Telangana: తెలంగాణలో ఎండ తీవ్రత రోజురోజుకు పెరిగిపోతూ ప్రజలను తీవ్రంగా ఇబ్బందులకు గురిచేస్తోంది. భానుడు ఉగ్రరూపం దాల్చడంతో రాష్ట్రంలోని పలు జిల్లాల్లో ఉష్ణోగ్రతలు రికార్డు స్థాయిలో నమోదవుతున్నాయి. ఇప్పటికే చాలా ప్రాంతాల్లో 45 డిగ్రీల వరకు ఉష్ణోగ్రతలు చేరుకోగా, రానున్న రోజుల్లో ఇవి మరింత పెరిగే అవకాశముందని వాతావరణశాఖ హెచ్చరిస్తోంది. ముఖ్యంగా వచ్చే 5 రోజుల్లో ఉష్ణోగ్రతలు మరో 2 నుంచి 3 డిగ్రీల వరకు పెరిగే అవకాశం ఉందని అధికారులు అంచనా వేస్తున్నారు. దీనితో వడగాల్పుల ప్రభావం మరింత తీవ్రంగా ఉండనుందని, ప్రజలు అత్యంత జాగ్రత్తలు తీసుకోవాలని సూచిస్తున్నారు.
ఎండల తీవ్రత పెరగడంతో వడదెబ్బ కేసులు కూడా గణనీయంగా పెరుగుతున్నాయి. తాజాగా సోమవారం ఒక్కరోజే వడదెబ్బ కారణంగా 4 మంది మృతి చెందడం పరిస్థితి తీవ్రతను తెలియజేస్తోంది. ఈ నేపథ్యంలో ప్రభుత్వం కీలక నిర్ణయం తీసుకుని, వడదెబ్బతో మరణించిన వారి కుటుంబాలకు ఆర్థిక సహాయం అందిస్తోంది. ఒక్కో బాధిత కుటుంబానికి రూ.4 లక్షల ఎక్స్‌గ్రేషియా అందజేస్తోంది. ఈ నిధులను రాష్ట్ర విపత్తు నిర్వహణ వ్యవస్థ ద్వారా పంపిణీ చేస్తున్నారు. అయితే ఈ పరిహారం పొందాలంటే కొన్ని నిబంధనలు తప్పనిసరిగా పాటించాల్సి ఉంటుంది.
వడదెబ్బ కారణంగా మరణించినట్లు నిర్ధారించేందుకు సంబంధిత పత్రాలను సమర్పించడం అత్యంత కీలకం. ముఖ్యంగా పోస్టుమార్టం నివేదిక, పోలీసుల ఎఫ్‌ఐఆర్ ప్రతులు తప్పనిసరిగా ఇవ్వాలి. అదేవిధంగా, మరణం సంభవించిన ప్రాంతంలో ఉష్ణోగ్రతలు సాధారణం కంటే ఎక్కువగా ఉన్నాయని వాతావరణశాఖ ధృవీకరణ పత్రం కూడా సమర్పించాలి. వీటితో పాటు మరణ ధృవపత్రం, మృతుడి మరియు వారసుల ఆధార్ జిరాక్స్ పత్రాలు, బ్యాంక్ ఖాతా వివరాలు, కుటుంబ సభ్యుల డిక్లరేషన్ వంటి పత్రాలు కూడా అవసరం అవుతాయి.
మరణం జరిగిన వెంటనే స్థానిక రెవెన్యూ అధికారులకు సమాచారం అందించడం ముఖ్యమైన దశగా అధికారులు పేర్కొంటున్నారు. అనంతరం ఎమ్మార్వో కార్యాలయంలో దరఖాస్తు సమర్పించాలి. ఈ దరఖాస్తుపై రెవెన్యూ అధికారులు పూర్తి స్థాయిలో విచారణ నిర్వహించి నివేదిక సిద్ధం చేస్తారు. ఆ నివేదికను జిల్లా కలెక్టర్‌కు పంపిస్తారు. కలెక్టర్ ఆమోదం తెలిపిన తర్వాతే నిధులు నామినీ బ్యాంక్ ఖాతాలో జమ అవుతాయి.
అదేవిధంగా, మరణం అనంతరం ప్రభుత్వ ఆస్పత్రిలో పోస్టుమార్టం నిర్వహించడం తప్పనిసరి. ఆ తర్వాత స్థానిక పోలీస్ స్టేషన్‌లో ఫిర్యాదు నమోదు చేయాలి. పోలీసులు పంచనామా నిర్వహించి కేసును నమోదు చేసిన తరువాత మాత్రమే తదుపరి ప్రక్రియ కొనసాగుతుంది. ఈ విధంగా అన్ని పత్రాలు సమర్పించినప్పుడే ప్రభుత్వం నుంచి పరిహారం పొందే అవకాశం ఉంటుంది. అయితే ఈ విషయంపై పూర్తి అవగాహన లేకపోవడం వల్ల చాలా మంది బాధిత కుటుంబాలు ఈ సహాయాన్ని పొందలేకపోతున్నాయని అధికారులు చెబుతున్నారు. కాబట్టి ప్రజలు ఈ నిబంధనలు తెలుసుకుని, అవసరమైన చర్యలు తీసుకోవాలని సూచిస్తున్నారు.
ALSO READ: Health: నాన్-ఆల్కహాలిక్ ఫ్యాటీ లివర్ అంటే ఏమిటి? ఎవరికి ప్రమాదం
