Jos Buttler: లక్నో సూపర్ జెయింట్స్‌తో జరిగిన కీలక పోరులో జోస్ బట్లర్ అద్భుత ప్రదర్శనతో జట్టును విజయతీరాలకు చేర్చాడు. కేవలం 37 బంతుల్లోనే 60 పరుగులు సాధించిన ఆయన ఇన్నింగ్స్ మ్యాచ్ గమనాన్ని పూర్తిగా మార్చేసింది. చాలా రోజులుగా ఫామ్ కోసం తంటాలు పడుతున్న బట్లర్, సరైన సమయంలో తన ప్రతిభను చాటుకోవడం ద్వారా జట్టుకు కీలక విజయం అందించాడు. మ్యాచ్ అనంతరం మాట్లాడిన ఆయన.. మళ్లీ పరుగుల వేటలోకి రావడం ఎంతో ఉపశమనాన్ని ఇచ్చిందని పేర్కొన్నారు. గత కొన్ని నెలలుగా తన ప్రదర్శనపై ఆందోళన కలిగిందని అంగీకరించిన ఆయన, ఈ ఇన్నింగ్స్ ద్వారా తిరిగి ఆత్మవిశ్వాసాన్ని పొందినట్లు తెలిపారు. ఈ మ్యాచ్ ద్వారా ఆయన టీ20 క్రికెట్‌లో 100 హాఫ్ సెంచరీలు పూర్తి చేసి అరుదైన మైలురాయిని కూడా అందుకున్నారు.
తన ఫామ్ కోల్పోవడానికి గల కారణాలను విశ్లేషించిన బట్లర్.. కొద్ది రోజుల విరామం తనకు ఎంతో ఉపయోగపడిందని వివరించారు. ఆటకు దూరంగా ఉండటం వల్ల తన టెక్నిక్, మానసిక స్థితిని పునరుద్ధరించుకునే అవకాశం లభించిందని చెప్పారు. గత కొన్ని వారాలుగా తన ప్రాథమిక నైపుణ్యాలపై మాత్రమే దృష్టి పెట్టానని, చిన్న చిన్న సాంకేతిక లోపాలు తన ఆటపై ప్రభావం చూపాయని వెల్లడించారు. ముఖ్యంగా బంతిని సరిగా గమనించలేకపోవడం వల్ల ఇబ్బందులు ఎదుర్కొన్నానని, కాబట్టి బంతి విసరకముందే తన స్థానం ఎలా ఉందో గమనించి సరిచేసుకున్నానని తెలిపారు. ఈ మార్పులే తనను మళ్లీ పాత ఫామ్‌లోకి తీసుకువచ్చాయని ఆయన వివరించారు.
తన రీ ఎంట్రీలో ఆస్ట్రేలియా మాజీ దిగ్గజం మాథ్యూ హేడెన్ పాత్ర ఎంతో కీలకమైందని బట్లర్ ప్రత్యేకంగా ప్రస్తావించారు. ప్రాక్టీస్ సమయంలో హేడెన్ అడిగిన ఒక సాధారణ ప్రశ్న తనలో పెద్ద మార్పుకు దారితీసిందని చెప్పారు. “నువ్వు బంతిని ఎంత స్పష్టంగా చూస్తున్నావు?” అనే ప్రశ్న తన ఆలోచన విధానాన్ని మార్చిందని వెల్లడించారు. గొప్ప ఆటగాళ్లు ఇచ్చే చిన్న సూచనలు ఎంత ప్రభావం చూపుతాయో ఈ సందర్భంలో తాను అర్థం చేసుకున్నానని అన్నారు. హేడెన్ సూచనల తర్వాత బంతిపై మరింత దృష్టి పెట్టడంతో తన ఆటలో స్పష్టమైన మార్పు కనిపించిందని తెలిపారు. 15 సంవత్సరాల అనుభవం ఉన్న తనకు మైదానంలో ఏం చేయాలో తెలిసినా.. ఆ చిన్న లోపాన్ని గుర్తించి సరిచేయడంలో హేడెన్ సహాయం ఎంతో ఉపయోగపడిందని బట్లర్ పేర్కొన్నారు.
ఐపీఎల్ 2026 సీజన్ మధ్యలో బట్లర్ ఫామ్‌లోకి రావడం గుజరాత్ టైటాన్స్కు పెద్ద ఊరటగా మారింది. ఓపెనర్‌గా బట్లర్ అందించే వేగవంతమైన ఆరంభాలు జట్టుకు కీలక బలం. రాబోయే మ్యాచ్‌ల్లో కూడా ఇదే జోరును కొనసాగిస్తానని ఆయన ధీమా వ్యక్తం చేశారు. లక్నోపై సాధించిన ఈ విజయం జట్టు ఆత్మవిశ్వాసాన్ని మరింత పెంచిందని, హేడెన్ వంటి దిగ్గజాల సలహాలు జట్టులోని ఇతర ఆటగాళ్లకు కూడా ప్రేరణగా నిలుస్తాయని బట్లర్ అన్నారు.
ALSO READ: Bolivia: అపార్ట్‌మెంట్లను తలపించే సమాధి గోడలు.. అద్దె కట్టకపోతే అంతే సంగతి!
