Indian Railways: దేశంలో తొలి హైడ్రోజన్ రైలు.. త్వరలోనే ప్రారంభం.. ఫీచర్లు చూస్తే..

Indian Railways: దేశంలో పర్యావరణ పరిరక్షణతో పాటు ఆధునిక రైల్వే సాంకేతికతకు మరింత ప్రాధాన్యం ఇస్తూ భారతీయ రైల్వే మరో చారిత్రాత్మక ఘట్టాన్ని నమోదు చేసింది. దేశంలోనే తొలి హైడ్రోజన్ ఇంధనంతో నడిచే రైలును విజయవంతంగా పరీక్షించి స్వచ్ఛమైన రవాణా వ్యవస్థ దిశగా కీలక అడుగు వేసింది. హర్యానాలోని జింద్-సోనిపట్ రైల్వే మార్గంలో శుక్రవారం నిర్వహించిన ట్రయల్ రన్ విజయవంతంగా పూర్తికాగా, ఈ రైలును గంటకు 120 కిలోమీటర్ల వేగంతో పరీక్షించారు. మిగిలిన సాంకేతిక ప్రక్రియలు, భద్రతా ధ్రువీకరణలు పూర్తైన అనంతరం ప్రయాణికులకు అందుబాటులోకి తీసుకురానున్నారు. ప్రారంభ దశలో జింద్-సోనిపట్ మార్గంలోనే ఈ రైలు సేవలు అందించనుండగా, ప్రపంచంలోనే అత్యంత పొడవైన, అత్యధిక శక్తి సామర్థ్యంతో రూపొందించిన హైడ్రోజన్ రైలుగా దీనిని అధికారులు పేర్కొంటున్నారు. ఈ విజయంతో హైడ్రోజన్ రైళ్లను వినియోగిస్తున్న జర్మనీ, జపాన్, చైనా, అమెరికా వంటి దేశాల సరసన భారత్ కూడా చేరింది.

ఈ హైడ్రోజన్ రైలును అత్యాధునిక సాంకేతికతతో రూపొందించారు. మొత్తం 10 కోచ్‌లతో కూడిన ఈ రైలులో 2 డ్రైవింగ్ పవర్ కార్లు, 8 ప్రయాణికుల కోచ్‌లు ఉంటాయి. ప్రతి పవర్ కారులో 1,200 కిలోవాట్ల సామర్థ్యమున్న హైడ్రోజన్ ఫ్యూయల్ సెల్ వ్యవస్థ అమర్చగా, మొత్తం రైలు అధిక శక్తితో సమర్థవంతంగా ప్రయాణించేలా రూపకల్పన చేశారు. సాధారణ సేవల్లో గంటకు 75 కిలోమీటర్ల వాణిజ్య వేగంతో నడిచే ఈ రైలును ట్రయల్ సమయంలో గంటకు 120 కిలోమీటర్ల వేగంతో విజయవంతంగా పరీక్షించారు. రైలు లోపల హైడ్రోజన్ నిల్వ సిలిండర్లు, ఫ్యూయల్ సెల్ వ్యవస్థలు, బ్యాటరీలు, నియంత్రణ పరికరాల కోసం ప్రత్యేక విభాగాలను ఏర్పాటు చేశారు. భద్రతకు అత్యంత ప్రాధాన్యం ఇస్తూ అంతర్జాతీయ ప్రమాణాలకు అనుగుణంగా ఈ వ్యవస్థలను అభివృద్ధి చేసినట్లు అధికారులు తెలిపారు.

హైడ్రోజన్ ఫ్యూయల్ సెల్ సాంకేతికతతో పనిచేసే ఈ రైలు పూర్తిగా కాలుష్యరహిత రవాణా వ్యవస్థకు ప్రతీకగా నిలవనుంది. హైడ్రోజన్ మరియు ఆక్సిజన్ మధ్య జరిగే రసాయన చర్య ద్వారా విద్యుత్తు ఉత్పత్తి అవుతుంది. ఈ ప్రక్రియలో గాలిలోకి విడుదలయ్యేది కేవలం నీటి ఆవిరి, స్వల్ప వేడి మాత్రమే కావడంతో ఎలాంటి హానికరమైన కాలుష్య వాయువులు వెలువడవు. డీజిల్ లేదా ఇతర శిలాజ ఇంధనాలతో నడిచే రైళ్లతో పోలిస్తే ఈ సాంకేతికత పర్యావరణానికి ఎంతో మేలు చేస్తుంది. ఒక్కసారి ఇంధనం నింపితే ఎక్కువ దూరం ప్రయాణించేలా ఈ రైలును రూపొందించారు. రైలు ముందు భాగంలో 27 హైడ్రోజన్ సిలిండర్లు, వెనుక భాగంలో మరో 27 సిలిండర్లను ఏర్పాటు చేశారు. ఈ రైలు కోసం ప్రత్యేకంగా హర్యానాలోని జింద్‌లో స్వదేశీ సాంకేతికతతో హైడ్రోజన్ నిల్వ కేంద్రం, ఇంధనం నింపే కేంద్రాన్ని కూడా నిర్మించడం విశేషంగా చెప్పుకోవచ్చు.

ఈ ప్రతిష్ఠాత్మక హైడ్రోజన్ రైలు పూర్తిగా స్వదేశీ సాంకేతికతతో రూపొందించబడింది. కేంద్ర ప్రభుత్వం చేపట్టిన ఆత్మనిర్భర్ భారత్ కార్యక్రమంలో భాగంగా దీన్ని అభివృద్ధి చేశారు. లక్నోలోని రీసెర్చ్ డిజైన్స్ అండ్ స్టాండర్డ్స్ ఆర్గనైజేషన్ ఈ రైలుకు అవసరమైన రూపకల్పన, సాంకేతిక ప్రమాణాలను సిద్ధం చేయగా, చెన్నైలోని ఇంటిగ్రల్ కోచ్ ఫ్యాక్టరీ తయారీ బాధ్యతలను విజయవంతంగా నిర్వహించింది. దేశీయ పరిశోధన, సాంకేతిక నైపుణ్యం, తయారీ సామర్థ్యాన్ని ప్రపంచానికి చాటిచెప్పే మరో విజయంగా ఈ హైడ్రోజన్ రైలు నిలవనుంది. భవిష్యత్తులో దేశంలోని మరిన్ని మార్గాల్లో ఇలాంటి పర్యావరణహిత రైళ్లను ప్రవేశపెట్టే అవకాశాలపై కూడా భారతీయ రైల్వే దృష్టి సారించింది.

ALSO READ: Iran US conflict: మళ్లీ హర్మూజ్‌లో హై టెన్షన్