Watch Video: దేశ రాజధాని ఢిల్లీ సమీపంలోని గ్రేటర్‌ నోయిడా ప్రాంతంలో చోటుచేసుకున్న ఒక ఘటన ప్రస్తుతం సోషల్ మీడియాలో విస్తృతంగా చర్చకు దారితీసింది. తూర్పు పెరిఫెరల్‌ ఎక్స్‌ప్రెస్‌వేపై అధిక లోడుతో ప్రయాణిస్తున్న ఓ డంపర్‌ ట్రక్కు నుంచి భారీ మొత్తంలో ఎర్రరాళ్లు రోడ్డుపై పడిపోవడంతో వాహనదారులు తీవ్ర ఇబ్బందులు ఎదుర్కొన్నారు. ఈ ఘటనకు సంబంధించిన వీడియోలు సోషల్ మీడియాలో వైరల్ కావడంతో అధికారులు వెంటనే స్పందించి చర్యలు చేపట్టారు.
आप चिंता ना करे यूपी पुलिस है ना
ग्रेटर नोएडा: ईस्टर्न पेरिफेरल एक्सप्रेसवे पर ट्रक से गिरे पत्थरों ने हादसे का मंजर खड़ा कर दिया था।
कई गाड़ियों के टायर फट गए और बड़े हादसे का खतरा मंडराने लगा।तभी दादरी पुलिस मौके पर पहुंची।
तेज धूप की परवाह किए बिना UP Police के जवानों ने… pic.twitter.com/BGChN7zgzC
— UP POLICE NEWS (@UPPOLICE_NEWS5) June 18, 2026
స్థానికుల సమాచారం మేరకు.. అధిక లోడుతో ప్రయాణిస్తున్న డంపర్‌ ట్రక్కు డ్రైవర్‌కు మార్గమధ్యంలో తనిఖీలు నిర్వహిస్తున్న రవాణా శాఖ బృందం కనిపించినట్లు తెలుస్తోంది. తన వాహనంపై చర్యలు తీసుకునే అవకాశం ఉందనే భయంతో ట్రక్కులో ఉన్న రాళ్లను రోడ్డుపైనే పడేసినట్లు ప్రాథమిక సమాచారం చెబుతోంది. దీంతో ఒక్కసారిగా ఎక్స్‌ప్రెస్‌వేపై ఎర్రరాళ్లు చెల్లాచెదురుగా పడిపోయి వాహనాల రాకపోకలకు తీవ్ర అంతరాయం ఏర్పడింది. వేగంగా ప్రయాణిస్తున్న వాహనాలు అప్రమత్తంగా బ్రేకులు వేయాల్సి రావడంతో ట్రాఫిక్‌ సమస్యలు తలెత్తాయి.
కొద్ది సేపట్లోనే ఆ ప్రాంతంలో భారీ ట్రాఫిక్‌ నిలిచిపోయింది. వందలాది వాహనాలు రహదారిపై నిలిచిపోవడంతో ప్రయాణికులు తీవ్ర అసౌకర్యానికి గురయ్యారు. సమాచారం అందుకున్న పోలీసులు వెంటనే సంఘటనా స్థలానికి చేరుకుని పరిస్థితిని సమీక్షించారు. ట్రాఫిక్‌ను సాధారణ స్థితికి తీసుకురావడానికి అత్యవసర చర్యలు చేపట్టారు.
ఈ సందర్భంగా పోలీసులు చూపిన బాధ్యతాయుతమైన వ్యవహారం అందరి ప్రశంసలు అందుకుంటోంది. శుభ్రపరిచే సిబ్బంది కోసం ఎదురుచూడకుండా స్వయంగా పారలు చేతబట్టి రోడ్డుపై పడిన రాళ్లను తొలగించే పనిలో నిమగ్నమయ్యారు. దాదాపు 2 గంటలపాటు నిరంతరంగా శ్రమించి రహదారిని పూర్తిగా శుభ్రం చేశారు. అనంతరం ట్రాఫిక్‌ను క్రమంగా పునరుద్ధరించి వాహనాల రాకపోకలను సాధారణ స్థితికి తీసుకువచ్చారు.
ఈ ఘటనకు సంబంధించిన వీడియో సోషల్ మీడియాలో వైరల్ కావడంతో నెటిజన్లు తీవ్ర ఆగ్రహం వ్యక్తం చేస్తున్నారు. అధిక లోడుతో వాహనాలు రహదారులపై నిరభ్యంతరంగా సంచరించడం ఎలా సాధ్యమవుతోందని ప్రశ్నిస్తున్నారు. తరచూ ఇలాంటి ఘటనలు చోటుచేసుకుంటున్నప్పటికీ సంబంధిత శాఖలు కఠిన చర్యలు తీసుకోవడంలో విఫలమవుతున్నాయంటూ విమర్శలు గుప్పిస్తున్నారు. రహదారి భద్రతకు ముప్పుగా మారుతున్న అధిక లోడ్‌ వాహనాలపై ప్రత్యేక దృష్టి పెట్టాలని పలువురు కోరుతున్నారు.
ప్రస్తుతం ఈ ఘటనపై పోలీసులు కేసు నమోదు చేసి దర్యాప్తు చేపట్టారు. ప్రమాదానికి కారణమైన డంపర్‌ ట్రక్కు డ్రైవర్‌ను గుర్తించేందుకు ప్రయత్నాలు కొనసాగుతున్నాయి. వాహనం వివరాలను సేకరిస్తూ ఘటనకు సంబంధించిన అన్ని కోణాల్లో విచారణ జరుపుతున్నారు. పూర్తి దర్యాప్తు అనంతరం బాధ్యులపై తగిన చర్యలు తీసుకునే అవకాశం ఉందని అధికారులు తెలిపారు.
ALSO READ: Fertility Health: మగాళ్లు ఇవి తింటే వీర్యకణాల సంఖ్య తగ్గిపోతాయా..?
