Horror: రాను రాను ఓటీటీ ప్లాట్‌ఫామ్‌లకు ప్రేక్షకుల ఆదరణ పెరుగుతున్న నేపథ్యంలో, ముఖ్యంగా హారర్ జానర్ సినిమాలకు డిమాండ్ విపరీతంగా పెరిగింది. వెన్నులో వణుకు పుట్టించే సన్నివేశాలు, ఉత్కంఠభరిత కథనాలతో వచ్చే చిత్రాలను ప్రత్యేకంగా ఇష్టపడే ప్రేక్షకుల కోసం ఓ క్లాసిక్ హారర్ మూవీ మళ్లీ చర్చల్లోకి వచ్చింది. అదే ‘The Texas Chain Saw Massacre’.
1973 కాలానికి చెందిన కథాంశంతో సాగే ఈ చిత్రం అమెరికాలోని Texas రాష్ట్రంలో ప్రారంభమవుతుంది. ఆ ప్రాంతంలో సమాధుల దోపిడీ జరుగుతోందనే వార్తలతో ప్రజల్లో భయం నెలకొంటుంది. ఈ నేపథ్యంలో సాలీ హార్డెస్టీ అనే యువతి తన సోదరుడు ఫ్రాంక్లిన్ హార్డెస్టీతో పాటు ముగ్గురు స్నేహితులు జెర్రీ, కిర్క్, పామ్‌లతో కలిసి తమ తాత సమాధి సురక్షితంగా ఉందో లేదో తెలుసుకోవడానికి రోడ్ ట్రిప్‌కు బయలుదేరుతుంది. మొదట ఆనందంగా సాగిన ఈ ప్రయాణం, మధ్యలో ఎదురైన ఒక హిచ్‌హైకర్ కారణంగా భయంకర మలుపు తిరుగుతుంది.
ఆ వ్యక్తి ప్రవర్తన అసహజంగా ఉండటమే కాకుండా, తన కుటుంబం, పాత స్లాటర్ హౌస్ గురించి చెప్పడం ద్వారా భయాన్ని పెంచుతాడు. చివరకు ఫ్రాంక్లిన్‌పై దాడి చేయడంతో, అతన్ని వాహనం నుండి బయటకు పంపేస్తారు. అక్కడి నుంచి మొదలవుతుంది అసలు హారర్. కొంత దూరం వెళ్లాక ఫ్యూయల్ లేక ఇబ్బందిపడిన ఈ గ్రూప్ సమీపంలోని పాత ఇంటికి చేరుతుంది. అక్కడి నుంచే వారి జీవితాల్లో నరకయాతన ప్రారంభమవుతుంది.
ఆ ఇంటి సమీపంలో కనిపించే ఫామ్ హౌస్‌లోకి వెళ్లిన కిర్క్, పామ్‌లు అక్కడ ఒక భయంకర వ్యక్తి చేతిలో హతమవుతారు. అతడే “లెదర్‌ఫేస్” అనే సీరియల్ కిల్లర్. మానవ చర్మంతో తయారు చేసిన మాస్క్ ధరించి, తన కుటుంబంతో కలిసి మానవ మాంసం తింటూ జీవించే ఈ కన్నిబల్ కుటుంబం కథలో ప్రధాన భయానక అంశంగా నిలుస్తుంది. ఒక్కొకరిగా మిగిలినవారిని కూడా ఈ కుటుంబం పట్టుకుని హింసిస్తుంది.
ఈ నేపథ్యంలో సాలీ చివరకు తన ప్రాణాలను కాపాడుకోవడానికి చేసే పోరాటం ప్రేక్షకులను ఉత్కంఠకు గురి చేస్తుంది. ఆమె ఈ నరమాంస భక్షకుల గూటి నుండి తప్పించుకుంటుందా? లేక వారి బారిన పడుతుందా? అన్నది సినిమా క్లైమాక్స్‌లో తెలుస్తుంది. ప్రతి సన్నివేశం భయంతో పాటు ఉత్కంఠను కలిగించేలా తీర్చిదిద్దడం ఈ చిత్ర ప్రత్యేకత.
1974లో విడుదలైన ఈ చిత్రానికి Tobe Hooper దర్శకత్వం వహించారు. సాలీ పాత్రలో Marilyn Burns నటన ప్రత్యేకంగా నిలిచింది. హారర్ జానర్‌లో ఇది ఒక క్లాసిక్‌గా గుర్తింపు పొందింది. ప్రస్తుతం ఈ చిత్రం Amazon Prime Videoలో స్ట్రీమింగ్ అవుతోంది.
భయంకరమైన కథనం, రియలిస్టిక్ ట్రీట్‌మెంట్, మానసికంగా కలవరపరిచే సన్నివేశాలతో కూడిన ఈ సినిమా హారర్ ప్రేమికులకు తప్పక చూడాల్సిన చిత్రం అని చెప్పడంలో ఎలాంటి సందేహం లేదు.
ALSO READ: CM Revanth Reddy: అసెంబ్లీ ఎన్నికలు 2029లోనే
