Telangana: టీజీఎస్‌ఆర్టీసీ కార్మికుల సమ్మె ఉద్రిక్తతల మధ్య రాష్ట్ర ముఖ్యమంత్రి రేవంత్ రెడ్డి కీలకంగా స్పందించారు. ఆర్టీసీ సమస్యలపై రాష్ట్ర మంత్రివర్గంలో ప్రత్యేకంగా చర్చించినట్లు తెలిపారు. ఈ సందర్భంగా కార్మికులు ఆవేశపూరిత నిర్ణయాలకు లోనవ్వకూడదని విజ్ఞప్తి చేస్తూ, ప్రాణాలు తీసుకోవడం ద్వారా ఎలాంటి సమస్యలు పరిష్కారం కావని స్పష్టం చేశారు. కార్మికుల సమస్యలను పరిష్కరించడంలో ప్రభుత్వం పూర్తి చిత్తశుద్ధితో ఉందని, ఉప ముఖ్యమంత్రి భట్టి ఆధ్వర్యంలో ఏప్రిల్ 24న కార్మిక సంఘాలతో కీలక సమావేశం నిర్వహించనున్నట్లు వెల్లడించారు. కార్మికుల డిమాండ్లను సానుకూలంగా పరిశీలిస్తామని హామీ ఇచ్చారు. ఇదే సమయంలో మంత్రి శ్రీధర్ బాబు కూడా స్పందిస్తూ, కార్మికులు సంయమనం పాటించి సమ్మెను విరమించాలని కోరారు. తొందరపాటు నిర్ణయాలు తీసుకోవడం వల్ల మరింత సమస్యలు తలెత్తుతాయని హెచ్చరిస్తూ, ప్రాణాలకు హాని కలిగించే చర్యలకు దూరంగా ఉండాలని సూచించారు. ప్రభుత్వం చర్చలకు సిద్ధంగా ఉందని, సమస్యల పరిష్కారానికి కట్టుబడి ఉందని తెలిపారు. ప్రేరేపిత శక్తుల ప్రభావానికి లోనవ్వకుండా ఆలోచించి నిర్ణయాలు తీసుకోవాలని, క్షణికావేశం వల్ల కుటుంబాలు నష్టపోకుండా జాగ్రత్తగా ఉండాలని పిలుపునిచ్చారు.
ఆర్టీసీ సమ్మె అంశంపై కేబినెట్‌లో విస్తృతంగా చర్చ జరిగినట్లు మంత్రి శ్రీధర్ బాబు వివరించారు. ప్రజల ప్రభుత్వం, కార్మికుల ప్రభుత్వం అనే భావనతో ముందుకు సాగుతున్న ఈ పాలనలో కార్మికుల సమస్యలను నిర్లక్ష్యం చేయబోమని చెప్పారు. కేబినెట్ ఎజెండా ప్రారంభానికి ముందే ఈ అంశాన్ని ప్రాధాన్యంగా తీసుకుని చర్చించినట్లు వెల్లడించారు. ఉప ముఖ్యమంత్రి భట్టి ఆధ్వర్యంలో జరిగే చర్చలు కీలకంగా మారనున్నాయని, కార్మికులు ఆవేశానికి లోనవకుండా చర్చలకు హాజరై సమస్యలను పరిష్కరించుకోవాలని సూచించారు. మరోవైపు రవాణా శాఖ మంత్రి పొన్నం ప్రభాకర్ మాట్లాడుతూ, ఆర్టీసీ సమస్యలను పరిష్కరించడం ప్రభుత్వ బాధ్యత అని స్పష్టం చేశారు. కొంత ఆలస్యమైనా కేబినెట్ స్థాయిలో చర్చకు తీసుకువచ్చామని, కార్మికుల సమస్యల పరిష్కారం కోసం మంత్రుల ఆధ్వర్యంలో ప్రత్యేక కమిటీ ఏర్పాటు చేసినట్లు తెలిపారు. జేఏసీ నాయకులతో ఏప్రిల్ 24న చర్చలు జరపనున్నట్లు వెల్లడించారు. ఎలక్ట్రిక్ బస్సుల కారణంగా ఉద్యోగాలు కోల్పోతారన్న ప్రచారం అసత్యమని ఖండిస్తూ, కార్మికుల సంక్షేమం కోసం ప్రభుత్వం కట్టుబడి ఉందని స్పష్టం చేశారు.
ఇదిలా ఉండగా రాష్ట్రవ్యాప్తంగా ఆర్టీసీ సమ్మె ఉద్రిక్తతల నేపథ్యంలో ముగ్గురు కార్మికులు ఆత్మహత్యాయత్నానికి పాల్పడడం కలకలం రేపింది. ఆర్టీసీ డ్రైవర్ శంకర్ గౌడ్ ఆరోగ్య పరిస్థితిపై ఎంజీఎం ఆసుపత్రి వైద్యులు హెల్త్ బులెటిన్ విడుదల చేశారు. ఆయనకు 60-80శాతం వరకు కాలిన గాయాలు అయినట్లు తెలిపారు. మంటల ప్రభావంతో ఊపిరితిత్తులు తీవ్రంగా దెబ్బతిన్నాయని, మెరుగైన చికిత్స కోసం హైదరాబాద్‌లోని యశోద ఆసుపత్రికి తరలించినట్లు వెల్లడించారు. ప్రస్తుతం వెంటిలేటర్‌పై చికిత్స అందిస్తున్నామని, మాట్లాడే పరిస్థితిలో లేరని, అయితే చికిత్సకు స్పందిస్తున్నారని వైద్యులు తెలిపారు. ఈ ఘటనలు రాష్ట్రవ్యాప్తంగా ఆందోళనకు దారితీయగా, కార్మికులు ఆత్మవిశ్వాసంతో ముందుకు వచ్చి చర్చల ద్వారా సమస్యలను పరిష్కరించుకోవాలని ప్రభుత్వం పునరుద్ఘాటిస్తోంది.
ALSO READ: Romantic Thriller: పచ్చని కాపురంలో నిప్పులు పోసే మాయ లేడీ.. ఓటీటీలో గత్తరలేపుతోంది సామీ
