CM Revanth Reddy: తాను తెలంగాణ ప్రదేశ్ కాంగ్రెస్ కమిటీ అధ్యక్షుడిగా బాధ్యతలు స్వీకరించిన సమయంలో పార్టీ తీవ్ర క్లిష్ట పరిస్థితుల్లో ఉందని ముఖ్యమంత్రి రేవంత్ రెడ్డి పేర్కొన్నారు. ఆ దశలో పార్టీ అంతర్గతంగా అనేక సవాళ్లు ఎదురయ్యాయని, కొందరు నేతల నుంచి వ్యతిరేక స్వరాలు వినిపించాయని ఆయన గుర్తు చేసుకున్నారు. అయితే విభేదాలను పెంచకుండా, ప్రతి నాయకుడిని వ్యక్తిగతంగా కలుసుకుని తన ఆలోచనలను వివరించానని, సమన్వయం సాధించేందుకు కృషి చేశానని వెల్లడించారు. అందరి సహకారం, సమిష్టి కృషి వల్లే తెలంగాణలో కాంగ్రెస్ మళ్లీ పుంజుకుందని ఆయన స్పష్టం చేశారు. వికార్‌బాద్ జిల్లా అనంతగిరిలో నిర్వహించిన ఆంధ్రప్రదేశ్, తెలంగాణ జిల్లా కాంగ్రెస్ కమిటీ అధ్యక్షుల ప్రత్యేక శిక్షణ కార్యక్రమాన్ని ఆయన ప్రారంభిస్తూ ఈ వ్యాఖ్యలు చేశారు.
అనంతగిరి కొండల పరిసరాల్లోని హరిత వసతి గృహంలో ఈ శిక్షణ కార్యక్రమం శనివారం ప్రారంభమైంది. తెలుగు రాష్ట్రాలకు చెందిన జిల్లా కాంగ్రెస్ కమిటీ అధ్యక్షులు పాల్గొన్న ఈ శిక్షణ తరగతులు నేటి నుంచి 10 రోజుల పాటు, మార్చి 2 వరకు కొనసాగనున్నాయి. పార్టీ బలోపేతం, సంస్థాగత నిర్మాణం, ప్రజలతో అనుసంధానం వంటి అంశాలపై విస్తృత చర్చలు జరగనున్నాయి. ఈ కార్యక్రమంలో తెలంగాణ ప్రదేశ్ కాంగ్రెస్ కమిటీ అధ్యక్షుడు మహేశ్ కుమార్ గౌడ్, ఆంధ్రప్రదేశ్ ప్రదేశ్ కాంగ్రెస్ కమిటీ అధ్యక్షురాలు వైఎస్ షర్మిలా, పార్టీ వ్యవహారాల ఇన్చార్జి మీనాక్షి నటరాజన్‌తో పాటు పలువురు మంత్రులు, ముఖ్య నాయకులు హాజరయ్యారు.
కాంగ్రెస్ పార్టీలో భిన్నాభిప్రాయాలను వ్యక్తపరచే స్వేచ్ఛ ఉందని ముఖ్యమంత్రి స్పష్టం చేశారు. అభిప్రాయ భేదాలు ఉన్నంత మాత్రాన ఎవరినీ వేధించే సంస్కృతి కాంగ్రెస్‌లో లేదన్నారు. పార్టీలో అవకాశాలు కేవలం ప్రతిభ, పనితీరు ఆధారంగానే లభిస్తాయని ఆయన పేర్కొన్నారు. అంతర్గత కలహాలు పెరిగితే పార్టీ కోసం కష్టపడుతున్న లక్షలాది కార్యకర్తలకు అన్యాయం చేసినట్లవుతుందని అభిప్రాయపడ్డారు. నాయకులు వ్యక్తిగత విభేదాలను పక్కనపెట్టి పార్టీ బలోపేతానికి కృషి చేయాలని సూచించారు.
డీసీసీ అధ్యక్షులుగా సమర్థంగా పనిచేసిన వారికి ఎమ్మెల్యే టిక్కెట్లు ఇచ్చామని, అవకాశం రాని వారికి ఎమ్మెల్సీ పదవులు కల్పించామని ఆయన వివరించారు. పార్టీ కోసం కృషి చేసిన మరో 60 మందికి సంస్థాగత పదవులు ఇచ్చామని తెలిపారు. ప్రతి నాయకుడి పనితీరుపై నిరంతర పర్యవేక్షణ ఉంటుందని, శ్రమించే వారికి తప్పకుండా న్యాయం జరుగుతుందని హామీ ఇచ్చారు. డీసీసీ పదవి అత్యంత విలువైనదని, దానిని బాధ్యతతో నిర్వర్తించాలని సూచించారు. మంచి ప్రతిభ కనబరిస్తే ఎమ్మెల్యే, మంత్రి, ముఖ్యమంత్రి పదవులు కూడా అందుబాటులో ఉంటాయని చెప్పారు. నాయకులు ఎల్లప్పుడూ ప్రజల్లో ఉండాలని, ఉమ్మడి రాష్ట్ర కాలంలో వైఎస్ రాజశేఖర్ రెడ్డి పాదయాత్ర ద్వారా ప్రజల మధ్య నెలల తరబడి గడిపిన విషయాన్ని గుర్తుచేశారు.
ప్రజల సమస్యలను అర్థం చేసుకునేందుకు రాహుల్ గాంధీ కన్యాకుమారి నుంచి కశ్మీర్ వరకు పాదయాత్ర నిర్వహించినట్లు ఆయన పేర్కొన్నారు. 140 ఏళ్ల చరిత్ర కలిగిన కాంగ్రెస్ పార్టీ 140 కోట్ల ప్రజలకు స్ఫూర్తిగా నిలుస్తోందన్నారు. దేశానికి స్వాతంత్ర్యం తీసుకొచ్చిన పార్టీ కాంగ్రెస్ అని, స్వాతంత్ర్యం అనంతరం ఏర్పడిన కొన్ని పార్టీలు ఇప్పుడు కాంగ్రెస్ ముక్త్ భారత్ అంటూ నినాదాలు చేస్తున్నాయని విమర్శించారు. రాజ్యాంగ సవరణ పేరుతో రిజర్వేషన్లను రద్దు చేసే కుట్రలు జరుగుతున్నాయని ఆరోపించారు.
ఎవరికి వారసత్వంగా హోదాలు రాలేదని స్పష్టం చేస్తూ, మోతిలాల్ నెహ్రూ దేశం కోసం తన ఆస్తిని త్యాగం చేశారని తెలిపారు. జవహర్ లాల్ నెహ్రూ స్వాతంత్ర్య సమరంలో జైలు శిక్ష అనుభవించారని గుర్తుచేశారు. మాజీ ప్రధానులు ఇందిరా గాంధీ, రాజీవ్ గాంధీ దేశం కోసం ప్రాణత్యాగం చేశారని వివరించారు. కాంగ్రెస్ పార్టీ త్యాగాల చరిత్రతో నిలిచిన సంస్థ అని ఆయన పేర్కొన్నారు.
ALSO READ: Shikhar Dhawan: వివాహ బంధంలోకి అడుగుపెట్టిన మాజీ క్రికెటర్
