మరణం అనేది ప్రతి జీవికి తప్పనిసరిగా ఎదురయ్యే సహజమైన ప్రక్రియ. అయితే మరణం అంటే జీవితానికి ముగింపు కాదని భగవద్గీత వివరిస్తుంది. శరీరం నశించినప్పటికీ ఆత్మకు మరణం లేదని అది ఒక శరీరాన్ని విడిచి మరో శరీరంలోకి ప్రవేశిస్తుందని శ్రీకృష్ణుడు బోధించాడు. భగవద్గీతలోని పలు శ్లోకాలు జననం, మరణం, ఆత్మ శాశ్వతత్వం గురించి లోతైన విషయాలను తెలియజేస్తాయి.
భగవద్గీత రెండో అధ్యాయం 27వ శ్లోకంలో శ్రీకృష్ణుడు జన్మించిన ప్రతి జీవికి మరణం తప్పదని, మరణించిన వారికి తిరిగి జన్మించడం కూడా సహజమని వివరించాడు. తప్పనిసరిగా జరిగే ఈ ప్రక్రియ గురించి అతిగా బాధపడకూడదని సూచించాడు.
రెండో అధ్యాయం 20వ శ్లోకం ప్రకారం ఆత్మకు పుట్టుక లేదు, మరణం లేదు. అది శాశ్వతమైనది, నాశనం లేనిది. శరీరం నశించినంత మాత్రాన ఆత్మ నశించదు. ఆత్మ ఎప్పటికీ ఉనికిలో ఉంటుందని భగవద్గీత బోధిస్తుంది.
రెండో అధ్యాయం 22వ శ్లోకంలో శ్రీకృష్ణుడు ఆత్మ ప్రయాణాన్ని వస్త్రాల మార్పుతో పోల్చాడు. మనిషి పాత బట్టలను విడిచిపెట్టి కొత్త బట్టలను ధరించినట్లే.. ఆత్మ పాత శరీరాన్ని విడిచిపెట్టి మరో కొత్త శరీరాన్ని స్వీకరిస్తుందని వివరించాడు.
రెండో అధ్యాయం 13వ శ్లోకంలో మనిషి శరీరంలో బాల్యం, యవ్వనం, వృద్ధాప్యం ఎలా మారుతూ ఉంటాయో.. అలాగే మరణం తర్వాత ఆత్మ మరో శరీరాన్ని పొందుతుందని శ్రీకృష్ణుడు వివరించాడు. ఈ మార్పును అర్థం చేసుకున్న జ్ఞాని ఆందోళన చెందడని బోధించాడు.
భగవద్గీత రెండో అధ్యాయం 23వ శ్లోకం ప్రకారం ఆత్మను ఆయుధాలు ఛేదించలేవు. అగ్ని దహించలేదు. నీరు తడపలేదు. గాలి ఆరబెట్టలేదు. అంటే ఆత్మ భౌతిక శక్తులకు అతీతమైనదని ఈ శ్లోకం తెలియజేస్తుంది.
శరీరం అశాశ్వతమైనది.. ఆత్మ శాశ్వతమైనది. మరణం అనేది ఆత్మకు అంతం కాదు, ఒక శరీరం నుంచి మరో శరీరానికి జరిగే మార్పు మాత్రమేనని భగవద్గీత వివరిస్తుంది. జననం, మరణం అనే సహజ ప్రక్రియలను అర్థం చేసుకుని జీవితాన్ని జ్ఞానంతో, ధైర్యంతో గడపాలన్నది శ్రీకృష్ణుడి బోధనలోని ప్రధాన సందేశం.
