న్యూజిలాండ్‌తో జరిగిన తొలి వన్డేలో టీమిండియా యువ పేసర్లు అన్షుల్ కాంబోజ్, గుర్నూర్ బ్రార్ అద్భుత ప్రదర్శనతో ఆకట్టుకున్నారు. ఇద్దరూ తమ బౌలింగ్‌లో విభిన్న నైపుణ్యాలను ప్రదర్శిస్తూ ప్రత్యర్థి బ్యాటర్లను కట్టడి చేశారు. ఈ ప్రదర్శనతో హెడ్ కోచ్ గౌతమ్ గంభీర్ భవిష్యత్ వన్డే జట్టు ప్రణాళికలపై ఓ స్పష్టత వచ్చినట్లయింది.
తొలి వన్డేలో ఎనిమిదో ఓవర్ వేసిన అన్షుల్ కాంబోజ్.. టిమ్ సీఫర్ట్‌కు వరుసగా ఆరు బంతులు వేసినా ఒక్క పరుగు కూడా ఇవ్వలేదు. కొన్ని బంతులను సీఫర్ట్ నేరుగా బౌలర్ వైపు ఆడగా మరికొన్ని ఫీల్డర్ల చేతుల్లోకి వెళ్లాయి. గతంలో వెస్టిండీస్‌తో జరిగిన వన్డే అరంగేట్రంలో తొమ్మిది ఓవర్లలో 82 పరుగులు ఇచ్చిన కాంబోజ్‌కు ఈ ప్రదర్శన ఎంతో ప్రత్యేకమైంది. ఆ మ్యాచ్‌లో తొలి 10 బంతుల్లోనే వెస్టిండీస్ 23 పరుగులు సాధించింది. కానీ న్యూజిలాండ్‌తో మ్యాచ్‌లో 10 ఓవర్లలో కేవలం 22 పరుగులే ఇచ్చాడు.
ఈడెన్ పార్క్ పిచ్ నుంచి లభించిన సహకారాన్ని కాంబోజ్ చక్కగా ఉపయోగించుకున్నాడు. కాంబోజ్ బౌలింగ్‌ బ్యాటర్ల అంచనాలకు మించి వేగంగా బ్యాట్ వద్దకు చేరడంతో సీఫర్ట్, డారిల్ మిచెల్ ఇబ్బందిపడ్డారు. తొలి నాలుగు ఓవర్లలో కేవలం ఎనిమిది పరుగులే ఇచ్చి ప్రత్యర్థిపై ఒత్తిడి పెంచాడు.
మరోవైపు గుర్నూర్ బ్రార్ కూడా తనదైన శైలిలో రాణించాడు. కాంబోజ్‌తో పోలిస్తే వేగంగా బంతులు వేస్తూ తన ఎత్తును ఉపయోగించుకుని పిచ్‌పై బౌన్స్ రాబట్టాడు. 15వ ఓవర్ రెండో బంతికి సీఫర్ట్‌ను తప్పుడు షాట్ ఆడేలా చేసి వికెట్ సాధించాడు. ఆ తర్వాత టామ్ లాథమ్‌ను తన బౌలింగ్‌లోనే అద్భుత క్యాచ్‌తో పెవిలియన్‌కు పంపాడు.
వెస్టిండీస్‌తో స్వదేశంలో జరిగిన రెండో వన్డేలో 10 ఓవర్లకు 96 పరుగులు ఇచ్చిన బ్రార్.. ఈ మ్యాచ్‌లో అద్భుతంగా పుంజుకున్నాడు. మరోవైపు కాంబోజ్ కూడా చివరి స్పెల్‌లో మిచెల్ శాంట్నర్, నాథన్ స్మిత్ వికెట్లు పడగొట్టాడు. వచ్చే ఏడాది జరిగే వన్డే ప్రపంచకప్‌ను దృష్టిలో పెట్టుకుని గంభీర్ యువ పేసర్లను సిద్ధం చేస్తున్నట్లు ఈ ప్రదర్శన సూచిస్తోంది. జస్ప్రీత్ బుమ్రా, అర్ష్‌దీప్ సింగ్ వంటి సీనియర్లతో పాటు నాలుగు పేసర్ల వ్యూహాన్ని అమలు చేయాలనుకుంటే బ్రార్‌కు కూడా అవకాశాలు లభించే అవకాశం ఉంది.
అయితే ఈ ఇద్దరు యువ బౌలర్లకు అసలైన పరీక్షలు రానున్నాయి. న్యూజిలాండ్ బ్యాటర్లు తదుపరి మ్యాచ్‌ల్లో వారి బౌలింగ్‌ను ఎదుర్కొనేందుకు కొత్త వ్యూహాలతో బరిలోకి దిగనున్నారు. ఆ సవాళ్లను కాంబోజ్, బ్రార్ ఎలా ఎదుర్కొంటారన్నది భారత జట్టులో వారి భవిష్యత్తును నిర్ణయించనుంది.
