అంగరంగ వైభవంగా సీతారాముల వారి పట్టాభిషేక మహోత్సవం
స్టార్ త్రినేత్రం, హన్మకొండ: భీమదేవరపల్లి మండలం ముల్కనూర్ గ్రామంలోని శ్రీ విశ్వేశ్వర సహిత అయ్యప్ప ఆలయంలో నిర్వహించిన శ్రీ సీతారాముల ఉత్సవాలు భక్తి, భవ్యతల సమ్మేళనంగా కొనసాగాయి. శుక్రవారం ఆలయంలో శ్రీ సీతారాముల కళ్యాణ మహోత్సవం ఘనంగా నిర్వహించగా, శనివారం శ్రీ సీతారాముల వారి పట్టాభిషేక మహోత్సవం అంగరంగ వైభవంగా జరిగింది. ఉదయం నుంచే ఆలయం ప్రాంగణం భక్తులతో కిక్కిరిసిపోయింది. వేద మంత్రోచ్చారణల మధ్య పూజా కార్యక్రమాలు అత్యంత వైభవంగా సాగాయి. ఈ మహోత్సవంలో సమస్త దేవతలను, పవిత్ర నదులను ఆవాహన చేసి ప్రత్యేక పూజలు నిర్వహించారు. శ్రీ లక్ష్మణుడు, భరతుడు, శత్రుఘ్నుడు, హనుమంతుడు, సమస్త వానర సేన, విభీషణుడు, జాంబవంతుడు వంటి పౌరాణిక మహనీయుల స్మరణతో కార్యక్రమం మరింత భక్తిరసపూరితంగా మారింది.
ఇదే కాకుండా నవగ్రహ దేవతలు, ఆదిదేవతలు, ప్రత్యధి దేవతలు, సమస్త దేవి దేవతలను ఆవాహన చేసి సంపూర్ణ శాస్త్రోక్త విధానంలో పూజలు నిర్వహించారు. అనంతరం శ్రీ సీతారాముల పట్టాభిషేకాన్ని శోడశోపచార పూజలతో ఘనంగా నిర్వహించి, మహా హారతితో కార్యక్రమాన్ని ముగించారు. ఈ వేడుకలో గ్రామ ప్రజలు పెద్ద ఎత్తున పాల్గొని భక్తి శ్రద్ధలతో ప్రార్థనలు చేశారు. గ్రామ ప్రజలందరూ సుఖసంతోషాలతో, ఆయురారోగ్యాలతో, అష్టైశ్వర్యాలతో క్షేమంగా ఉండాలని ఆలయ కమిటీ సభ్యులు ఆకాంక్షించారు. ఈ ఉత్సవాలు గ్రామంలో ఆధ్యాత్మిక వాతావరణాన్ని మరింత పెంపొందించడంతో పాటు, భక్తులకు అపారమైన ఆనందాన్ని కలిగించాయి. ఈ కార్యక్రమాన్ని ముల్కనూర్ ఆలయ కమిటీ సమగ్రంగా నిర్వహించింది.
ALSO READ: Sangem: రోడ్డు ప్రమాదాల నివారణకు పోలీసుల వినూత్న చర్యలు
