Mumaith Khan: ఆ స్టార్ హీరో హగ్ చేసుకోగానే సిగ్గు పడ్డాడు

Mumaith Khan: ఒకప్పుడు ఐటమ్ సాంగ్స్ ప్రపంచంలో తనకంటూ ప్రత్యేక స్థానం సంపాదించుకున్న ముమైత్ ఖాన్ పేరు వినగానే ప్రేక్షకులకు గుర్తుకొచ్చేది ఆమె అందం, డ్యాన్స్ స్టైల్, స్క్రీన్ ప్రెజెన్స్. కుర్రాళ్ల కలల రాకుమారిగా నిలిచిన ఈ భామ, ఒకప్పుడు సినిమాలో ఐటమ్ సాంగ్ అంటే తప్పనిసరిగా ఉండాల్సిన పేరుగా మారింది. తెలుగుతో పాటు తమిళ్, హిందీ చిత్రాల్లోనూ తన ప్రత్యేకతను చూపిస్తూ వరుస అవకాశాలను అందుకుంది. కేవలం ఐటమ్ సాంగ్స్ మాత్రమే కాకుండా, హీరోయిన్‌గా కూడా కొన్ని సినిమాల్లో నటించి తన ప్రతిభను నిరూపించింది. అయితే గత కొంతకాలంగా ఆమె సినిమాల్లో కనిపించడం తగ్గిపోయింది. మధ్యలో ఒకసారి ప్రముఖ రియాలిటీ షోలో పాల్గొని ప్రేక్షకుల ముందుకు వచ్చినప్పటికీ, ఆ తర్వాత మళ్లీ పెద్దగా కనిపించకపోవడం గమనార్హం. అప్పుడప్పుడు టీవీ కార్యక్రమాల్లో జడ్జ్‌గా కనిపించినా, ప్రస్తుతం మాత్రం ఆమె పబ్లిక్ లైఫ్‌లో చాలా అరుదుగానే కనిపిస్తోంది.

ఇలాంటి సమయంలో తాజాగా ఇచ్చిన ఓ ఇంటర్వ్యూలో ముమైత్ ఖాన్ తన కెరీర్‌కు సంబంధించిన అనుభవాలతో పాటు, ప్రముఖ హీరో ప్రభాస్‌తో ఉన్న జ్ఞాపకాలను పంచుకోవడం ఆసక్తిని రేకెత్తిస్తోంది. ప్రభాస్ నటించిన యోగి సినిమా షూటింగ్ సమయంలో జరిగిన కొన్ని సరదా సంఘటనలను ఆమె వివరించింది. ఆమె చెప్పిన ప్రకారం.. ప్రభాస్ స్వభావానికి చాలా సిగ్గు ఎక్కువని తెలిపింది. ముఖ్యంగా యోగి చిత్రంలోని పాటల చిత్రీకరణ సమయంలో, హగ్ వంటి సన్నిహిత సన్నివేశాలు ఉండగా ప్రభాస్ కొంత ఇబ్బంది పడుతూ సిగ్గుపడేవారని గుర్తుచేసుకుంది. ఇది చూసి తనకు ఆశ్చర్యంగా అనిపించిందని, ఆ సమయంలో ఆయన నడవడిక చాలా సహజంగా ఉందని పేర్కొంది.

ఇది ప్రభాస్‌తో తనకు రెండోసారి పని చేసిన సందర్భమని, మొదటిసారి కలిసి పని చేసినప్పుడు పాట చిత్రీకరణ చాలా నిశ్శబ్దంగా సాగిందని తెలిపింది. అయితే రెండోసారి కలిసినప్పుడు మాత్రం తాను ప్రభాస్‌ను సరదాగా ఆటపట్టించడం ప్రారంభించానని వెల్లడించింది. ఒక సందర్భంలో తన ఆటపాటలతో ప్రభాస్ కొంత విసిగిపోయి, అక్కడ ఉన్న కొరియోగ్రాఫర్ అమ్మ రాజశేఖర్‌ను పిలిచి “సార్, మీ హీరోయిన్‌ను చూడండి సార్” అంటూ సరదాగా అరిచాడని చెప్పుకొచ్చింది. ముంబై నుంచి వచ్చిన తనకు ఆ సమయంలో సెట్ వాతావరణం కొత్తగా అనిపించినప్పటికీ, ప్రభాస్‌తో ఉన్న ఆ సరదా క్షణాలు తనకు ఇప్పటికీ గుర్తున్నాయని తెలిపింది.

ప్రభాస్ తన వ్యక్తిత్వాన్ని అర్థం చేసుకుని, ఆ తర్వాత ఇద్దరి మధ్య మంచి స్నేహం ఏర్పడిందని ముమైత్ ఖాన్ వివరించింది. ఆ అనుబంధానికి గుర్తుగా అప్పటి నుంచి ప్రభాస్‌ను ప్రేమగా డార్లింగ్ అని పిలవడం ప్రారంభించానని చెప్పింది. ఈ వ్యాఖ్యలు బయటకు రావడంతో ఇప్పుడు సోషల్ మీడియాలో వేగంగా వైరల్ అవుతున్నాయి. ఒకప్పుడు ఐటమ్ సాంగ్స్‌తో ప్రేక్షకులను ఆకట్టుకున్న ముమైత్ ఖాన్, ఇప్పుడు తన జ్ఞాపకాల ద్వారా మళ్లీ వార్తల్లో నిలవడం విశేషంగా మారింది.

ALSO READ: Elephants Teeth: ఏనుగుకు బయటకు కనిపించే రెండు దంతాలతో పాటు నోట్లో ఏమైనా పళ్లు ఉంటాయా?