Gold Prices: బంగారం, వెండి ధరలు మళ్లీ ఊహించని విధంగా పెరిగి కొనుగోలుదారులకు షాక్ ఇచ్చాయి. గత కొద్ది రోజులుగా పెద్దగా మార్పులు లేకపోవడంతో ధరలు స్థిరంగా ఉన్నాయనే భావన నెలకొన్న వేళ ఒక్కసారిగా వచ్చిన ఈ పెరుగుదల మార్కెట్ వర్గాలను ఆశ్చర్యానికి గురిచేసింది. ముఖ్యంగా తులం బంగారం ధర 1 రోజులోనే రూ.2,200కు పైగా పెరగడం, కిలో వెండి ధర రూ.10,000 ఎగబాకడం గమనార్హం. దీంతో ఆభరణాల కొనుగోలు ఆలోచిస్తున్నవారితో పాటు పెట్టుబడిదారులు కూడా లెక్కలు వేసుకుంటున్నారు.
ఫిబ్రవరి 19న 24 క్యారట్ బంగారం ధర రూ.2,290 పెరిగి రూ.1,54,200 నుంచి రూ.1,56,490కు చేరింది. ఆభరణాల తయారీలో విస్తృతంగా వినియోగించే 22 క్యారట్ బంగారం 10 గ్రాములకు రూ.2,100 పెరిగి రూ.1,41,350 నుంచి రూ.1,43,450కు పెరిగింది. 18 క్యారట్ బంగారం ధర కూడా రూ.1,720 ఎగిసి రూ.1,15,650 నుంచి రూ.1,17,370కు చేరుకుంది. మరోవైపు వెండి ధర కూడా భారీగా పెరిగింది. కిలో వెండి రూ.10,000 పెరిగి రూ.2,60,000 నుంచి రూ.2,70,000కు చేరగా, తులం వెండి ధర రూ.2,700గా నమోదైంది.
దేశీయ వాణిజ్య వేదికలతో పాటు సరుకుల మారక వేదికలలో కూడా ఇదే ధోరణి కనిపించింది. గోల్డ్ ఏప్రిల్ ఫ్యూచర్స్ రూ.469 పెరిగి రూ.1,56,239 వద్ద ట్రేడ్ అవుతోంది. సిల్వర్ మార్చి ఫ్యూచర్స్ రూ.905 పెరిగి రూ.2,44,173 వద్ద వ్యాపారం సాగించాయి. అంతర్జాతీయ మార్కెట్‌లో కూడా బంగారం, వెండి ధరలు బలంగానే ఉన్నాయి. ఔన్స్ బంగారం ధర 4,982.20 డాలర్ల వద్ద ఉండగా, ఔన్స్ వెండి 78.04 డాలర్ల వద్ద కొనసాగుతోంది.
బంగారం ధరల్లో స్వల్ప మార్పులు వచ్చినా దేశవ్యాప్తంగా చర్చనీయాంశమవుతాయి. ఫిబ్రవరి 19న కూడా అలాంటి పరిస్థితి కనిపించింది. అంతర్జాతీయ ఉద్రిక్తతల్లో మార్పులు, అమెరికా కరెన్సీ బలపడటం వంటి అంశాలు ధరలపై ప్రభావం చూపుతున్నట్లు విశ్లేషకులు చెబుతున్నారు. ఉదయం ప్రారంభంలో కొంత తగ్గుదల కనిపించినప్పటికీ, తరువాత మళ్లీ కోలుకొని పెరుగుదల దిశగా సాగింది. రాబోయే రోజుల్లో అమెరికా కేంద్ర బ్యాంకు సమావేశ వివరాలు, చైనా మార్కెట్ తిరిగి ప్రారంభం వంటి అంశాలు ధరల్లో ఊగిసలాటకు కారణమయ్యే అవకాశం ఉందని భావిస్తున్నారు.
భారతదేశంలో బంగారం ధరల నిర్ణయంలో అంతర్జాతీయ రేట్లు, దిగుమతి సుంకాలు, పన్నులు, మారకపు విలువల్లో మార్పులు కీలక పాత్ర పోషిస్తాయి. ఇవన్నీ కలిసి రోజువారీ ధరల మార్పుకు దారితీస్తాయి. మన దేశంలో బంగారం కేవలం ఆభరణం మాత్రమే కాదు.. సంప్రదాయానికి ప్రతీక, భావోద్వేగాలకు నిలువెత్తు రూపం, ఆర్థిక భద్రతకు నమ్మకమైన సాధనం. ముఖ్యంగా పెళ్లిళ్లు, పండుగల సందర్భాల్లో బంగారానికి ప్రత్యేక స్థానం ఉంది. పెట్టుబడి దారులు కూడా దీన్ని సురక్షిత మార్గంగా భావిస్తారు. అయితే మార్కెట్ పరిస్థితులు మారుతున్న నేపథ్యంలో ధరల మార్పులను జాగ్రత్తగా గమనించి నిర్ణయాలు తీసుకోవాలని నిపుణులు సూచిస్తున్నారు.
ALSO READ: OTT Romantic Thriller: ఆ పిల్ల కోరికలే వేరు.. ప్రతి సీన్ అరాచకమే, ఒంటరిగా చూస్తే బెస్ట్
