ప్రేమ, డేటింగ్‌ కంటే తమ వ్యక్తిగత అభివృద్ధి, ఆరోగ్యం, ప్రశాంతత, ఆనందానికి ప్రాధాన్యత ఇవ్వడమే లక్ష్యంగా జెన్‌ జీ యువతలో ‘సోలోమాక్సింగ్‌’ అనే కొత్త ధోరణి ప్రాచుర్యం పొందుతోంది. ఒంటరిగా ఉండటాన్ని లోటుగా భావించకుండా, ఆ సమయాన్ని తమ లక్ష్యాల సాధనకు ఉపయోగించుకోవడమే ఈ విధానం ప్రత్యేకత. ఒంటరి ప్రయాణాలు, తమకు తామే సమయం కేటాయించుకోవడం, వ్యాయామం, కొత్త అభిరుచులు నేర్చుకోవడం, స్నేహితులు, కుటుంబ సభ్యులతో గడపడం వంటి వాటికి యువత ప్రాధాన్యత ఇస్తోంది. ప్రేమను పూర్తిగా తిరస్కరించడం ఈ ధోరణి ఉద్దేశం కాదు. ప్రస్తుతానికి తమ జీవితాన్ని మెరుగుపరచుకోవడంపై దృష్టి పెట్టడమే ప్రధాన లక్ష్యం.
డేటింగ్‌లో ఎదురయ్యే నిరాశలు, పరిచయాలు మధ్యలోనే ముగియడం, స్పష్టత లేని సంబంధాలతో విసిగిపోయిన కొందరు యువత తమ సమయాన్ని వ్యక్తిగత ఎదుగుదలకు కేటాయిస్తున్నారు. కెరీర్‌ నిర్మాణం, ఆర్థిక స్వతంత్రత, కొత్త నగరాల్లో స్థిరపడటం వంటి లక్ష్యాలు కూడా ఈ మార్పుకు కారణమవుతున్నాయి. కొందరు వ్యాయామం, పుస్తక పఠనం, సమయానికి నిద్రపోవడాన్ని అలవాటు చేసుకుంటే, మరికొందరు కొత్త భాషలు నేర్చుకోవడం, ఒంటరిగా ప్రయాణించడం, తమకు నచ్చిన వంటకాలు చేసుకోవడం వంటి పనుల్లో ఆనందాన్ని వెతుకుతున్నారు. తమ జీవితాన్ని తామే సంతోషంగా మలుచుకున్న తర్వాత సంబంధాలను ఎంచుకునే విషయంలోనూ స్పష్టత పెరుగుతుందని భావిస్తున్నారు. అందువల్ల సోలోమాక్సింగ్‌ ప్రేమకు వ్యతిరేకమైన ధోరణి కాదు.. తమను తాము అర్థం చేసుకుని, మెరుగైన జీవితాన్ని నిర్మించుకునే ప్రయత్నంగా మారుతోంది.
