క్లిప్ తరహా నిర్మాణాన్ని అందించారు. ఇందులో 11ఎంఎం, 9ఎంఎం పరిమాణాల రెండు డైనమిక్ డ్రైవర్లు ఉన్నట్లు సమాచారం. ఎల్‌హెచ్‌డీసీ 5.0, ఏఏసీ, ఎస్‌బీసీ ఆడియో కోడెక్‌లకు మద్దతుతో పాటు 10-బ్యాండ్ ఈక్వలైజర్‌, బాస్‌ సర్దుబాటు కోసం బేస్‌వేవ్‌ ఫీచర్‌ను అందించారు. సౌండ్‌ బయటివారికి ఎక్కువగా వినిపించకుండా నియంత్రించేందుకు ప్రైవేట్ సౌండ్‌స్టేజ్‌ సదుపాయం కూడా ఉన్నట్లు పేర్కొన్నారు. అయితే, ఓపెన్ ఇయర్ డిజైన్ కారణంగా పరిసరాల్లోని శబ్దాలు వినిపించే అవకాశం ఉంటుంది.
కాల్స్‌, కనెక్టివిటీ, ఇతర ఫీచర్లు.
కాల్స్‌ సమయంలో స్పష్టమైన వాయిస్‌ కోసం ప్రతి ఇయర్‌బడ్‌లో 2 మెమ్స్‌ మైక్రోఫోన్లు, ఒక వీపీయూ మైక్రోఫోన్‌ ఉన్నట్లు వివరాలు చెబుతున్నాయి. ఏఐ బోన్ కాల్‌ సాంకేతికత పరిసరాల శబ్దాల ప్రభావాన్ని తగ్గించడంలో సహాయపడుతుంది. 6 నానోమీటర్ల ఏఐ ఆడియో చిప్‌, బ్లూటూత్‌ 6.1 మద్దతుతో పాటు రెండు పరికరాలకు ఒకేసారి అనుసంధానమయ్యే సదుపాయం కూడా ఉంది. గూగుల్ ఫాస్ట్ పెయిర్‌, మైక్రోసాఫ్ట్ స్విఫ్ట్ పెయిర్‌, ఏఐ అనువాదం, టచ్‌ నియంత్రణలు, డ్రాప్ మానిటర్‌ వంటి ఫీచర్లు అందుబాటులో ఉంటాయని పేర్కొన్నారు.
36 గంటల బ్యాటరీ బ్యాకప్
బ్యాటరీ సామర్థ్యం విషయానికి వస్తే, ఒక్కో ఇయర్‌బడ్‌లో 58 ఎంఏహెచ్‌, ఛార్జింగ్ కేసులో 530 ఎంఏహెచ్‌ బ్యాటరీని అందించినట్లు సమాచారం. యూఎస్‌బీ టైప్‌-సీ ద్వారా ఛార్జింగ్ చేసుకోవచ్చు. ఒక్కో ఇయర్‌బడ్‌ బరువు 3.9 గ్రాములు కాగా, ఛార్జింగ్ కేసు బరువు 35.9 గ్రాములు. ఐపీ55 రేటింగ్‌ దుమ్ము, నీటి తుంపర్ల నుంచి రక్షణ కల్పిస్తుంది. పెర్ల్ వైట్‌, పెబుల్ గ్రే, ట్విలైట్ రోజ్‌ రంగుల్లో ఈ ఇయర్బడ్స్ రానున్నట్లు సమాచారం. ధర, భారత విడుదల తేదీపై కంపెనీ అధికారిక ప్రకటన కోసం వినియోగదారులు వేచి చూడాల్సి ఉంది.
