Fuel Crisis: యుద్ధం అక్కడ.. వాత ఇక్కడ!

Fuel Crisis: మధ్యప్రాచ్యంలో కొనసాగుతున్న ఘర్షణల ప్రభావం భారతదేశంపై నేరుగా పడుతూ, సామాన్య ప్రజల జీవన విధానాన్ని క్రమంగా ప్రభావితం చేస్తోందని ఆర్థిక వర్గాలు ఆందోళన వ్యక్తం చేస్తున్నాయి. వేల కిలోమీటర్ల దూరంలో జరుగుతున్న యుద్ధం అయినప్పటికీ, దాని ప్రభావం ఇంధన ధరల రూపంలో దేశ ప్రజల జేబులను తాకుతోంది. యుద్ధం ప్రారంభమైన మొదటి వారంలోనే గ్యాస్ సిలిండర్ ధర రూ.60 వరకు పెరగగా, కమర్షియల్ సిలిండర్ల ధరలు రూ.115 వరకు పెరిగాయి. ఈ పెరుగుదలతో పాటు కొన్ని ప్రాంతాల్లో గ్యాస్ కొరత కూడా కనిపించడం ప్రారంభమవడంతో సాధారణ కుటుంబాల వంటగదులపై ఒత్తిడి పెరుగుతోంది. ఇంధన ధరల పెరుగుదలతో పాటు పెట్రోల్ ధరల పెరుగుదలపై కూడా ప్రజల్లో ఆందోళన నెలకొంది.

ఫిబ్రవరి చివర్లో ప్రారంభమైన ఇరాన్-ఇజ్రాయెల్ ఘర్షణ అంతర్జాతీయ ఇంధన మార్కెట్‌ను కుదిపేసింది. ముడి చమురు సరఫరా వ్యవస్థ దెబ్బతినడంతో భారతదేశంపై ప్రత్యక్ష ప్రభావం పడుతోంది. ఈ నేపథ్యంలో చమురు సంస్థలు ప్రీమియం పెట్రోల్ ధరలను పెంచే నిర్ణయం తీసుకున్నాయి. స్పీడ్, పవర్ పెట్రోల్ ధరలను లీటరుకు రూ.2 నుంచి రూ.2.35 వరకు పెంచారు. అంతర్జాతీయ మార్కెట్‌లో ముడి చమురు ధర బ్యారెల్‌కు 115 డాలర్లు దాటడంతో ఈ నిర్ణయం తీసుకున్నట్లు తెలుస్తోంది. ప్రస్తుతం సాధారణ పెట్రోల్ ధరలు యథాతథంగా ఉన్నప్పటికీ, భవిష్యత్తులో అవి కూడా పెరిగే అవకాశాలపై సందేహాలు వ్యక్తమవుతున్నాయి. ఇదే సమయంలో విమాన ఇంధన ధరలు పెరగడంతో విమాన టికెట్ల ధరలు కూడా పెరిగిన పరిస్థితి నెలకొంది.

గత 3 వారాలుగా ముడి చమురు ధరలు బ్యారెల్‌కు 120 డాలర్లకు పైగా కొనసాగుతున్నాయి. విదేశీ పెట్టుబడిదారులు వెనక్కి తగ్గడంతో రూపాయి విలువ రూ.93 స్థాయికి పడిపోవడం మరో ఆందోళనకర అంశంగా మారింది. రూపాయి విలువ తగ్గితే దిగుమతి చేసే ప్రతి లీటర్ చమురుకు అదనపు ఖర్చు భరించాల్సి వస్తుంది. పశ్చిమాసియాలో యుద్ధం కొనసాగితే భారతీయులపై ధరల భారము మరింత పెరుగుతుందని నిపుణులు హెచ్చరిస్తున్నారు. పెట్రోల్, డీజిల్ ధరలు పెరిగితే రవాణా వ్యయాలు పెరిగి, కూరగాయలు, ధాన్యాలు, పాలు వంటి నిత్యవసర వస్తువుల ధరలు కూడా పెరిగే పరిస్థితి ఏర్పడుతుంది. ముడి చమురు ధరలు 10 శాతం పెరిగితే ద్రవ్యోల్బణం 0.2 శాతం పెరిగే అవకాశం ఉందని అంచనాలు సూచిస్తున్నాయి.

యుద్ధ ప్రభావం కేవలం ఇంధన ధరలకే పరిమితం కాకుండా ప్రపంచ ఆర్థిక వ్యవస్థ మొత్తాన్ని ప్రభావితం చేస్తోందని నిపుణులు చెబుతున్నారు. శాంతి పరిస్థితులు నెలకొనకపోతే ధరల ఒత్తిడి మరింత పెరిగే అవకాశం ఉంది. ప్రస్తుతం రష్యా నుంచి వచ్చే చమురు కొంత ఉపశమనాన్ని ఇస్తున్నప్పటికీ, దేశంలో ఉన్న నిల్వలు ఎంతకాలం సరిపోతాయన్నది ప్రశ్నగా మారింది. ప్రజలపై భారం తగ్గించేందుకు పన్నుల తగ్గింపు వంటి చర్యలు తీసుకోవాలన్న డిమాండ్లు వినిపిస్తున్నాయి.

భారత్ తన ముడి చమురు అవసరాల్లో సుమారు 85 శాతం, వాయు అవసరాల్లో 50 శాతం దిగుమతులపై ఆధారపడుతోంది. అందువల్ల అంతర్జాతీయ పరిస్థితుల ప్రభావం నేరుగా దేశంపై పడుతోంది. ప్రీమియం పెట్రోల్ ధరల పెరుగుదల ప్రధానంగా అధిక విలువ గల వాహనాలపై ప్రభావం చూపుతున్నప్పటికీ, పారిశ్రామిక డీజిల్ ధరల పెరుగుదల మాత్రం పరిశ్రమల వ్యయాలను పెంచుతోంది. బల్క్ డీజిల్ ధరలు రూ.20కి పైగా పెరగడంతో తయారీ వ్యయం పెరిగి చివరికి వినియోగదారులపై భారం పడుతోంది.

ఇప్పటికే గ్యాస్ కొరత కారణంగా కొన్ని నగరాల్లో సిలిండర్ల కోసం క్యూ లైన్లు కనిపిస్తున్నాయి. దేశంలో వినియోగించే వంట గ్యాస్‌లో సుమారు 60 శాతం మధ్యప్రాచ్య ప్రాంతాల నుంచే వస్తుంది. సరఫరాలో అంతరాయం ఏర్పడటంతో పంపిణీ వ్యవస్థపై ఒత్తిడి పెరిగింది. సిలిండర్ బుకింగ్ గడువులు కూడా పెరిగిన పరిస్థితి కనిపిస్తోంది. ప్రస్తుతానికి సాధారణ పెట్రోల్, డీజిల్ ధరలు స్థిరంగా ఉన్నప్పటికీ, యుద్ధం తీవ్రత పెరిగితే అవి కూడా పెరిగే అవకాశముందని అంచనాలు సూచిస్తున్నాయి.

ఈ పరిస్థితుల్లో యుద్ధం ఆగడం లేదా సరఫరా మార్గాలు సజావుగా కొనసాగడం అత్యంత కీలకం. భారత్ ఇప్పటికే ఇతర దేశాల నుంచి చమురు దిగుమతులను పెంచే ప్రయత్నాలు ప్రారంభించింది. దేశీయ ఉత్పత్తిని పెంచేందుకు చర్యలు తీసుకుంటోంది. వ్యూహాత్మక నిల్వలు కొంతకాలం ఉపశమనాన్ని ఇవ్వగలిగినా, యుద్ధం దీర్ఘకాలం కొనసాగితే పరిస్థితులు మరింత క్లిష్టంగా మారే అవకాశముంది. ధరల పెరుగుదల అనేది కేవలం సంఖ్యల సమస్య కాకుండా ప్రజల దైనందిన జీవన విధానాన్ని ప్రభావితం చేసే అంశమని నిపుణులు హెచ్చరిస్తున్నారు.

ALSO READ: IMD హెచ్చరిక.. దేశవ్యాప్తంగా భారీ వర్షాలు