Andhra Pradesh: ఆంధ్రప్రదేశ్‌లో రేషన్ కార్డు కలిగిన కుటుంబాలకు రాష్ట్ర ప్రభుత్వం మరో కీలక నిర్ణయం తీసుకుంది. ఇప్పటికే రేషన్ దుకాణాల ద్వారా బియ్యం, పంచదార, రాగులు, జొన్నలు వంటి నిత్యావసర వస్తువులను అందిస్తున్న ప్రభుత్వం, ఇప్పుడు ప్రజలకు మరింత ప్రయోజనం చేకూరేలా మినీ మార్టుల ఏర్పాటుకు గ్రీన్ సిగ్నల్ ఇచ్చింది. ఈ విషయాన్ని రాష్ట్ర పౌరసరఫరాలశాఖ మంత్రి నాదెండ్ల మనోహర్ వెల్లడించారు.
ప్రభుత్వ ప్రణాళిక ప్రకారం తొలి విడతలో రాష్ట్రవ్యాప్తంగా 1,000 మినీ మార్టులను ఏర్పాటు చేయనున్నారు. ఈ మార్టుల ద్వారా రేషన్ కార్డు కలిగిన వారికి నాణ్యమైన నిత్యావసర వస్తువులను రాయితీ ధరలకు అందించనున్నారు. దీంతో సాధారణ కుటుంబాలపై పెరుగుతున్న జీవన వ్యయ భారం కొంత మేర తగ్గే అవకాశం ఉంది.
రాయితీ ధరల్లో నిత్యావసర సరుకులు
ప్రతిపాదిత మినీ మార్టుల్లో పంచదార, గోధుమ పిండి, పామాయిల్, మిల్లెట్స్‌తో పాటు ఇతర నిత్యావసర వస్తువులు కూడా అందుబాటులో ఉంటాయి. సూపర్ మార్కెట్ల తరహాలో రూపొందించే ఈ మార్టుల్లో వినియోగదారులకు అవసరమైన నాణ్యమైన సరుకులు ఒకేచోట లభించనున్నాయి.
జాతీయ సహకార వినియోగదారుల సమాఖ్య సహకారంతో ఈ ప్రాజెక్టును అమలు చేయనున్నట్లు సమాచారం. ప్రారంభ దశలో నగరాలు, పట్టణ ప్రాంతాల్లో వీటిని ఏర్పాటు చేసి, తర్వాత ఇతర ప్రాంతాలకు విస్తరించే అవకాశం ఉంది.
ప్రస్తుతం బహిరంగ మార్కెట్లో నిత్యావసర వస్తువుల ధరలు పెరుగుతున్న నేపథ్యంలో, పేద మరియు మధ్యతరగతి కుటుంబాలకు తక్కువ ధరల్లో సరుకులు అందించాలనే లక్ష్యంతో ప్రభుత్వం ఈ నిర్ణయం తీసుకున్నట్లు తెలుస్తోంది.
రేషన్ షాపుల్లో స్టీమ్ రైస్
రాష్ట్ర ప్రభుత్వం మరో కీలక నిర్ణయం కూడా తీసుకుంది. ఇకపై రేషన్ దుకాణాల ద్వారా స్టీమ్ రైస్ పంపిణీ చేయడానికి చర్యలు చేపడుతోంది. దీనికి కేంద్ర ప్రభుత్వం కూడా అంగీకారం తెలిపినట్లు వెల్లడించారు.
స్టీమ్ రైస్ పంపిణీ వల్ల నాణ్యమైన బియ్యం ప్రజలకు అందుతుందని, రేషన్ బియ్యం అక్రమ మళ్లింపులను నియంత్రించడంలో కూడా ఇది ఉపయోగపడుతుందని ప్రభుత్వం భావిస్తోంది. తొలుత మధ్యాహ్న భోజన పథకంలో పైలట్ ప్రాజెక్టుగా స్టీమ్ రైస్‌ను వినియోగించి, అనంతరం రేషన్ దుకాణాల్లో ప్రవేశపెట్టనున్నారు.
డిజిటల్ రూపాయి వాలెట్ విధానం
రేషన్ పంపిణీ వ్యవస్థను మరింత ఆధునికీకరించేందుకు ప్రభుత్వం డిజిటల్ రూపాయి వాలెట్ విధానాన్ని కూడా అమలు చేయాలని నిర్ణయించింది. ఈ విధానం ద్వారా వినియోగదారులు తమ అవసరాలకు అనుగుణంగా సరుకులు ఎంపిక చేసుకుని డిజిటల్ రూపంలో చెల్లింపులు చేయగలరు.
ఈ పథకాన్ని తొలుత విశాఖపట్నంలో పైలట్ ప్రాజెక్టుగా అమలు చేసి, విజయవంతమైతే రాష్ట్రవ్యాప్తంగా విస్తరించనున్నారు. రేషన్ వ్యవస్థను మరింత ప్రజా అనుకూలంగా మార్చడం, నాణ్యమైన సరుకులను తక్కువ ధరలకు అందించడం, డిజిటల్ సేవలను ప్రోత్సహించడం వంటి లక్ష్యాలతో ప్రభుత్వం ఈ చర్యలు చేపడుతున్నట్లు అధికారులు పేర్కొంటున్నారు.
ALSO READ: Ponguleti Srinivas: ప్రభుత్వ భూముల పరిరక్షణలో ఎలాంటి రాజీ ఉండదు
