Jaggery Tea: ఉదయాన్నే వేడి వేడి టీ ఒక కప్పు చేతిలో పడితే రోజంతా అలసట తగ్గిపోయినట్టే అనిపిస్తుంది. ముఖ్యంగా చలికాలంలో ఆవిరులు కక్కే టీ మనసుకూ, శరీరానికీ కొత్త ఉత్సాహాన్ని ఇస్తుంది. సాధారణంగా చాలామంది చక్కెర టీకి అలవాటు పడినా, ఆరోగ్యం మీద దృష్టి పెట్టే వారు మాత్రం బెల్లం టీ వైపు ఎక్కువగా మొగ్గు చూపుతున్నారు. సహజమైన తీపి, మంచి రుచి మాత్రమే కాకుండా ఆరోగ్యానికి మేలు చేసే గుణాలు బెల్లం టీకి ప్రత్యేకతగా నిలుస్తున్నాయి.
అయితే చాలా ఇళ్లలో బెల్లం టీ తయారు చేసే సమయంలో ఎదురయ్యే ప్రధాన సమస్య పాలు విరగడం. పాలు విడిపోవడంతో టీ రంగు మసకబారిపోతుంది, రుచి కూడా సరిగా ఉండదు. దీంతో హోటల్‌ల్లో దొరికేలా చిక్కటి, ఆకర్షణీయమైన బెల్లం టీ ఇంట్లో చేయడం కష్టమేనన్న భావన చాలామందిలో ఉంది. కానీ కొన్ని చిన్న చిట్కాలు పాటిస్తే పాలు అస్సలు విరగకుండా అచ్చం హోటల్ స్టైల్ బెల్లం టీని సులభంగా తయారు చేసుకోవచ్చని నిపుణులు చెబుతున్నారు.
బెల్లంతో టీ చేసినప్పుడు పాలు విరగడానికి కారణం బెల్లంలో సహజంగా ఉండే స్వల్ప ఆమ్ల లక్షణమే. మరిగుతున్న పాలలో నేరుగా బెల్లం వేసినప్పుడు ఆ వేడి కారణంగా ఆమ్ల చర్య జరిగి పాలు విడిపోతాయి. అంతేకాదు, మార్కెట్లో లభించే కొన్ని రకాల తెల్లటి బెల్లంలో రసాయనాలు కలిపి ఉండటం కూడా ఈ సమస్యకు కారణమవుతోంది. అందుకే ఎప్పుడూ నల్లటి, సేంద్రీయ బెల్లం లేదా ముడి బెల్లం వాడటం ఆరోగ్యానికి కూడా మంచిదని సూచిస్తున్నారు.
బెల్లం టీ రుచిని మరింత పెంచేందుకు కొద్దిగా మసాలా దినుసులు ఉపయోగిస్తే అదనపు ప్రయోజనం ఉంటుంది. అల్లం, ఏలకులు, మిరియాలు, తులసి ఆకులు వంటి సహజ పదార్థాలు టీకి మంచి సువాసన ఇవ్వడమే కాకుండా రోగనిరోధక శక్తిని కూడా పెంచుతాయి. ముందుగా ఒక గిన్నెలో నీటిని పోసి, టీ పొడి, దంచిన మసాలా పదార్థాలను వేసి బాగా మరిగించాలి. నీరు మరిగే దశలోనే తురిమిన బెల్లాన్ని వేసి అది పూర్తిగా కరిగి డికాషన్ తయారయ్యే వరకు మరిగించాలి.
ఇక్కడే అసలు కీలకమైన చిట్కా ఉంటుంది. పాలు విరగకుండా ఉండాలంటే వాటిని వేరే గిన్నెలో విడిగా వేడి చేయాలి. మరిగిపోతున్న డికాషన్‌లో చల్లటి పాలు పోయకూడదు. పాలు కూడా బాగా వేడెక్కిన తర్వాత మాత్రమే ఆ డికాషన్‌లో కలపాలి. ఇలా చేస్తే పాలు విడిపోవడానికి అవకాశం ఉండదు. పాలను కలిపిన తర్వాత రెండు నిమిషాల పాటు తక్కువ మంటపై ఉంచి వెంటనే వడకట్టుకుంటే, రంగు, రుచి రెండూ అద్భుతంగా ఉండే బెల్లం టీ సిద్ధమవుతుంది.
బెల్లం టీ ఆరోగ్య ప్రయోజనాల పరంగా కూడా ఎంతో ఉపయోగకరంగా ఉంటుంది. బెల్లంలో ఉండే ఇనుము రక్తహీనత సమస్యను తగ్గించడంలో సహాయపడుతుంది. చలికాలంలో శరీరాన్ని లోపలినుంచి వెచ్చగా ఉంచి జలుబు, దగ్గు వంటి సమస్యల నుంచి రక్షణ కల్పిస్తుంది. భోజనం తర్వాత ఈ టీ తాగితే జీర్ణక్రియ మెరుగుపడుతుందని ఆయుర్వేద నిపుణులు చెబుతున్నారు. సహజమైన తీపి కావడంతో షుగర్ వినియోగాన్ని తగ్గించాలనుకునే వారికి ఇది మంచి ప్రత్యామ్నాయంగా మారుతోంది.
ALSO READ: Post Office FD: ఈ స్కీమ్ చాలా బాగుంది కదా.. రూ.1 లక్ష ఫిక్స్‌డ్‌ డిపాజిట్‌ చేస్తే చాలు.. ఆ తర్వాత
